140
ዳዊቲ ዛማሬታ ካቦስ ዬጺዳ ማዛሙሬ
1 ኣቤት ጎዳዉ!
ኢታ ኣሳታፔ ታና ኣሻ፤
ማካላንቻታፔካ
ታና ናጋ።
2 ኢስቲ ኡባ ዎዴ
ኢታ ኦꬃናስ ማቄቴቴስ፤
ኡባ ጋላሲካ
ኦሽ ዴንꬃናስ
ዮኦ ፒቄቴስ።
3 ኢስቲ ሃሶ ሾሻ ማላ
ኢንጻርስ ቃራሴቴስ፤
ኢስታ ዶናፔ ጎፔ ማርዜ ማላ
ቃላይ ኬዜስ።
4 ኣቤት ጎዳዉ!
ኢታ ኣሳታ ኩሼፔ ታና ኣሻ፤
ታ ቶሆ ቃጻናስ ቆፒዛ
ማካላንቻታፔካ
ታና ናጋ።
5 ኦቶራንቻቲ ታስ
ዎጺማዴ ዎꬂዳ፤
ጊቴ ጊግሲዳ፤
ታ ኦጌንካ ዲዛ ዎꬂዳ።
6 ታኒ ጎዳ፥
«ኔኒ ታ ጾሳ» ጋይስ።
ኣቤት ጎዳዉ!
ታኒ ሾቢዛይሳ ሲያ።
7 ኣቤት ኡባፌ ዎልቃማ ጎዳዉ!
ታና ኣሺዛ ሚኖዞ!
ኦላ ጋላስ ታስ ጎንዳሌ ጊዳዳሳ!
8 ኣቤት ጎዳዉ!
ኢታታ ኣሞይ ፖሌቶፎ፤
ኢስታ ቆፋይ
ፖሌታና ማላ ኦꬆፋ!
9 ታ ሞርኬታን ታና ጾኒሶፓ፤
ኢስቲ ቆፒዳ ኢታ ቆፋይ
ኢስታ ሁኤን ጻጼቶ።
10 ኢስታ ቦላ ታማ ቦንቆይ ቆሌቶ፤
ኢስቲ ታማን ኦሌቴቶ፤
ሲሚ ኬዛናስ ዳንዳዮንታ
ኦላን ኩንዴቶ።
11 ኢታ ሃሳይዛይታ ቢታይ ቶኮፎ፤
ማካላንቻታ
ኢታ ሚሺ ኦይኮ።
12 ጎዳይ ሂዬሳታስ ፒርዲዛይሳኔ
ሜቶታንቻታስ
ሞቴቲዛይሳ ታ ኤራይስ።
13 ጺሎቲ ቱሙፔ
ኔ ሱንꬃ ጋላታና፤
ሱሬቲካ ኔ ሲንꬃን ዴኣና።