1 ጎዳይ ሙሴስ ሂዝጊዴስ፥ 2 «ኢስራኤሌ ኣሳ፥ ‹ታኒ ኢንቴስ ኢሚዛ ካናኔ ቢታዮ ኢንቴ ቢዲ ጌሊዛ ዎዴ ኢዚ ዩሾን ዲዛ ዴሬቲ ሃይሳፌ ካሊዛይታ፤ 3 ዱጌሃ ባጋራ ጺኔ ባዞፌ ዴንዲዲ ኤዶሜ ባዞ ኣቻራ ካንꬂ ቢዲ ኣርሼይ ሞኪዛ ባጋራ ሃይቆ ኣባፌ ዱጌሃ ባጋ ጼራ ቦላራ ዶሚዲ፥ 4 ኣቅራቢሜ ፑርዴራ ካንꬂ ኣꬊዲ ጺኔ ጋኪዲ ዱጌሃ ባጋራ ቃዴሴ ባሪኔ ጋኬስ፤ ሄሳፌ ሃጻሬ-ኣዳሬ ካንꬂዲ ኣጺሞኔ ጋኬስ። 5 ኣጺሞኔፔ ዶሚዲ ሃꬂ ባይንዳ ጊብጼ ሻፋታራ ዩዪ ኣꬊዲ ሜዲቴራኔ ኣባን ኤቄስ።

6 « ‹ኣርሼይ ዉሊዛ ባጋራ ሜዲቴራኔ ኣባይ ዛዋ ጊዳና።

7 « ‹ፑዴሃ ባጋራ ዲዛ ዛዋይ ሜዲቴራኔ ኣባፌ ቢዲ ኡሬ ዙማ ጋኬስ። 8 ኡሬ ዙማፔ ቢዲ ሃማቴራ ኣꬊ ቢዲ ጼዳዴ ጋኬስ። 9 ጌዴ ዚፒሮኔ ፒኒዲ ሃጻሬ-ኤናኔ ጋኪ ኤቄስ፤ ሃይሲ ኡባይ ኢንቴስ ፑዴሃ ባጋራ ዲዛ ዛዋ ጊዳና።

10 « ‹ኣርሼይ ሞኪዛ ባጋራ ሃጻሬ-ኤናኔፔ ቢዲ ሻፋሜ ጋካናስ ማላታ ዎꬂቴ። 11 ዛዋዚ ሻፋሜፔ ዶሚዲ ኣዪኔፔ ኣርሼይ ሞኪዛ ባጋራ ኤሬቢላ ካንꬂ ኣꬊዲ ጋሊላ ኣባፌ ኣርሼይ ሞኪዛ ባጋራ ዲዛ ዞዜታራ ካንꬂዲ፥ 12 ዮርዳኖሴ ሻፋ ዎꬌስ፤ ሄራ ቢዲ ዉርሴꬃዚ ሃይቆ ኣባ * ጊዳና፤ ሃይቲ ኢንቴ ቢታዮ ዩዪ ኣꬊዛ ዛዋታ ጊዳና› ጋዳ ኣዛዛ።»

13 ሙሴይ ኢስራኤሌ ኣሳ፥ «ሳማ ዬጊዲ ኢንቴ ላታና ማላ ኡዱፉን ዛርኬታሲኔ ሚናሴ ዛርኬፌ ባጋይታስ ሄ ቢታይ ኢሜታና ማላ ጎዳይ ኣዛዚዴስ። 14 ኦሮቤሌ ዛርኬቲ ጋዴ ዛርኬቲኔ ሚናሴስ ባጋ ዛርኬቲ ባስ ኢሜቲዳ ቢታ ላቲዳ። 15 ኢስቲካ ዮርዳኖሴፔ ሄ ፒንꬃን ኢያርኮ ጊናራ ኣርሼይ ሞኪዛ ባጋራ ባና ጋኪዛ ጺንጾዛ ኤኪዳ» ጊ ዮቲዴስ። +

16 ጎዳይ ሙሴስ ሂዝጊዴስ፥ 17 «ቄሴ ኤልኤዜሬይኔ ናዌ ና ኢያሶይ ጋዴዛ ዴሬዛስ ጊሼቶ። 18 ኢስቲ ቢታ ጊሺዛ ዎዴ ኢስታ ማዳናስ ዛርኬፌ ዛርኬፌ ኮራፒኔ ኤካ። 19 ሄ ኔ ኤካና ኣሳታ ሱንꬂ ሃይሳፌ ካሊዛይሳ፤ ዩሁዳ ዛርኬፌ ዮፊኔ ና ካሌቤ፥ 20 ሲሞና ዛርኬፌ ኣሚሁዴ ና ሳሜላ፥ 21 ቢኒያሜ ዛርኬፌ ኪሳሎኔ ና ኤልዳዴ፥ 22 ዳኔ ዛርኬፌ ዮጊሌ ና ቡቃ፥ 23 ዮሴፌ ዛርኬፌ ሚናሴ ባጋ ሱፊዴ ና ሃንኤሌ፥ 24 ዮሴፌ ዛርኬፌ ኤፍሬሜ ባጋ ሺፊጼ ና ቃሙኤሌ፥ 25 ዛቢሎኔ ዛርኬፌ ፔሪናኬ ና ኤልጻፋኔ፥ 26 ዪሳኮሬ ዛርኬፌ ሆዛ ና ፓልቲኤሌ፥ 27 ኣሴሬ ዛርኬፌ ሴሌሜ ና ኣሁዴ፥ 28 ኒፍታሌሜ ዛርኬፌ ኣሚሁዴ ና ፔዳሄሌ።» 29 ሃይታንቲ ኢስራኤሌ ኣሳስ ካናኔን ቢታ ጊሺ ኢማና ማላ ጎዳይ ዶሪዳ ኣሳታ።