94
1 ኣቤት ጎዳዉ!
ኔኒ ሃሎ ኬሲዛ ጾሳ፤
ኣቤት ሃሎ ኬሲዛ ጾሳዉ!
ኔ ቦንቾ ቆንጪሳ።
2 ኣቤት ሳኣ ፒርዲዛይሶ! ዴንዳ!
ኦቶራንቻታስ ቤሲዛ
ቂጻቴ ኢማ።
3 ኣቤት ጎዳዉ!
ኢታቲ ኣዉዴ ጋካናስ
ጋምኣኔ?
ኢስቲ ኣዉዴ ጋካናስ
ኡፋዬታኔ?
4 ኢታ ኦꬂዛ ኡባቲ
ባንታ ኦቶሮ ቃላን ሃሳዬቴስ፤
ጮ ጬቄቴቴስ።
5 ኣቤት ጎዳዉ!
ኢስቲ ኔ ዴራ ሊቂሴቴስ፤
ኣሳ ቶቼቴስ።
6 ኢስቲ ኣምኤታኔ
ቤቴ ኣሳታ ዎꬌቴስ፤
ዪኦታ ሲፌቴስ።
7 ሂስቲዲ ኢስታስ፥
«ጎዳይ ኑና ቤኤና፤
ያቆቤ ጾሲ
ኣኬኬና» ጌቴስ።
8 ኢንቴኖ ኣሳ ጊዶፌ
ዳማቶ! ኣኬኪቴ!
ኢንቴኖ ኤያቶ!
ኣዉዴ ኢንቴ ኤራኔ?
9 ሃይꬅ ኢሚዳ ጾሲ ሲዬኔ?
ኣይፌ ሜꬊዳ
ጾሲ ቤኤኔ?
10 ካዎቴꬃ ሴሪዛይሲ
ቃጻዬኔ?
ኣስ ኤራቴꬅ ታማርሲዛይሲ
ባስ ኤሬኔ?
11 ጎዳይ ኣሳ ቆፋይ ꬋሎንታይሳኔ
ሃዳ ጊዲዳይሳ ኤሬስ።
12 ኣቤት ጎዳዉ!
ኔኒ ሴሪዛዴይኔ
ኔኒ ኔ ዎጋፔ ታማርሲዛ
ኣሲ ኣንጄቲዳዴ።
13 ኢታቲ ኩንዳና ኦላይ
ቦኬታና ጋካናስ፥
ኔ ኢዛ ሜቶፔ ሼምፒሳሳ።
14 ጎዳይ ባ ኣሳ ኦሌና፤
ኢዚ ባይታ ኣጌና።
15 ፒርዳይ ሲሚዲ ጺሎ ፒርዳስ
ዮች ጊዳና፤
ጺሎቲ ኡባይ
ቱማ ፒርዳ ካላና።
16 ማካላንቻታ ቦላ
ታ ጊሻስ ኤቄታናይ ኦኔ?
ኢታ ኦꬂዛይታራካ
ታ ጊሻስ ሞቴታናይ ኦኔ?
17 ጎዳይ ታና ማዶንታኮ፥
ታኒ ኤሶን ዱፎን ጌላዳ
ሲርጲ ጋና።
18 ኣቤት ጎዳዉ!
ታኒ፥ «ኩንዳና ሃናይስ» ጊሺን
ኔ ሜርና ሲቆይ ታና ካፊዴስ።
19 ታ ዎዚናይ ጬጬን ኩሚዳ ዎዴ
ኔ ሚንꬄꬆይ ኡፋይስ ዳሪሴስ።
20 ዎጋን ዜምፒዲ ጌላ ፒርዲዛዴራ
ኔኒ ዙፔታናስ ዳንዳያይ?
21 ጺሎ ኣሳታ ቦላ ጌኔ ዱላቴቴስ፤
ሱሬ ኣሳታ ቦላካ
ሃይቆ ፒርዳ ፒርዴቴስ።
22 ጎዳይ ጊዲኮ ታስ
ታኒ ባቃታ ኣቲዛ ሚጻ፤
ታ ጾሲ ታ ኢዛን
ዜምፒዛ ዎጋ ዛላ።
23 ኢስታ ኢታቴꬃ ጊሻስ
ኢዚ ኢስታ ቃጻያና፤
ኢስታ ናጋራ ጊሻስ
ኢዚ ኢስታ ꬋይሳና፤
ጎዳ ኑ ጾሳይ
ኢስታ ዲፒ ሂስታና።