148
1 ጎዳይ ጋላቴቶ!
ሳሎን ዴኢዛይቶ! ጎዳ ጋላቲቴ፤
ቦላ ꬎቃን ዴኢዛይቶ!
ኢዛ ሳቢቴ።
2 ኢንቴኖ ኢዛ ኪታንቻቶ!
ኡባይ ኢዛ ጋላቲቴ፤
ሳሎን ዴኢዛ ኢዛ ኦላንቻቶ!
ኡባይ ኢዛ ጋላቲቴ።
3 ኣርሼይኔ ኣጊናይ ኢዛ ጋላቲቴ፤
ፖኢሲዛ ጾሊንቴቶ!
ኡባይ ኢዛ ጋላቲቴ።
4 ኢንቴኖ ኡባፌ ቦላ ꬎቃን
ዲዛ ሳሎቶ! ኢዛ ጋላቲቴ፤
ሳሎ ጉፋንꬆፌ ቦላራ ዲዛ
ሃꬃቶ! ኢዛ ሳቢቴ።
5 ኢዚ ኣዛዚን ኢስቲ ኡባይካ
ሜꬌቲዳ ጊሻስ
ኡባቲ ጎዳ
ሱንꬃ ጋላቴቶ!
6 ኢዚ ኢስታ ኢስቲ ዲዛሶን
ሜሪ ሜርናስ
ሚንꬂ ዎꬂዴስ፤
ኢዚ ኢስታስ ላሜቶንታ
ዎጋ ኢሚዴስ።
7 ሳኣን ዴኢዛይቶ! ጎዳ ጋላቲቴ!
ኣባ ጊዶን ዲዛ
ጊታ ሜꬌቴꬃቲኔ
ዎጋ ጊታ ኣባ ጪማቲ
ኡባይካ ኢዛ ሳቢቴ።
8 ዎልቃንꬂኔ ሻቺ፥
ኬንቾይኔ ጉባናይ፥
ኢዛ ኣዛዞ ፖሊዛ ጎቴ ጫርኮቲ
ኡባቲካ ኢዛ ጋላቲቴ።
9 ዙማቶ፥ ዙምቡላቶ፥
ኣይፌ ኣይፊዛ ሚꬃቶ፥
ዚጋቶ ኡባቲካ ኢዛ ጋላቲቴ።
10 ሜሄቶ፥ ዶኣቶ፥
ሳኣራ ጎሼቲዛ ሜꬌታቶ!
ፓሊዛ ካፎቶ ኡባቲካ
ኢዛ ጋላቲቴ።
11 ሳኣ ካዎቶ፥ ካዎቴꬃቶ!
ዳናቶ፥ ዴሬ ሃሪዛይቶ!
ኡባቲካ ኢዛ ጋላቲቴ።
12 ፓንꬃቶ፥ ጌላኦቶ፥
ጪማቶ፥ ናይቶ!
ኡባቲካ ኢዛ ጋላቲቴ።
13 ኢዛ ሱንꬂ ኡባ ቦላ ꬎቃ፤
ኢዛ ቦንቾይ
ሳኣፔኔ ሳሎፔ ቦላ፤
ሄሳ ጊሻስ ሃይቲ ኡባይ
ኢዛ ሱንꬅ ጋላቴቶ።
14 ኢዛ ባጋ ጊዲዳ ኢስራኤሌ ኣሳቲ
ኢዛ ጋላታና ማላ
ኢዚ ኢስታ ካጬ ኬሲዴስ።
ጎዳይ ጋላቴቶ!