137
1 ባቢሎኔ ሻፋታ
ላንቄን ኡቲዲ
ኑኒ ጺዮኔ ቆፒዳ ዎዴ
ዬኪዶስ።
2 ሄን ኑኒ ኑ ዲꬃታ
ሃꬃ ማታን ዲጪዛ
ሚꬃታ ቦላ ካቂዶስ።
3 ኑና ዲኢዳ ኣሳቲ ኑኒ ዬጺዲ
ኢስታ ኡፋይሳና ማላ፥
«ጺዮኔ ዬꬃፌ ኢሳ
ኣኔ ኑስ ዬጺቴ» ጊዳ።
4 ጎዳ ማዛሙሬ ኑኒ ኣላጋ ቢታን
ዎስቲ ዬጾኒ?
5 ዬሩሳላሜ ካታማዬ!
ታኒ ኔና ባሊኮ
ታ ኡሻቻ ኩሼይ
ባ ኦሶ ባሎ።
6 ታኒ ኔና ሃሳኦንታ ኣጊኮ
ታ ኡፋይሳ ኡባፌ ኣꬃዳ
ዬሩሳላሜ ዶሶንታ ኣጊኮ
ታ ኢንጻርሳይ
ጎንጊራꬃራ ኦይኬቶ።
7 ኣቤት ጎዳዉ!
ዬሩሳላሜይ ኩንዲዛ ጋላስ
ኤዶሜ ኣሳቲ
ኦꬂዳይሳ ቆፓ፤
ኢስቲ፥ «ላሊቴ! ላሊቴ!
ዮቻፌ ꬎቃሊ ꬋይሲቴ!»
ጊዳይሳ ባሎፓ።
8 ሃኔ ባቢሎኔ ቢታዬ
ኔ ꬋያና!
ኔኒ ኑ ቦላ ፖሊዳ ኢታ ኦሶ
ኔ ቦላ ዛሪ ኦꬂዛይ
ኣንጄቲዳይሳ።
9 ኔ ጉꬃ ናይታ ኦይኪዲ
ዛላ ቦላ ዲንጬሬꬂዛይ
ኣንጄቲዳይሳ።