27
1 ዎንቶይሳን ጬቄቶፋ፤
ዎንቶ ኣዚ ሃናናኮ
ኔ ኤራካ።
2 ኔና ሃራ ኣሲ ጋላቶፔ ኣቲን
ኔርካ ኔና ጋላቶፓ፤
ሃራ ኣሲ ኔና ሳቦፌ ኣቲን
ኔኒ ኔርካ ኔና ሳቦፋ።
3 ሹቺ ዴጾ፤
ኣንጮይ ቶኮ፤
ጊዶ ኣቲን ኤያ ኣሲ
ዴንꬂዛ ኦሺ
ናምኣታፔካ ዴጼስ።
4 ሼኔይ ሜንጼ ኢታ፤
ሃንቆይ ሜንጼ ኢታ፤
ቃናቴ ሲንꬃን ኤቂ
ዳንዳያናይ ኦኔ?
5 ጌሚዳ ሲቆፔ
ቆንጬን ሴሪዛ ሴራይ ሎኦ።
6 ሞርኬይ ኔና ዳሮቶ ዬራናፔ
ሲቆይ ኔና ዴቺዛይሲ ኪያ።
7 ካሊዳ ኣስ ኤሳ ኢሊሎይ ኢቴስ፤
ጊዶ ኣቲን ጋፊዳ ኣስ
ጋራ ማላ ጫሚዛ
ሚሺካ ማልኤስ።
8 ባ ሶ ኣጊዲ ዩዪዛ ኣሲ፥
ባ ኬꬃፌ ሃካ ፓሊዛ
ካፎ ማላ።
9 ሺቶይኔ ኤጻኔይ
ኣስ ኡፋይሲዛይሳ ማላ፥
ሲቆ ላጌ ዞሬይካ ኡፋይሴስ።
10 ኔ ላጌኔ ኔ ኣዋ ላጌ ኣጎፋ፤
ኔ ኢሻኮ ቦፓ።
ሃሆን ዲዛ ኢሻፔ
ኔስ ማታን ዲዛ
ሾሮይ ኪያ።
11 ታ ናዞ!
ኔኒ ኣꬎ ኤራንቻ ጊዳ፤
ታ ዎዚና ኡፋይሳ፤
ሂስቲኮ ታና ካꬊዛይታ
ኦይሻካ ዛራና።
12 ጪንጫ ኣሲ ሜቶይ ዪዛ ዎዴ
ቤኢዲ ቆቴቴስ፤
ጊዶ ኣቲን ኣኬካይ ፓጪዳ ኣሲ
ሜቶ ጋርስ ቢ ጌሌስ፤
ሂስቲዲ ጉዬፔ ቆሄቴስ።
13 ኤሮንታ ኣሳስ ሁርቡታ ጌሊዛ
ኣሳ ማይኦ ቃራ ኤካ፤
ሃዉሻ ማጫሳስ ዋሴ ጌሊዛ
ኣሳ ማይኦ ኦይካ።
14 ማላዶ ዎንታራ
ባ ቃላ ꬎቁ ሂስቲዲ
ባ ሾሮ ኣንጆይ
ቃንጌꬃ ማላ ቆዴቴስ።
15 ኡባ ዎዴ ኦሽ ኦዬቲዛ ማቻ
ኢራ ጋላስ ፓጬይ ባይንዳ
ኣꬂዛ ኬꬃ ማላ።
16 ጫርኮ ቴቃናስ ዎይኮ
ዛይቴ ጩጩሚዲ ኦይካናስ
ዳንዳዬቶንታይሳ ማላ
ኢዞ ጮኡ ኦꬃናስ
ዳንዳዬቴና።
17 ቢራታይ ቢራታ ቃራሲዛ ማላ
ኣሲካ ኢሶይ ኢሳ ቃራሴስ።
18 ባላሴ ሚꬃዮ
ኢሻልሲዲ ናጊዳ ኣሲ
ኢዚ ኣይፌ ማና፤
ባ ጎዳስ ኦꬂዛ
ኣሲ ቦንቼታና።
19 ሃꬃይ ሄሬጋꬆ
ሲንꬅ ቤሲዛ ማላ
ኣሳ ዎዚናይ
ኢዛዴ ካንዶ ቤሴስ።
20 ሃይቆይኔ ባሺ ካሊ ኤሬቴና፤
ሄሳꬆካ ኣሳ ኣይፌይ ካሌና።
21 ቢራይኔ ዎርቃይ ታማን ፓጬቲዲ
ጌይዛ ማላ
ኣሲካ ባ ኤኪዛ
ጋላታን ፓጬቴስ።
22 ኤያ ኣስ ካꬃ ማላ
ኡዱላን ዬጋዳ፥
ኡዱላ ሚꬃን ጫዲዛኮካ
ኢዛፔ ኤያቴꬂ ኪቼና።
23 ኔ ዶርሳቲ ዴኢዛ ሃኖታ
ሎኤꬃዳ ኤራ፤
ኔ ዉዴካ ዎዚናፔ ሄማ።
24 ኣይስ ጊኮ
ዱሬቴꬂ ሜርናስ ዴኤና፤
ካላቻይካ ዬሌታፔ
ዬሌታ ጋካናስ
ሚኒ ዴኤና።
25 ሜላ ማታይ ቡጬቲዳፔ፥
ኣጫ ማታይ ኬኢዳፔ፥
ዙምቡላታ ቦላን ዴኢዛ ማታይ
ሺቂዳፔ ጉዬን፥
26 ዶርሳታ ኢስኬፌ
ኔኒ ኔስ
ማይኦ ኬሳና፤
ዴይሻታን ኔስ
ጎሻ ጋዴ ሻማና።
27 ኣቲዳ ዴይሻታ ማꬂ
ኔሲኔ ኔ ሶ ኣሳስ፥
ኔ ማጫ ኣይሌታስካ
ቁማ ጊዳናስ
ኩሚ ፓላሃና።