89
ኤዚራኤሌ ኣስ ኤታኔይ ሃሳኣ ጊንጾን ሺሺዳ ቲሚርቴ
1 ኣቤት ጎዳዉ!
ኔ ሜርና ሲቆ ጊሻስ
ታኒ ሜርናስ ዬጻና፤
ኔ ኣማኔቴꬃ
ዬሌታ ኡባስ ታ ኣዋጃና።
2 ታኒ ኔ ሜርና ሲቆይ
ሜርናስ ኤቂዳይሳኔ
ኔኒ ኔ ኣማኔቴꬃ ሳሎን
ሚንꬃዳ ኤሲዳይሳ ዮታና።
3 ኔኒ፥ «ታኒ ዶሪዳይሳራ
ጫቆ ቃላ ጌላዲስ፤
ታ ኣይሌ ዳዊቴስ፥
4 ‹ታኒ ኔ ዛሬታ
ሜርናስ ካዎሳና፤
ኔ ካዎቴꬃ ኣልጋ
ዬሌታ ኡባስ ሚንꬃና›
ጋ ጫቃዲስ» ጋዳሳ።
5 ኣቤት ጎዳዉ!
ሳሎቲ ኔኒ ኦꬂዳ ማላሊሲዛ
ኦሶታ ኣዋጄቴስ፤
ጌሻታ ዱላታይ
ኔ ኣማኔቴꬃ ሳቤስ።
6 ሳሎን ጎዳራ
ሊኬታናስ ዳንዳይዛይ ኦኔ?
ሳሎ ሜꬌቴꬃታ ጊዶንካ
ጎዳ ማላይ ኦኔ?
7 ጌሻታ ሺቆን
ጾሲ ያሺሲዛዴ፤
ባ ዩሾን ዲዛ ኡባፌ
ኬሂ ያሺሲዛዴ።
8 ኣቤት ጎዳዉ!
ኡባፌ ዎልቃማ ጾሳዉ!
ኔ ማላ ዎልቃማይ ኦኔ?
ኣቤት ጎዳዉ!
ኔኒ ኡባ ሚሻን
ኣማኔቲዳዴ።
9 ኔ ቡልኣኬቲዛ ኣባ ሴራሳ፤
ኣባ ዳምባላካ
ጮኡ ኦꬃሳ።
10 ኔኒ ኤራኣቤ ጌቴቲዛ
ኣባ ዶኣዛ ቆጼሬꬃ
ዎꬋዳሳ፤
ኔ ሞርኬታ
ኔ ዎልቃማ ቄሴን ላላዳሳ።
11 ሳሎቲ ኔይታ፤
ሳኣይካ ኔሳ፤
ቢታኔ ኢዛን ኩሚዳ ኡባ
ኔኒ ሜꬋዳሳ።
12 ፑዴሃኔ ዱጌሃ
ኔኒ ሜꬋዳሳ፤
ታቦሬኔ ሄርሞኔ ዙማቲ
ኡፋይሳን ኔ ሱንꬃን
ዬጼቴስ።
13 ኔስ ዎልቃማ ቄሴይ ዴስ፤
ኔ ቄሴይ ሚኖ፤
ኔ ኡሻቻ ቄሴይ ያሼስ።
14 ጺሎቴꬂኔ ሱሬ ፒርዳይ
ኔ ካዎቴꬃ ኣራታስ ዮቻ፤
ማሮቴꬂኔ ኣማኔቴꬂ
ኔፔ ሲንꬃራ ቤቴስ።
15 ኣቤት ጎዳዉ!
ኢሊሊሳን ኔና ሳቢዛይቲኔ
ኔ ፖኦን ሄሜቲዛይቲ
ኣንጄቲዳይታ።
16 ኔ ሱንꬃን ኩሜꬃ
ጋላስ ኡፋዬቴቴስ፤
ኔ ጺሎቴꬃ ጊሻስ
ኢስቲ ኔና ꬎቁ ꬎቁ
ሂስቴቴስ።
17 ኢስቲ ጬቄቲዛ ዎልቃይ ኔና፤
ኔ ቴማን ኢስታ ካጬይ
ꬎቁ ꬎቁ ጌስ።
18 ኑ ጎንዳሌይ ጎዳ ኩሼና፤
ኑ ካዎይካ
ኢስራኤሌ ጌሻ ኩሼና።
19 ቤኒ ኔኒ ኔ ኣማኔቲዳ
ኣሳታስ ኣጁታን፥
«ታኒ ኦላ ቃራ ማዳዲስ፤
ዴራ ጊዶፌ ዶሬቲዳ ዬላጋ
ꬎቁ ꬎቁ ሂስታዲስ።
20 ታ ኣይሌ ዳዊቴ ዴማዲስ፤
ታ ጌሻ ዛይቴንካ ቲያዳ
ኢዛ ካዎꬃዲስ።
21 ታ ኩሼይ ኢዛ ማዳና፤
ታ ቄሴይካ ኢዛ ሚንꬃና።
22 ኢዛ ኣይ ሞርኬይ ሃሪዲ ጊሪሴና፤
ኣይ ኢታ ኣሲካ ኢዛ ቆሄና።
23 ታኒ ኢዛ ሞርኬታ
ኢዛ ሲንꬃን ቲንቼሬꬃና፤
ኢዛ ኢጺዛይታካ ሾጫ
ኒፊፊ ሂስታና።
24 ታ ኣማኔቴꬃይኔ
ታ ሜርና ሲቆይ
ኢዛራ ኢሲፌ ጊዳና፤
ታ ሱንꬃን ኢዛ ካጬይ
ꬎቁ ꬎቁ ጋና።
25 ታኒ ኢዛ ካዎቴꬃ
ሜዲቴራኔ ኣባ
ጋካናስ ኣሳና።
ኢዛ ዛዋካ ኤፊራጺሴኔ
ጼግሮሴ ሻፋታ
ጋካናስ ኣሳና።
26 ዳዊቲ ታና፥
‹ኔኒ ታ ኣዋ፤
ታ ጾሳኔ
ታና ኣሺዛ ዎጋ ዛላ›
ጊ ጼይጋና።
27 ታኒ ኢዛ ታስ ባይራ ና ሂስታና፤
ሳኣን ዲዛ ካዎታ ኡባፌ
ታ ኢዛ ጊታሳና።
28 ታኒ ታ ሲቆ
ኢዛስ ሜርናስ ናጋና፤
ታኒ ኢዛስ ጌሊዳ
ጫቆ ቃላ ሚንꬃና።
29 ታኒ ኢዛ ዛሬታ
ሜርናስ ሚንꬃ ኤሳና፤
ኢዛ ካዎቴꬃ ኣራታካ
ሳሎ ማላ ሜርናስ
ሚንꬃ ቶካና።
30 «ጊዶ ኣቲን ኢዛ ዜሬꬃቲ
ታ ዎጋ ኣጊኮ፥
ቃሴ ኢስቲ ታ ኣዛዞካ
ናጎንታ ኢጺኮ፥
31 ኢስቲ ታ ዎꬂዳ
ማራ ሞሪኮ፥
ታ ኣዛዞካ ቦንቾንታ ኢጺኮ፥
32 ታኒ ኢስታ ናጋራ ጊሻስ
ኢስታ ጉፌን ቃጻያና፤
ኢስታ ሞሮ ጊሻስ
ኢስታ ጹርቃፌን ሾጫና።
33 ጊዶ ኣቲን ታኒ ታ ሲቆ
ኢዛፔ ሃሲኬ፤
ዎይኮ ታ ኣማኔቴꬅ
ኢዛስ ፓጪንቺኬ።
34 ታኒ ጫቂዳ ጫቆ ቃላ ሚኬ፤
ታ ዶናፔ ኬኢዳ
ቃላ ላሚኬ።
35 ታኒ ኢሲቶ ታ ጌሻ ሱንꬃን
ጫቂዳ ቃላ
ዳዊቴስ ዎርዶቲኬ።
36 ኢዛ ዛሬቲ ሜርናስ ሚኒዲ ዳና፤
ኢዛ ካዎቴꬃ ኣልጋይካ
ኣዋ ኣርሼ ማላ
ታ ሲንꬃን ሜርናስ ዳና።
37 ሳሎ ቦላ ኣማኔቲዳ ማርካ
ጊዳዳ ዲዛ ኣጊና ማላ
ኢዚ ሜርናስ ሚኒ ዳና» ጋዳሳ።
38 ጊዶ ኣቲን ሃኢ ኔኒ
ቲያዳ ካዎꬂዳይሳ
ቦላ ኬሃ ሃንቄታዳሳ፤
ኢዛ ካꬋዳሳኔ
ዬጋ ኣጋዳሳ።
39 ኔኒ ኔ ኣይሌዛስ
ጫቂዳ ጫቆ ቃላ ላላዳሳ፤
ኢዛ ካላቻ
ባናን ኦላዳ ቱኒሳዳሳ።
40 ኔኒ ካታማ ጊምቤዛ
ኡባ ላላዳሳ፤
ኢዛ ሚጻ ኡባ ꬋይሳዳሳ።
41 ኦጌራ ኣꬊዛ ኡባቲ
ኢዛ ቦንቂዳ፤
ኢዚ ባ ሾሮታስ ቂꬌስ ኣቲዴስ።
42 ኔኒ ኢዛ ሞርኬታስ ኡሻቻዳሳ፤
ኢስታ ኡባ ኡፋይሳዳሳ።
43 ኔኒ ኢዛ ማሻ
ቃራዛ ዱንኢሳዳሳ፤
ኦላንካ ኢዛ ማዳቤካ።
44 ኔኒ ኢዛ ካዎቴꬃ ጉፋ
ኢዛ ኩሼፔ ዎꬃ ኤካዳሳ፤
ቃሴ ኢዛ ካዎቴꬃ
ኣራታ ቢታን ኦላዳሳ።
45 ኔኒ ኢዛ ዬላጋቴꬃ
ላይꬃ ቃንꬃዳሳ፤
ዬላካ ማይዛዳሳ።
46 ኣቤት ጎዳዉ!
ኣዉዴ ጋካናስ
ኔና ጌንꬃኔ?
ኔኒ ሜርናስ ጌማኔ?
ኔ ሃንቆይ ታማ ማላ
ኣዉዴ ጋካናስ ኤጻኔ?
47 ታ ላይꬃይ ኣይ ኬና
ቃንꬃኮ ቆፓ፤
ኔ ኣሳ ና ጮ ሃዳ ሜꬋዲ!
48 ኣሲ ሃይቆንታ ሜርናስ
ሼምፖራ ፓጻ ዳናስ
ዳንዳይዜ?
ቃሴ ዱፎን ጌሎንታ ማላ
ባና ኣሻናስ ዳንዳይዛ
ኣሲ ዲዜ?
49 ኣቤት ጎዳዉ!
ዳዊቴስ ኔ ኣማኔቴꬃን
ጫቂዳ ጫቆይኔ
ካሴ ኔ ሜርና ሲቆይ
ኣዋን ዲዜ?
50 ኣቤት ጎዳዉ!
ታኒ ኔ ኣይሌይ
ኣይ ማላ ቦሬቲዳኮ
ኔኒ ሃሳያ፤
ታኒ ኣሳ ኡባ ቦሬዛ
ዎስታ ዳንዳይዳኮ
ኣኔ ኔ ቆፓ።
51 ኣቤት ጎዳዉ! ኔ ሞርኬቲ
ኔ ዶራዳ ቲይዳ
ካዎዛ ጫዪዛይሳ፥
ኢዚ ቢዳሶ ኡባን
ኢዛ ቂልጪዛይሳ ቆፓ።
52 ጎዳይ ሜሪ ሜርናስ ጋላቴቶ!
ኣሚን! ኣሚን።