2
ናናዌ ኩንዴꬅ
1 ሃኔ ናናዌ!
ኔና ቆሃናይ ኔ ቦላ ዪዴስ፤
ኔ ሚጻ ናጋ፤
ኔ ኦጌ ጾሞሳ፤
ሚንꬃ ጊጻ፤
ኔ ዎልቃ ኡባ ሚንꬃ።
2 ꬋይሲዛይቲ ኢስታ ሜላ
ኣሺኮካ፥
ኢስቲ ዎይኔ ኣታኪልቴ ቶኪዛሶሆ
ሙሌራ ꬋይሲኮካ
ኢስራኤሌ ቦንቾ ኡባ ማላ
ጎዳይ ያቆቤ
ቦንቾካ ዛራና።
3 ኢዛ ዎታዳራታ ጎንዳሌይ ዞኦ፤
ኢዛ ኦላንቻቲካ
ዞኦ ማይኦ ማይኢዳ፤
ኢስቲ ኦሌታናስ ጊጌቲዳ ጋላስ
ኢስታ ፓራ-ጋሬታ
ቢራታይ ጾልቄስ፤
ኢስታ ቶራ ቶማይ ሉጼስ።
4 ፓራ-ጋሬቲ ዴምባን
ያኔ ሃ ቡራቄቴስ፤
ኦጌታ ቦላካ
ሾምኡሾምኡ ጌቴስ፤
ላጪዛ ጾምፔ ሚሳቴቴስ፤
ዎልቃንꬃ ማላ
ዋዋጪ ጌቴስ።
5 ዶሬቲዳ ኦላንቻታ ጼይጌስ፤
ጊዶ ኣቲን ኢስቲ ዪሼ
ኦጌን ꬉጴቴቴስ፤
ካታማ ጊምቤኮ ዎጼቴስ፤
ኦላ ቴቂዛ ጎንዳሌይካ
ሄን ዴስ።
6 ሻፋ ፔንጌይ ዋጊ ጊ ዶዬቲዴስ፤
ካዎቴꬃ ኬꬂ ኩንዲዴስ።
7 ናናዌይ ካዉዪን
ኢዚ ካዎያ ዲኤታዳ ቡሲ
ኣቶንታይሲ ካሴቲ ዮቴቲዴስ።
ኢዚ ማጫ ኣይሌቲ
ሃራጴ ማላ ዬካና፤
ባንታ ቲራካ ኢጫና።
8 ናናዌይ ኤሌ ሃꬃ ማላ፤
ኢዚ ሃꬂካ ሚጫና።
«ኤቃ! ኤቃ!» ጊ ኢስቲ ዋሳና፤
ጊዶ ኣቲን ጉዬ
ሲሚዛይ ዴና።
9 ኢዛ ሚንጃ ኬꬃን
ዳጋቲዳ ኣቆታስ
ቆዳይ ዴና፤
ቢዲ ቢራካ፥
ዎርቃካ ቦንቂ ኤኪቴ።
10 ቆጪሬታዱስ፤ ቦንቄታዱስ፤
ካሎታዱስ፤ ዎዚናይ ታሂዴስ፤
ጉልባቴይ ኮኮሪዴስ፤
ኣሾይ ቃጺዴስ፤
ኣይፌሶይካ ጊልቂዴስ።
11 ጋሞቲ ካሴ ዴኢዛ ጎንጎሎይ፥
ኢስታ ማራቲ ሚዛሶይ፥
ማጫ ጋሞይኔ
ኣዴ ጋሞይ ቢዛሶሆይ፥
ኢስታ ማራቲ ሂርጋይ ባይንዳ
ሚዛሶይ ሃኢ ኣዋን ዲዜ?
12 ጋሞይ ባ ማራታስ
ጊዳናይሳ ኬና ዎꬊዴስ፤
ማጫሳታስካ ጩሊ ዎꬊዴስ፤
ባ ዎꬊዳይሳ ባ ሼምፒዛሶን፥
ባ ቦንቂ ሺሺዳይሳ
ባ ጎንጎሎ ኩንꬂዴስ።
13 ኡባፌ ዎልቃማ ጎዳይ፥
«ታ ኢንቴ ቦላ ዴንዳዲስ፤
ኢንቴ ፓራ-ጋሬታካ ጹጋና፤
ኢንቴ ጋሞ ማራታ ማሻይ ማና፤
ኢንቴስ ማና ሚሺካ
ቢታ ቦላ ኣሽኬ፤
ኢንቴ ኪቲዛይታ ጬንጉርሲ
ሃይሳፌ ጉዬ ሴቴቴና»
ጊ ኣዋጄስ።