145
ዳዊቲ ዬጺዳ ጋላታ ማዛሙሬ
1 ኣቤት ታ ካዎ ጾሳዉ!
ታኒ ኔና
ꬎቁ ꬎቁ ሂስታና፤
ኔ ሱንꬃ
ሜርናስካ ጋላታና።
2 ታኒ ኔና ኡባ ጋላስ ሳባና፤
ኔ ሱንꬃካ
ሜርናስ ጋላታና።
3 ጎዳይ ጊታ፤
ጊታ ጋላታይ ኢዛስ ቤሴስ፤
ኢዛ ጊታቴꬃይ
ኣሳ ቆፋፔ ቦላ።
4 ኢሲ ዬሌታይ ካሊዛ ዬሌታስ
ኔ ኦꬂዳ ኦሶ ዮቴስ፤
ማላሊሲዛ ኔ ኦሶታካ
ቆንጪሳና።
5 ኢስቲ ኔ ቦንቾኔ
ኔ ጊታ ቴማ ሃሳያና፤
ታኒካ ማላሊሲዛ ኔ ኦሶዛ
ዛራ ዛራ ቆፓና።
6 ኣሳይ ማላሊሲዛ ኔ ኦሶዛ
ጊታቴꬃ ጊሻስ
ሃሳዬታና፤
ታኒካ ኔ ጊታቴꬃ ኣዋጃና።
7 ኢስቲ ኔ ኪያቴꬃ ዳሮዛ ዮታና፤
ኔ ጺሎቴꬃ
ኡፋይሳን ዬጻና።
8 ጎዳይ ቃꬌቲዛይሳኔ
ማሪዛይሳ፤
ኢዚ ሃንቄታናስ
ኤሶቶንታይሳኔ
ሲቆይ ኩሚዳይሳ።
9 ጎዳይ ኡባስ ኪያ፤
ኢዚ ባ ሜꬊዳ
ኡባስ ቃꬌቲዛይሳ።
10 ኣቤት ጎዳዉ!
ሜꬌታ ኡባይ ኔና ጋላታና፤
ኔ ዴሬይ ኡባይካ
ኔና ሳባና።
11 ኢስቲ ኔ ካዎቴꬃ
ቦንቾ ጊሻስ ሃሳያና፤
ኔ ዎልቃ ጊሻስ ዮታና።
12 ሄሳን ኔ ዎልቃማ ኦሶታኔ
ኔ ካዎቴꬃ
ቴማ ቦንቾዛ
ኢስቲ ኤሪሳና።
13 ዬሌታፔ ዬሌታ ጋካናስ
ኔ ሃራና፤
ኔ ካዎቴꬃይ ሜርናሳ።
ጎዳይ ባ ጊዳ ቃላን
ኣማኔቲዛይሳ፤
ኢዚ ባ ኦሶ ኡባን ኪያ።
14 ጎዳይ ጋንዲጋርዛይታ ካፌስ፤
ኩንዲዳይታካ ዴንꬄስ።
15 ኡባ ኣይፌይ ኔኮ ጼሌስ፤
ኢስታስ ኮሺዛ ዎዴን
ኔኒ ኢስታስ ቁማ ኢማሳ።
16 ኔኒ ኔ ኩሼ ሚጫዳ
ሼምፖራ ፓጻ ዲዛ ኡባ
ኣሞ ኩንꬃሳ።
17 ጎዳይ ባ ኦጌ ኡባን ጺሎ፤
ኢዚ ባ ኦሶ ኡባን ኪያ።
18 ጎዳይ ባና ጼይጊዛይታስ
ኡባስ ማታ፤
ዎዚናፔ ጼይጊዛ ኡባስ
ማታን ዴስ።
19 ኢዚ ባስ ያዪዛ ኡባስ
ኣሞ ኩንꬄስ።
ቃሴ ኢዚ ኢስታ ዋሶዛ ሲዪዲ
ኢስታ ኣሼስ።
20 ጎዳይ ባና ሲቂዛይታ
ኡባ ናጌስ፤
ጊዶ ኣቲን ኢታታ
ኡባ ꬋይሳና።
21 ታኒ ታ ዶናን ጎዳ ጋላታና።
ሜꬌታ ኡባይ
ኢዛ ጌሻ ሱንꬃ
ሜሪ ሜርናስ ጋላቶ!