92
ሳምባታ ጋላስ ዬጼቲዛ ማዛሙሬ
1 ጎዳ ጋላቶይ ሎኦ፤
ኣቤት ኡባፌ
ꬎቃ ጾሳዉ!
ኔ ሱንꬃስ
ማዛሙሬ ሺሾይ ሎኦ።
2 ማላዶ ኔ ሜርና ሲቆ፥
ጊዶꬅ ኔ ኣማኔቴꬅ
ኣዋጃይ ሎኦ።
3 ታሙ ሻያን ዋጼቲዳ
ባጋናኒኔ
ማሲንቆ ዲጺሼ ኣዋጃይ ሎኦ።
4 ኣቤት ጎዳዉ!
ኔ ኦꬂዳ
ዎልቃማ ኦሶቲ
ታና ኡፋይሲዳ፤
ኔ ኩሼይ ኦꬂዳ ጊሻስ
ታኒ ኡፋይሳን ዬጻይስ።
5 ኣቤት ጎዳዉ!
ኔ ኦሶይ ኣይ ኬና ጊታ!
ኔ ቆፋይካ ኣይ ኬና ጪማ!
6 ሄሳ ኤያ ኣሲ ኤራናዉ ዳንዳዬና፤
ዳማ ኣሲካ
ኣኬካናዉ ዳንዳዬና።
7 ኢታቲ ማታ ማላ ዲጪኮካ፥
ጌኔ ኦꬂዛ ኡባቲ ጪይኮካ
ኢስቲ ሜርናስ ꬋያና።
8 ጊዶ ኣቲን ኣቤት ጎዳዉ!
ኔኒ ሜርናስ ኡባፌ ꬎቃ።
9 ኣቤት ጎዳዉ!
ኔ ሞርኬቲ ꬋያና፤
ኢታ ኦꬂዛ ኡባቲ
ፒስኪ ጋናይሳ ኑ ኤሮስ።
10 ታ ካጬዛ ሜንꬃ
ካጬ ማላ ꬎቂሳዳሳ፤
ሎኦ ዛይቴንካ ታና ቲያዳሳ።
11 ታ ሞርኬቲ ጾኔቲዳይሳ
ታ ኣይፌን ቤኣዲስ፤
ታ ባልጋራታ ኩንዴꬅ
ታ ኣይፌን ቤኣዲስ።
12 ጺሎቲ ዛምባ ማላ ዳያና፤
ቃሴ ሊባኖሴ
ጺዳ ማላ ዲጫና።
13 ኢስቲ ጎዳ ኬꬃን ቶኬቲዳ፤
ኢስቲ ጾሳ ኬꬃ
ዛጎ ጋካናስ ዳያና።
14 ኢስቲ ጬጊዲካ ኣይፋና፤
ኢስቲ ኡባ ዎዴ ጪሊሊዳ ማላኔ
ሚኒዳ ማላ ዳና።
15 ኢስቲ፥ «ጎዳይ ሊኬ፤
ኢዚ ታስ ዎጋ ዛላ፤
ኢዛ ቦላ ዎሶይ ዴና» ጋና።