5
ዳዊቲ ዛማሬታ ካቦስ ሱሱልኤን ዬጺዳ ማዛሙሬ
1 ኣቤት ጎዳዉ!
ታኒ ዮቲዛይሳ ኤዝጋ፤
ታ ኡንኦን ዎሲዛ
ዎሳካ ሲያ።
2 ታ ካዎዞ ጾሶ!
ታ ኔና ዎሲዛ ጊሻስ
ታና ማዳ ጋዳ
ታ ዋሲዛ ዋሶዛ ኔ ሲያ።
3 ኣቤት ጎዳዉ!
ማላዶ ማላዶ ጉራን
ኔኒ ታ ቃላ ሲያሳ።
ማላዶ ማላዶ ጉራን
ታኒ ታ ዎሳ
ኔ ሲንꬅ ሺሻዳ፥
ኔኒ ታስ ኢሚዛ ዛሮ
ኤካና ጋዳ ናጋይስ።
4 ኔኒ ኢታቴꬃን
ኡፋዬቶንታ ጾሳ፤
ኢታቲ ኔናራ ዴኤቴና።
5 ጬቄቲዛይቲ
ኔ ሲንꬃን ኤቄቴና፤
ኢታ ሚሽ ኦꬂዛ ኡባታ
ኔኒ ኢጻሳ።
6 ዎርዶ ሃሳይዛይታ
ኔኒ ꬋይሳሳ።
ሱꬅ ጉሲዛይታኔ
ጪሚዛ ኣሳታ
ኔኒ ሃራሴታሳ።
7 ጊዶ ኣቲን ታኒ ኔ ማሮ ዳሮን
ኔ ኬꬃ ጌላና።
ኔ ጌሻ ኬꬃኮ ሲማዳ
ቦንቾኒኔ ያሻቴꬃን
ኔስ ጎይናና።
8 ኣቤት ጎዳዉ! ታ ሞርኬታፔ
ኔ ታና ኣሻ፤
ታና ኔ ጺሎቴꬃንካ
ካሌꬃ፤
ኔ ኦጌ ታ ሲንꬃን ሱሪሳ።
9 ኢስታ ዶናፔ ኬዚዛ ቃላይ
ቱሙ ጊዴና።
ኢስታ ዎዚናንካ ጌኔይ ኩሚዴስ፤
ኢስታ ዶናይ
ዶዬቲዳ ዱፎ ማላ፤
ኢስቲ ባንታ ኢንጻርሳን
ኣስ ጪሜቴስ።
10 ኣቤት ጾሶ!
ኢስታ ቦላ ኔኒ ፒርዳ፤
ኢስታ ጌኔይ ኢስታ ኤኪ ቦ።
ኢስታ ናጋራይ ዳሮ፤
ሄሳ ጊሻስ
ኔኒ ኢስታ ጎዳ ዲጋ፤
ኣይስ ጊኮ
ኢስቲ ኔ ቦላ ጌላቲዳ።
11 ጊዶ ኣቲን ኔናን ዜምፒዳ
ኡባቲ ኡፋዬቴቶ፤
ኢስቲ ሜርናስ ኡፋይሳን ዬጼቶ።
ኔ ሱንꬃ ሲቂዛ
ኡባቲ ኡፋዬቴቶ፤
ኢስቲካ ኔናን ናጌቴቶ።
12 ኣቤት ጎዳዉ!
ኔኒ ጺሎታ ኣንጃሳ፤
ኔኒ ጎንዳሌን ካሚዛ ማላ
ኔ ኪያቴꬃን ኢስታ ካማሳ።