132
ፑዴ ኬዚሼ ዬጺዳ ማዛሙሬ
1 ኣቤት ጎዳዉ!
ዳዊቴኔ ኢዚ ዳንዳይዳ
ሜቶዛ ኡባ ኔ ቆፓ።
2 ጎዳዉ! ኢዚ ኔስ ጫቂዳ ቃላ፥
ዎልቃማ ያቆቤ ጾሳስካ
ኣዲኔቲዳ ኣዲና ቆፓ።
3 ኢዚካ፥ «ሃይሳፌ ሲንꬃን
ታኒ ታሶ ጌሊኬ፤
ታ ሂጻንካ ኬዚኬ፤
4 ꬊስኮካ ꬊስኪኬ፤
ታ ኣይፌታካ ሊጲኬ።
5 ሄሲካ ታኒ ጎዳስ ዱሳሶ፥
ዎልቃማ ያቆቤ ጾሳስ
ኣቆሶ ጊጊሳና
ጋካናሳ» ጊዴስ።
6 ሄኮ ኑኒ ታቦታዛ ጊሻስ
ኤፍራታን ዲሼ ሲዪዶስ፤
ቂሪያቴ-ዪኣሪሜ ቢታን
ኢዛ ዴሚዶስ።
7 ኑኒ፥ «ኣኔ ኢዚ ዲዛሶ ቦስ፤
ኢዛ ቶሆይ ዬꬊዛሶን
ጉፋኒዲ ኢዛስ ጎይኖስ።
8 «ኣቤት ጎዳዉ! ዴንዳ!
ኔ ሚኖቴꬃስ
ማላታ ጊዲዳ ታቦታራ
ኔ ኬꬅ ጌላዳ ሼምፓ።
9 ኔ ቄሴቲ ጺሎቴꬅ ማይኤቶ፤
ጌሽ ጊዲዳ
ኔ ኣሳቲ ኢሊሌቶ» ጊዶስ።
10 ኔ ኣይሌ ዳዊቴ ጊሻስ ጋዳ
ኔኒ ቲይዳይሳ ዬጎፋ።
11 ጎዳይ ዳዊቴስ
ቃንꬃፌ ጫቂዴስ፤
ላሜቶንታ ቃላን፥
«ኔ ናይታፔ ኢሳ ታኒ
ኔ ኣራታን ኡቲሳና።
12 ኔ ናይቲ ታ ጫቆ ቃላኔ
ታኒ ታማርሲዳ ቃላ
ኢስቲ ናጊኮ
ኢስታ ናይቲካ
ኔ ካዎቴꬃ ኣራታን
ሜርናስ ኡታና» ጊ ጫቂዴስ።
13 ጎዳይ ጺዮኖ ዶሪዴስ፤
ባስ ዴኢዛሶ
ኦꬃናስ ኣሞቲዲ፥
14 «ሃና ታስ ሜርናስ
ሼምፖሶ ጊዳና፤
ታኒ ኢዞ ዶሲዳ ጊሻስ
ኢዚን ዴኣና።
15 ታኒ ኢዞ ኬሃ ኣንጃና፤
ኢዚን ዴኢዛ ማንቆታካ
ካꬅ ካልሳና።
16 ታኒ ኢዚን ዲዛ ቄሴታ
ኣቶቴꬅ ማይዛና፤
ኢዚን ዴኢዛ ጾሳ ኣሳቲካ
ኡፋይሳን ዬጻና።
17 «ሃ ሶሆን ዳዊቴ ዜሬꬃፌ
ካዎ ኬሳና፤
ታኒ ቲይዳይሳስ ፖኦ ጊጊሳና።
18 ታኒ ኢዛ ሞርኬታ ዬላቻና፤
ጊዶ ኣቲን ኢዛ ሁኣን ዴኢዛ
ካዎቴꬃ ካላቻይ ጶላና» ጊዴስ።