22
ዳዊቲ ዛማሬታ ካቦስ ዬጺዳ ማዛሙሬ
1 ታ ጾሳዉ! ታ ጾሳዉ!
ታና ኣይስ ኣጋዲ?
ታና ማዳ ጋዳ
ታኒ ዋሲሺን
ኣይስ ሲዮንታ ኢጻዲ?
ታፔካ ኣይስ ሃካዲ?
2 ኣቤት ታ ጾሳዉ!
ጋላስ ኩሜꬅ
ታ ኔኮ ዋሲሺን
ኔ ሲያቤካ፤
ቃማ ኡባንካ ኔኮ
ዋሶፔ ሼምፓቤኬ።
3 ኔ ጊዲኮ ጌሻ ካዎ፤
ኢስራኤሌ ጋላታይ
ኔ ዩሾን ዴስ።
4 ካሴ ኑ ኣዋቲ
ኔናን ኣማኔቲዳ፤
ኔናን ኣማኔቲን
ኔ ኢስታ ኣሻዳሳ።
5 ኢስቲ ኔኮ ዋሲን ኣሻዳሳ፤
ኔናን ኣማኔቲን
ኢስታ ዬላሳቤካ።
6 ታኒ ጉጹኔ ኣቲን
ኣስ ጊዲኬ፤
ታኒ ኣሳን ካꬌቲዳዴኔ
ኢጼቲዳዴ።
7 ታና ቤኢዳ ኡባቲ ቂꬌቴስ፤
ዛሪዲካ ኢንጻርስ
ኬሲ ቂꬌቴስ፤
ባ ቆꬌካ
ታ ቦላ ቃꬄቴስ።
8 ሂስቲዲ፥ «ኢዚ ጎዳን
ኣማኔቲዴስ፤
ኣኔ ጾሲ ኢዛ ኣሾ፤
ኢዚ ኡፋዬቲዳ ጊዲኮ
ኣኔ ኢዛ ማዶ» ጌቴስ።
9 ጊዶ ኣቲን ታ ዎጋራ
ዬሌታና ማላ ማዲዳይ ኔና፤
ታኒ ታ ኣዪ ꬋንꬅ
ꬋሚሺንካ
ኔ ታስ ኣማኔታሳ።
10 ታኒ ዬሌቶሶፌ ዶማዳ
ኔናን ዲጫዲስ፤
ታ ኣዬይ ኡሎፔ ዶማዳካ
ኔኒ ታ ጾሳ።
11 ሜቶይ ታኮ
ማቲ ማቲ ዪዛ ጊሻስ፥
ታና ማዲዛይካ
ባይንዳ ጊሻስ
ኔኒ ታፔ ሃኮፋ።
12 ዳሮ ሞርኬቲ ኮርማ ቦራታ ማላ
ታና ጊዶꬂዳ፤
ቃይጪዛ ባሳኔ ቢታ
ቦራታ ማላ
ታና ዶዲዳ።
13 ሜንꬄሬꬂ ዬጊዲ
ጻጊዛ ጋሞ ማላ
ባ ዶና ታ ቦላ ዶይዳ።
14 ታኒ ሃꬃ ማላ ጎጋዲስ፤
ታ ሜቄꬃቲ
ሶሜፔ ሶሜፔ ኮሌቲዳ።
ታ ዎዚናይ ሙቃዳ ማላ
ታ ጊዶን ሴሪዴስ።
15 ታስ ቆꬌይ ኮንኣ ማላ ሜሊዴስ፤
ታ ኢንጻርሳይ
ጎንጊራꬃራ ኦይኬቲዴስ፤
ኔኒ ታና ሃይቂዳ ኣሳ ማላ
ጉዱላን ዬጋዳሳ።
16 ካናቲ ታና ጊዶꬂዳ፤
ኢታ ኣሳቲ ታና ዶዲ ኦይኪዳ፤
ታ ኩሼታኔ
ታ ቶሆታ ሺሺ ꬊሺኪዳ።
17 ታኒ ሜቄꬃታ
ቆዳና ዳንዳያይስ፤
ታ ሞርኬቲካ
ታና ጲርጺ ሂስቲ ጼሌቴስ።
18 ታ ማይኦዛ ጊሼቲ ኤኪዳ፤
ታ ኣዱሳ ማይኦዛን
ሳማ ዬጊዳ።
19 ኣቤት ጎዳዉ!
ኔኒ ሃኢ ታፔ ሃኮፋ።
ኣቤት ታ ዎልቃዉ!
ታና ማዳናስ ኤሶታ።
20 ታና ማሻፌ ኣሻ፤
ታ ሼምፖዮ
ዎልቃማ ካናታፔ ኣሻ።
21 ታና ጋሞታ ዶናፔ ኣሻ፤
ቃይጪዛ ሜንꬃ ካጬዛፔ
ታና ናጋ።
22 ታኒ ኔ ሱንꬃ
ታ ኢሻታስ ዮታና፤
ኢስቲ ሺቂዳሶንካ
ታ ኔና ጋላታና።
23 ኢንቴኖ ጎዳስ ያዪዛይቶ፥
ኢዛ ጋላቲቴ!
ኢንቴኖ ያቆቤ ዜሬꬃቶ!
ኡባይካ ኢዛ ቦንቺቴ!
ኢንቴኖ ኢስራኤሌ ዜሬꬃቶ!
ኡባቲካ ቦንቾን
ኢዛስ ያዪቴ!
24 ኢዚ ናቄቲዳይሳ ካꬊቤና፤
ሜቶቲሺን ዬጊ ኣꬊቤና፤
ባ ሲንꬃ ኢዛፔ
ጌንꬂቤና፤
ኢዚ ማዳርኪ ጊ ዋሲን
ኢዛ ዋሶ ሲዪዴስ።
25 ኔኒ ኦꬂዳ ሎኦ ኦሶ ጊሻስ፥
ዴሬይ ሺቂዳሶን ጋላታና፤
ታ ኣዲኒዳይሳ ኔና ያዪዛ
ኣሳ ሲንꬃን ጋꬃና።
26 ሂዬሳቲ ሚዲ ካላና።
ጎዳ ኮይዛይቲ ኢዛ ጋላታና።
ኢስቲ ሜርናስ ኡፋዬታና።
27 ሳኣ ጋጻ ጋካናስ ዲዛ ኣሳይ
ኢዛ ጊሻስ ዩሺ ቆፓና፤
ጎዳኮ ሲማና።
ኣሳ ዜሬ ኡባይ ኢዛስ ጎይናና።
28 ኣይስ ጊኮ ማታይ ኢዛሳ፤
ካዎቴꬃይ ኡባይ ኢዛስ ሃሬታና።
29 ሳኣ ቦላ ዲዛ ዱሬቲ
ኢዛስ ጎይናና።
ባና ሃይቆፔ ኣሻናዉ
ዳንዳዮንታ ቢታን
ባና ኣሲ ኡባይ
ኢዛ ሲንꬃን ጉልባታና።
30 ቡሮ ያና ዬሌታይ ኢዛስ ኦꬃና፤
ሄ ዬሌታይ ካሊ ዪዛ ዬሌታስ
ጎዳ ኦሶ ዮታና።
31 ኢስቲ ኢዛ ጺሎቴꬃ ጊሻስ
ቡሮ ያና ዬሌታስ ዮታና።