80
ዛማሬታ ካቦስ «ጪሻ» ጌቴቲዛ ዲꬃ ጊጊሶን ማርካቴꬃስ ዬጼቲዳ ኣሳፌ ማዛሙሬ
1 ኣቤት ኢስራኤሌ ሄንꬃንቻዉ!
ዮሴፌ ናይታ
ዉዴ ማላ ካሌꬂዛይሶ!
ኔኒ ኑ ዎሳ ሲያ፤
ኪሩቤታ ቦላራ ዲዛ
ኣራታን ኡቲዳይሶ!
ኔ ፖኦን ቆንጫ።
2 ኤፍሬሜ፥ ቢኒያሜኔ ሚናሴ
ሲንꬃን ቆንጫ ቤታ፤
ኔ ዎልቃ ዴንꬃዳ
ያዳ ኑና ኣሻ።
3 ኣቤት ጾሳዉ!
ኑና ዛራ፤
ኑኒ ኣታና ማላ
ኔ ኣይፌሶ ኑስ ፖኢሳ።
4 ኣቤት ጎዳዉ
ኡባፌ ዎልቃማ ጾሳዉ!
ኔ ኣሳ ዎሳ ቦላ
ኣዉዴ ጋካናስ
ኔ ሃንቄታኔ?
5 ኔኒ ኢስታ ዬሆ
ቁማ ማላ ሚዛዳሳ፤
ቃሴ ኣፉንꬃ
ሃꬃ ማላ ኡሻዳሳ።
6 ኑ ሾሮቲ ኑ ቢታ ኤካናስ
ባንታ ጊዶን ኦዬታና ማላ
ኦꬃዳሳ፤
ኑ ሞርኬቲካ
ኑ ቦላ ሚጪዳ።
7 ኣቤት ኡባፌ
ዎልቃማ ጾሳዉ!
ኑና ዛራ፤
ኑኒ ኣታና ማላ
ኔ ኣይፌሶ ኑስ ፖኢሳ።
8 ኔኒ ጊብጼፔ ዎይኔ ኣኖ ኤሃዳሳ፤
ካዎቴꬃታ ዬዴꬃዳ
ኢስታ ቢታን ኢዞ ቶካዳሳ።
9 ኔኒ ኢዚስ ቢታ ቄጻ ጊጊሳዳሳ፤
ሂስቲን ጻጶ ዬዳዳ
ቢታ ኡባ ጋካዱስ።
10 ዙማቲ ኢዚ ኩዋን፥
ሊባኖሴ ዚጋቲ
ኢዚ ሃጋታን ካሜቲዳ።
11 ባ ሃጋታ ሜዲቴራኔ
ኣባ ጋካናስ
ቃሴ ባ ጼራታ ኤፊራጺሴ
ሻፋ ጋካናስ ዬዳዱስ።
12 ሂስቲን ኦጌራ ኣꬊዛ ኡባይ
ኢዚ ኣይፌ ዱꬂ ማና ማላ
ኢዚ ዩሾዛን ዲዛ ጊምቤዛ
ኣይስ ላላዲ?
13 ባዞ ጉዱንꬂ
ኢዚ ቦላ ዱሪ ካኤስ፤
ቃሴ ዎራ ዶኣቲ
ኡባይ ኢዞ ሜቴስ።
14 ኣቤት ኡባፌ
ዎልቃማ ጾሳዉ!
ኔኒ ኑኮ ሲማ፤
ሳሎራ ዱጌ ጼላዳ ኑና ቤኣ፤
ሃኖ ዎይኔ ሚꬃዮ ናጋ።
15 ኢዛ ኔ ኡሻቻ ኩሼይ
ቶኪዳ ፑቴ፤
ኔኒ ኔስ ጋዳ ዲቺዳ ኣጫ።
16 ሞርኬቲ ኔ ዎይኔ ቄጺዲ
ታማን ጹጊዳ፤
ሄሳ ጊሻስ ኔኒ ኢስታ
ኔ ሃንቆዛ ሱሌን ꬋይሳ።
17 ኔ ኩሼይ
ኔ ኡሻቻ ባጋራ ዲዛ ኣሳ
ኔኒ ኔስ ዲቺዳ ኣሳ ናጎ።
18 ሃይሳፌ ጉዬ ኑኒ
ኔና ኣጊዲ ጉዬ ሲሞኮ፤
ኑና ሼምፖራ ፓጻ ዎꬃ፤
ኑኒካ ኔና ጋላታና።
19 ኣቤት ኡባፌ
ዎልቃማ ጾሳዉ!
ኑና ዛራ፤
ኑኒ ኣታና ማላ
ኔ ኣይፌሶ ኑስ ፖኢሳ።