59
ሳኦሊ ዳዊቴ ዎꬋናስ ኪቲዳ ኣሳቲ ኢዛ ኬꬃ ዶዲ ኡቲዳ ዎዴ ዳዊቲ ዛማሬታ ካቦስ፥ «ꬋይሶፋ» ጌቴቲዛ ዲꬃ ጊጊሶን ሺሺዳ ዎሳ ማዛሙሬ
1 ኣቤት ታ ጾሳዉ!
ታ ሞርኬታፔ ታና ኣሻ፤
ታ ቦላ ዴንዲዛይታፔ ታና ናጋ።
2 ኢታ ኦꬂዛይታፔ
ታና ማዳ፤
ሱꬅ ጉሲዛ ኣሳታፔ
ታና ኣሻ።
3 ኣቤት ጎዳዉ!
ኢስቲ ታና ዎꬋናዉ
ዛማዲዲ ናጊዛይሳ ቤኣ!
ሜንጼ ኢታ ኣሳቲ
ታኒ ሞሮኔ
ናጋራ ኦꬆንታ ዲሺን
ታ ቦላ ዱላቴቴስ።
4 ኣይኮ ሞሮ ታ ኦꬆንታ ዲሺን
ታና ꬋይሳናስ ጊጌቲዳ፤
ሃይሳ ኔኒ ቤኣዳ
ታና ማዳና ዴንዳ።
5 ኣቤት ጎዳዉ!
ኡባፌ ዎልቃማ ጾሳዉ!
ኔኒ ኢስራኤሌ ጾሳ፤
ካዎቴꬃታ ኡባ
ቃጻያናስ ኔ ቤጋ፤
ማካላ ኦꬂዛይታ ማሮፓ።
6 ኢስቲ ካና ማላ ሆስካቲሼ
ካታማ ጊዶን ዩዪ ፔኢዲ
ኦማርስ ሲማና።
7 ኢስታ ዶናፔ ኬዚዛይሳ ሲዪቴ!
ኢስታ ኢንጻርሳይ ማሻ ማላ፤
ኢስቲ፥ «ኦኔ ኑና ሲያናይ?»
ጊ ቆፔቴስ።
8 ጊዶ ኣቲን ኣቤት ጎዳዉ!
ኔኒ ኢስታ ቦላ ሚጫሳ፤
ካዎቴꬃታ ኡባ ካꬋሳ።
9 ታ ጾሳዉ!
ኔ ታስ ሚጻ ጊዲዳ ጊሻስ
ታ ኔናን ኣማኔታይስ።
10 ታ ጾሳይ ባ ሜርና ሲቆን
ታናራ ጋይታና፤
ታ ሞርኬታ ኩንዴꬅ
ኢዚ ታና ቤሳና።
11 ኣቤት ኑስ ጎንዳሌ ጊዲዳ
ጎዳዉ! ታ ኣሳይ
ኔኒ ሃሎ ኬሲዛይሳ
ባሎንታ ማላ
ኔኒ ኢስታ ዎꬋ ꬋይሶፋ፤
ጊዶ ኣቲን ኔ ዎልቃን
ኢስታ ላላኔ ካዉሻ።
12 ኢስቲ ባንታ ዶናፔ
ኬሲዛ ናጋራ ጊሻስ፥
ባንታ ኢንጻርሳ ቃላ ጊሻስ፥
ኢስቲ ቃንጊዳ ቃንጌꬃ
ጊሻሲኔ
ዎርዶቲዛ ጊሻስ
ባንታ ኦቶሬቴꬃን ኦይኬቴቶ።
13 ኔ ሃንቆን ኢስታ ꬋይሳ፤
ኢስታ ሙሌራ ዲፒ ሂስታ፤
ሄ ዎዴ ጾሲ
ያቆቤ ዜሬꬃ
ኣይሲዛዴኔ
ሳኣ ጋጻ ጋካናስ ዲዛ ዴራ
ሃሪዛዴ ጊዲዳይሳ
ኣሲ ኡባይ ኤራና።
14 ኢስቲ ካና ማላ ሆስካቲሼ
ካታማ ጊዶን ዩዪ ፔኢዲ
ኦማርስ ሲማና።
15 ኢስቲ ሚዛ ሚሽ ሃሲሼ ዩዬቴስ፤
ካሎንታ ኣጊኮ
ካና ማላ ላዌቴስ።
16 ጊዶ ኣቲን ታኒ
ኔ ዎልቃ ሳባና፤
ማላዶ ማላዶ
ኔ ሜርና ሲቆ ጊሻስ
ዬጻና።
ኔኒ ታስ ሜቶ ጋላስ
ዜምፖኔ ባቃታ ኣቲዛ ሚጻ።
17 ኣቤት ጾሳዉ!
ታ ዎልቃይ ኔና፤
ኔ ታስ ሚጻ፤
ኔ ሜርና ሲቆን ታና ሲቃሳ፤
ሄሳ ጊሻስ ጋላታ ዬꬃን
ታ ኔና ሳባና።