49
ቆሬ ናይቲ ዛማሬታ ካቦስ ዬጺዳ ማዛሙሬ
1 ዴሬዞ፥ ኢንቴ ኡባቲካ
ሃይሳ ሲዪቴ!
ኢንቴኖ ሳኣ ቦላ ዲዛ ኡባቶ!
ሃይሳ ኤዝጊቴ።
2 ꬎቃይኔ ዚቃይ፥
ዱሬይኔ ማንቆይካ ሲዪቴ።
3 ታ ዎዚና ቆፋይ ኣኬካ ኢሜስ፤
ታ ዶናይ
ኣꬎ ኤራቴꬃ ቃላ
ሃሳዬስ፤
4 ታኒ ታ ሃይꬅ
ሌሚሶታኮ ዛራና፤
ኢስታ ቢርሼꬃካ
ታ ዲꬃን ቆንጪሳና።
5 ሜቶ ጋላሲ ዪዛ ዎዴኔ
ኢታቴꬃን ታና ላቢዛይቲ
ዶዲ ኡቲኮ
ታ ኣይስ ባቦ?
6 ባ ኣቆታን ኣማኔቲዛይታሲኔ
ባ ዱሬቴꬃ ዳሮን
ጬቄቲዛይታስ ታ ኣይስ ባቦ?
7 ኣሲ ባርካ ባና ዎዜና፤
ዎይኮ ባ ሼምፖ ጊሻስ
ጾሳስ ዋጋ ቃንጻናስ
ዳንዳዬና።
8 ኣሳ ሼምፖ ዋጋይ
ኬሂፔ ኣልኦ፤
ሼምፖ ዱꬂዛ ዋጋይ
ሙሌካ ዴና።
9 ኣይ ዋጋ ቃንጺንካ
ኢዚ ሜርናስ ዴኣና ማላ፥
ዎይኮ ኢዚ ሃይቆንታ ማላ
ኦꬃናዉ ዳንዳዬና።
10 ኤያቲኔ ዳማቲ ሃይቂዛ ማላ
ኣꬎ ኤራንቻቲካ ሃይቃና፤
ኡባይካ ባ ኣቆታ
ሃራስ ዬጊ ባና፤
ሄሳ ኡባይካ ቤኣና።
11 ዳሮ ጋዴ
ኢስቲ ባ ሱንꬃን ሃሪኮካ
ኢስታስ ሜርና ኬꬃይ ዱፎ፤
ኢዚካ ኢስታስ
ዬሌታፔ ዬሌታ ጋካናዉ
ዱሳሶ ጊዳና።
12 ኣሲ ኣይ ዱሬቲኮካ
ባ ዱሬቴꬃራ ካንꬄና፤
ኢዚ ዶኣ ማላ ሃይቃና።
13 ባናን ኣማኔቲዛ
ኤያታ ቃዳይኔ
ኢስታ ቃላ ካሊዛይታ
ዉርሴꬃ ሳማይ ሃይሳ።
14 ሹካስ ቆሬቲዳ ዶርሳታ ማላ
ኢስቲ ዱፎስ ዶሬቲዳ፤
ሃይቆይ ኢስታ ሄንꬃንቻ
ጊዳና፤
ኢስቲ ባንታ ያሊሶ ኬꬃፌ
ሃኪዲ ዱፎን ሙሳና።
ሱሬ ኣሳቲ ማላዶራ
ኢስታ ዱፎ ቦላራ ሲሜሬታና።
15 ጊዶ ኣቲን ጾሲ
ታ ሼምፖ ዎዛና፤
ኢዚ ታና ሃይቆ ዎልቃፌ
ኣሺ ኤካና።
16 ኣሲ ዱሬቲዛ ዎዴኔ
ኢዛ ኣቆታይ ዳሪ ዳሪ ቢዛ ዎዴ
ኢዛዴስ ያዮፋ።
17 ጋሶይካ ኢዚ ሃይቂሼ
ኣይኮካ ኤኪ ቤና፤
ኢዛ ኣቆታይ ኢዛራ ኢሲፌ
ዱፎን ጌሌና።
18 ኣሲ ፓጻ ዲዛ ዎዴን፥
«ታስ ኩሚዴስ» ጊኮካ፥
ኡባይ ኢዛስ ጊጊዳ ጊሻስ
ጋላቴቲኮካ፥
19 ሲሚዲ ሙሌካ
ፖኦ ቤኦንታሶ
ባ ኣዋታ ማባራን ጋይቴስ።
20 ኣሲ ኤራቴꬂ ባይንዳ
ኣይ ዱሬቲኮካ
ኢዚ ዶኣ ማላ ሃይቃና።