78
ኣሳፌይ ሃሳኣን ሺሺዳ ጊንጾ
1 ታ ዴሬዞ ታ ኔና
ታማርሲዛይሳ ሲያ፤
ታ ዶናፔ ኬኢዛ ቃላ ኤዝጋ።
2 ታኒ ሃሳይዛ ሃሳያ
ሌሚሶን ዶማይስ፤
ቤኒሶፌ ቆታን ዲዛ
ጹራ ዮኦ ቆንጪሳይስ።
3 ኑ ሲዪዳይሲኔ
ኑ ኤሪዳይሲ፥
ኑ ኣዋቲካ ኑስ ዮቲዳይሳ።
4 ሄ ዮኦታ ኑኒ
ኢስታ ናይታፔ ቆቶኮ፤
ጎዳስ ቤሲዛ ጋላታ፥
ኢዛ ዎልቃኔ
ማላሊሲዛ ኢዛ ኦሶ
ዪዛ ዬሌታታስካ
ኑኒ ዮታና።
5 ኢዚ ያቆቤ ዛሬታስ ኣዛዞ፥
ኢስራኤሌ ኣሳስ ዎጋ ኢሚዴስ፤
ባንታ ናይታ ሄ ዎጋታ
ታማርሳና ማላ ኣዛዚዴስ።
6 ሄሲካ ካሊዛ ዬሌታይ
ኢስታ ኤራናሳ፤
ቃሴካ ቡሮ ዬሌታና
ናይቲ ኤራናሳኔ
ኢስቲካ ባንታ ናይታስ ዮታናሳ።
7 ሄ ናይቲካ ጾሳን ኣማኔታና፤
ኢዚ ኦꬂዳ ኦሶካ ዶጌቴና፤
ኢዛ ኣዛዞታካ ኢስቲ ናጋና።
8 ኢስቲ ካሴ ባንታ ኣዋታ ማላ
ዎዚና ሙሜኔ
ማካላንቻ ጊዴቴና፤
ኢስቲ ጾሳ ሲንꬃን
ሱሬ ጊዴቴና፤
ጾሳስካ ኣማኔቲቤቴና።
9 ኤፍሬሜ ናይቲ ኦላስ
ዎንዳፌኔ ዪሽ ጊግሲ ኬዚዳ፤
ጊዶ ኣቲን ኦላ ጋላስ ጉዬ ሲሚዳ።
10 ኢስቲ ጾሳ ጫቆ ቃላ
ናጊቤቴና፤
ኢዛ ዎጋ ማላ ዶንታ ኢጺዳ።
11 ኢስቲ ኢዚ ኦꬂዳ ኦሶ ባሊዳ፤
ኢዚ ኢስቲ ቤሲዳ
ማላሊሲዛ ሃኖታካ ዶጊዳ።
12 ኢዚ ኢስታ ኣዋቲ ቤኢሺን
ጊብጼ ቢታን
ጻኖሴ ዴምባን
ማላታ ኦꬂዴስ።
13 ኣባ ሻኪዲ ጊዶራ
ኢስታ ፒንꬂዴስ፤
ኢዚ ሃꬃ ያኔ
ሃ ሻኪዲ
ጎዳ ማላ ኤሲዴስ።
14 ኢዚ ኢስታ ጋላስ ሻራን፥
ኦማርስ ታማ ፖኦን
ካሌꬂዴስ።
15 ኢዚ ባዞን ዛላ ጳልቂዲ
ኣባ ማላ ዳሮ ሃꬅ
ኢስታ ኡሺዴስ።
16 ዛላፌ ሃꬅ ፑልቲሲዲ
ሻፋ ማላ ዱጌ ጎጊሲዴስ።
17 ጊዶ ኣቲን ኢስቲ ኢዛ ቦላ
ናጋራ ኦሶ ጌዴ ጉጂዳ፤
ኡባፌ ꬎቃ ጾሳ ቦላ
ባዞን ማካሊዳ።
18 ኢስቲ ኬሂ ኣሞቲዳ
ካꬅ ኦይቺዳ፤
ኤሪሼ ባ ዎዚናን
ጾሳ ፓጪዳ።
19 ኢስቲ ጾሳ ቦላ፥
«ባዞን ጾሲ
ኑስ ማና ካꬅ
ኢማና ዳንዳይዜ?
20 ዛላ ሾጪን ፑልቶይ ኬኢዲ
ሻፋ ሃꬂ ጎጊዴስ፤
ሂስቲን ኢዚ ኑስ ሚዛ ካꬅ
ኢማናዉ ዳንዳይዜ?
ዎይኮ ባ ኣሳስ
ኣሾ ኢማናዉ
ዳንዳይዜ?» ጊ ሃሳይዳ።
21 ጎዳይ ሄሳ ሲዪዳ ዎዴ
ኢስታ ቦላ ዳሮ ሃንቄቲዴስ፤
ያቆቤ ዛሬታ ቦላ
ታማይ ኤጺዴስ፤
ኢስራኤሌ ቦላ ኢዛ ሃንቆይ
ዳሪ ዳሪ ቢዴስ።
22 ኣይስ ጊኮ ኢስቲ
ጾሳን ኣማኒቤቴና፤
ኢዚ ኣሺዛይሳካ
ኣማኔቲቤቴና።
23 ኢዚ ጊዲኮ ቦላፌ ሻራ ኣዛዚዴስ፤
ሳሎ ፔንጌታካ ዶይዴስ።
24 ኢስቲ ማና ማላ ኢስታስ
ማና ቡኪሲዴስ፤
ሳሎፔ ካꬅ ኢስታስ ኢሚዴስ።
25 ኪታንቻታ ካꬅ ኣሳይ ሚዴስ፤
ጾሲ ኢስቲ ካሊ ሚን
ቲርፒ ኣቲዛ ካꬅ ኢሚዴስ።
26 ኣርሼይ ሞኪዛ ባጋራ ሳሎፔ
ጫርኮይ ጫርካና ማላ ኦꬂዴስ፤
ባ ዎልቃን ዱጌሃ ባጋ
ጫርኮ ዴንꬄꬂዴስ።
27 ኢዚ ኣሳስ ኣሾ ጉዱላ ቢታ ማላ፥
ኣባ ዶናን ዲዛ ኣጬ ማላ
ዳሮ ፒራꬊዛ ካፎታ ዬዲዴስ።
28 ኢስቲ ዱንካኒ ኡቲዳሶ
ዱንካና ዩሾን ዎꬊዳ።
29 ኢስቲ ኣሞቲዳይሳ
ኢስታስ ኢሚዴስ፤
ኢስቲካ ካሊ ሚዳ።
30 ጊዶ ኣቲን ኢስቲ
ባ ሞሳ ኣꬆንታ
ቡሮ ሙሳ ቦላ ዴኢሺን፥
31 ጾሳ ሃንቆይ
ኢስታ ቦላ ዎꬊዴስ፤
ኢስታ ጊዶፌ
ሚኖ ኣሳታ ዎꬊዴስ፤
ኢስራኤሌፔ
ፓያ ናቴꬃታ ሙልቂዴስ።
32 ሃይሲ ኡባይ ሃኒንካ
ኢስቲ ናጋራ ኦꬂዛይሳ
ኣጊቤቴና፤
ማላሊሲዛ ኢዛ ኦሶታካ
ቤኢዲ ኣማኒቤቴና።
33 ሄሳ ጊሻስ ኢዚ ኢስታ ላይꬃታ
ፔኖ ማላ ኣꬂዴስ፤
ኢስቲ ዲዛ ዎዴታ
ሂርጋን ዉርሲዴስ።
34 ጾሲ ኢስታፌ ጉꬃታ ዎꬊን
ኣቲዳይቲ ባ ናጋራ ፓጺዳ፤
ዎዚናፔ ኮዪሼ
ጾሳኮ ሲሚዳ።
35 ኢስቲ ጾሲ ኢስታስ
ዛላ ጊዲዳይሳኔ
ኡባፌ ꬎቃ ጾሲ
ኢስታ ዎዚዳይሳ ሃሳኢዳ።
36 ጊዶ ኣቲን ኢስቲ ባንታ
ኢንጻርሳን ኢዛስ ዎርዶቲዲ
ባንታ ዶናን ጪሚዳ።
37 ኢስታ ዎዚናይ
ጾሳን ሚኒ ኤቂቤና፤
ኢዚ ኢስታራ ጫቄቲዳ
ጫቆን ኣማኔቲቤቴና።
38 ጊዶ ኣቲን ኢዚ ኢስታ
ማሪዛዴ ጊዲዳ ጊሻስ
ኢስታ ኢታቴꬃ ኣቶ ጊዴስ፤
ኢስታካ ꬋይሲቤና፤
ዳሮ ዎዴ ባ ሃንቆዛ
ኢስታ ቦላፌ ቴቂዴስ፤
ባ ሃንቆዛ ቦሻ ኡባ
ኢስታ ቦላ ዬዲቤና።
39 ኢሲኖ ጫርኪ ኣꬊዳፔ ጉዬ
ሲሞንታ ጫርኮ ማላ
ኣሾ ማይኢዳ ኣስ
ጊዲዳይሳ ኣኬኪዴስ።
40 ኢስቲ ባዞን ኣፑንቶ
ኢዛ ቦላ ማካሊዶ!
ሜላ ባዞን ኣፑንቶ
ኢዛ ላንጪሲዶ!
41 ኢስቲ ዛሪ ዛሪዲ ጾሳ ፓጪዳ፤
ኢስራኤሌ ጌሻ
ማዱንꬂዳ።
42 ኢዚ ኢስታ ሞርኬታፔ
ዎዚዳ ጋላሳታኔ
ኢዛ ዎልቃ ዶጊዳ።
43 ኢዚ ጊብጼ ቢታን ማላታ፥
ጻኖሴ ዴምባን ማላሊሲዛዝ
ኦꬂዳይሳ ቆፒቤቴና።
44 ኢስታ ሻፋ ሃꬃ
ሱꬃን ላሚዴስ፤
ሄሳ ጊሻስ ጊብጼ ኣሳቲ
ሄ ሻፋታፔ
ኡያናስ ዳንዳይቤቴና።
45 ኢስታ ኦላናስ ኡዱንጼታኔ
ኢስታ ቢታ ꬋይሳናስ
ሾꬌታ ኪቲዴስ።
46 ኢስታስ ሞኪዳ ካꬃ ጉምባሮስ፤
ኢስቲ ኦꬂ ዳቡርዳ ካꬃ
ቦሌስ ኢሚዴስ።
47 ኢስታ ዎይኔ ቱራ ሻቻን፥
ኢስታ ባላሴ ሚꬃታካ
ኬንቾን ꬋይሲዴስ።
48 ኢስታ ሚዛታ ሻቻን ዎꬊዴስ፤
ኢስታ ሜሄታ ዎልቃንꬃን
ጹጊ ዉርሲዴስ።
49 ባ ሚኖ ሃንቆ፥ ቦሻ፥ ባሺኔ
ꬋይሲዛ ኪታንቻታን
ኢስታ ቦላ ዬዲዴስ።
50 ባ ሃንቆዛስ ኦጌ ጊግሲዴስ፤
ኢስታ ኢታ ሃርጌስ
ኣꬂ ኢሚዴስ፤
ጊዶ ኣቲን ሃይቆፔ
ኣሺቤና።
51 ጊብጼን ዬሌቲዳ ባይራ ናይታ
ኡባ ዎꬊዴስ፤
ካሜ ዱንካኔን
ኮይሮ ዬሌቲዳ
ናይታ ዉርሲዴስ።
52 ጊዶ ኣቲን ኢዚ ባ ኣሳ
ዶርሳ ማላ ኬሲ ሄሚዴስ፤
ዉዴ ማላ ባዞን ካሌꬂዴስ።
53 ኢዚ ኢስታ ሳሮን ካሌꬂዴስ፤
ኢስቲካ ሂርጊቤቴና፤
ኢስታ ሞርኬታ ጊዲኮ
ኣባይ ሚቲዴስ።
54 ሂስቲዲ ባ ጌሻ ቢታ፥
ባ ኡሻቻ ኩሼን
ጾኒ ኦይኪዳ
ዙማ ኤፊዴስ።
55 ኢዚ ኢስታ ሲንꬃፌ
ካዎቴꬃ ጎዲዲ
ኢስታ ቢታ ኢስራኤሌ ዛሬታስ
ጊሼሬꬂ ኢሚዲ
ኢስታ ላቲሲዴስ፤
ኢስራኤሌ ኣሳ
ኢስታ ሞርኬታ ኬꬃን
ዎꬂዴስ።
56 ኢስቲ ጊዲኮ ኡባፌ
ꬎቃ ጾሳ ቦላ ማካሊዳ፤
ኢዛ ፓጪዲ ኢዛ ዎጋታካ
ናጎንታ ኢጺዳ።
57 ኢስቲ ቤኒ ባንታ ኣዋታ ማላ
ማካላንቻታኔ
ካዲዛይታ ጊዲዳ፤
ኣማንꬆንታ ቦካ ቶማን
ኤቂዳ ቶራ ማላ ጊዲዳ።
58 ኢስቲ ጎይኒዛ ꬎቃሶሆታን
ኢዛ ዪሎቺዳ፤
ባንታ ኤቃ ጾሳታን
ኢዛ ቃናቲሲዳ።
59 ሂስቲን ጾሲ ሄሳ ሲዪዲ
ኬሂ ሃንቄቲዴስ፤
ኢስራኤሌ ሙሌራ
ዬጊ ኣጋጊዴስ።
60 ኣሳ ጊዶን ኢዚ ቶኪዳ ዱንካና
ሴሎን ባ ዲዛሶዛ
ዬጊ ኣጊዴስ።
61 ጾሳ ዎልቃሲኔ
ቦንቾስ ማላታ ጊዲዳ
ታቦታ ሞርኬታ ኩሼን
ኣꬂ ኢሚዴስ።
62 ኢዚ ባ ዴራ ቦላ ሃንቄቲዴስ፤
ኢስታ ጊꬃ ማሻስ
ኣꬂ ኢሚዴስ።
63 ኢስታ ፓንꬃታ ታማይ ሚዴስ፤
ሂስቲን ኢስታ ጌላኦቲ
ኣዚና ጌሎንታ ኣቲዳ።
64 ኢስታ ቄሴቲ ማሻን ዉሪዳ፤
ኢስታ ማቼቲካ
ዬካናስ ዳንዳይቤቴና።
65 ሄሳፌ ጉዬ ጎዳይ
ꬊስኮፌ ቤጊዛ ማላ
ቤጊዴስ፤
ዎይኮ ዎይኔ ኡሹ ኡዪ
ማꬆቲዳ ቃራይ ማꬆፌ
ቤጊዛ ማላ ዴንዲዴስ።
66 ኢዚ ባ ሞርኬታ ሾጪዲ
ጉዬ ዛሪዴስ፤
ኢስቲ ሜርናስ ዬላታና ማላ
ኦꬂዴስ።
67 ዮሴፌ ዱንካኔ ካꬊዴስ፤
ኤፍሬሜ ቆሞታ ዶሪቤና።
68 ጊዶ ኣቲን ኢዚ ዩሁዳ ዛሬኔ
ባ ሲቂዛ ጺዮኔ
ዙማ ዶሪዴስ።
69 ሄሳን ኢዚ ጾሳ ኬꬃ
ሳሎ ኬሲ ꬎቃን ኬጺዴስ፤
ሳኣ ማላ ሜርናስ ኤሲዴስ።
70 ባ ኣይሌ ዳዊቴ ዶሪዲ
ዶርሳ ዉዴ ሄሚዛሶሆፔ
ኤኪዴስ።
71 ኢዛ ዶርሳታ ሄሚዛሶሆፔ
ኬሲዲ ባ ዴሬ ያቆቤኔ
ባ ጺንጾ ኢስራኤሌ
ሄንꬃንቻ ኦꬂዴስ።
72 ሂስቲን ዳዊቲካ ኢስታ
ሱሬ ዎዚናን ሄሚዴስ፤
ቃሴካ ሂላን
ኢስታ ካሌꬂዴስ።