135
1 ኢንቴኖ ጎዳ ኣይሌቶ!
ኢዛ ጋላቲቴ!
ጎዳ ሱንꬃ ሳቢቴ!
2 ኢንቴኖ ጎዳ ኬꬃን
ኦꬂዛይቶ!
ኢንቴኖ ኑ ጾሳ ኬꬃ ዛጎን
ኤቂዳይቶ ጋላቲቴ!
3 ኢዚ ኪያ ጊዲዳ ጊሻስ
ጎዳ ጋላቲቴ!
ኢዚ ሎኦ ጊዲዳ ጊሻስ
ኢዛ ሱንꬃስ ዬጺቴ!
4 ጎዳይ ያቆቤ
ባስ ቡዞ ኦꬂዴስ፤
ኢስራኤሌካ ባስ
ኣልኦ ሚሽ ሂስቲ ዶሪዴስ።
5 ጎዳይ ጊታ ጊዲዳይሳኔ
ኑ ጎዳይ ጾሳታ ኡባፌ
ꬎቂዛይሳ ታኒ ኤራይስ።
6 ሳሎኒኔ ሳኣን፥
ኣባታኒኔ ጪማታ
ኡባ ጊዶንካ
ጎዳይ ባ ዶሲዳይሳ
ኡባ ኦꬄስ።
7 ካሬꬃ ሻራ ሳኣ ጋጻፔ
ኢዚ ዴንꬄስ፤
ኢዚ ኢራራ ዎልቃንꬅ ኪቴስ፤
ባ ሚንጂ ዎꬂዳሶፔ
ጫርኮ ኬሲ ዬዴስ።
8 ጊብጼ ቢታን ኣሳፔ ቢዲ
ሜሄ ጋካናስ
ባይራ ዬሌቲዳ ኡባ ዎꬊዴስ።
9 ኔኖ ጊብጼ! ፓሮኔ ቦላኔ
ኢዛ ኦሳንቻታ ቦላ
ኦራꬂኔ ማላሊሲዛ
ሚሽ ዬዲዴስ።
10 ኢዚ ዳሮ ካዎቴꬃታ ꬋይሲዴስ፤
ዎልቃማ ካዎታካ ዎꬊዴስ።
11 ኣሞሬታ ካዎ ሲሆኔ፥
ባሳኔ ካዎ ኣጌኔ
ካናኔ ካዎታ ኡባ ዎꬊዴስ።
12 ኢስታ ቢታካ ባ ዴራ
ኢስራኤሌ ላቲሲዴስ።
13 ኣቤት ጎዳዉ!
ኔ ሱንꬂ ሜርናስ ዳና፤
ዬሌታፔ ዬሌታ ጋካናስ
ኔኒ ሃሳኤታና።
14 ጎዳይ ባ ኣሳስ ፒርዳና፤
ኢዚ ባ ኣይሌታስካ ቃꬌታና።
15 ካዎቴꬃቲ ጎይኒዛ
ኤቃ ጾሳቲ
ቢራፔኔ ዎርቃፌ
ኣሳ ኩሼን ኦሴቲዳይታ።
16 ኢስታስ ዶናይ ዴስ ሺን
ሃሳዬቴና፤
ኣይፌይ ዴስ ሺን ጼሌቴና።
17 ሃይꬂ ዴስ ሺን ሲዬቴና፤
ኢስታ ሲꬌን ፔኖይካ ዴና።
18 ኢስታ ሜꬊዳይቲኔ
ኢስታን ኣማኔቲዛይቲ ኡባይ
ኢስታ ማላ ጊዴቶ።
19 ኢስራኤሌ ዴሬዞ!
ጎዳ ጋላቲቴ፤
ኣሮኔ ኬꬃ ኣሳቶ!
ጎዳ ሳቢቴ፤
20 ሌዌ ኬꬃ ኣሳቶ!
ጎዳ ጋላቲቴ፤
ጎዳስ ያዪዛይቶ!
ኡባይ ጎዳ ጋላቲቴ።
21 ዬሩሳላሜን ዴኢዛ ጎዳይ
ጺዮኔን ጋላቴቶ!
ጎዳይ ጋላቴቶ!