4
ሳሎን ዲዛ ጎይኖ ዎጋ
1 ሄሳፌ ጉዬ ታኒ ሳሎን ዶያ ዲዛ ፔንጌ ቤያዲስ፤ ታኒ ኮይሮ ሲዪዳይ ዲንኬ ጊሪሳ ማላ ጊሪሲ፥ «ሃ ፑዴ ኬዛ፤ ቡሮፔ ሃናና ሚሻታ ታ ኔና ቤሳና» ጊዴስ።
2 ታኒ ሄራካ ኣያናን ሊጲጲ ጋዳ ሳሎን ዲዛ ኣልጋ ቤያዲስ፤ ሄ ኣልጋዛ ቦላካ ኢሳዴይ ኡቲዴስ።
3 ሄ ኣልጋ ቦላ ኡቲዳይሳ ሜꬋይ ኢያስጲዴኔ ሳርዲዮኔ ኢንቁ ሚሳቲዛ ኣልጋዛ ዩዪ ኣꬊዲ ማርጊዴ ጌቴቲዛ ኢንቁ ሚሳቲዛ ዙላይ ዴስ።
4 ሄሳꬆካ ሄ ኣልጋዛ ዩዪ ኣꬊዳ ናምኡ ታማኔ ኦይዱ ኣልጋቲ ዴቴስ፤ ሄ ኣልጋታ ቦላ ቃሴ ቦꬃ ማይኦ ማይኢዲ ባ ሁኤ ቦላ ዎርቃ ኣኪሊሌ ዎꬂዳ ናምኡ ታማኔ ኦይዱ ጪማቲ ኡቲዳ።
5 ሄ ኣልጋፌ ዎልቃንꬂኔ ዳዳ ጊሪሲ ኬዜስ፤ ሄ ኣልጋ ሲንꬃን ፖኢዛ ላፑን ጾምፔቲ ዴቴስ፤ ሄይቲካ ጾሳ ኣያና ላፑናታ።
6 ሄ ኣልጋ ሲንꬃን ጌሽ ሚሊጺ ጊዳ ጾልቂዛ ማስቶቴ ሚሳቲዛ ኣባይ ዴስ፤ ኢዛ ጊዶን ኣልጋ ዩሾን ዳሮ ኣይፌራ ዲዛ ኦይዱ ዶኣቲ ዴቴስ።
7 ኮይሮ ዶኣዚ ጋሞ ሚሳቴስ፤ ናምኣንꬆዚ ቦራ ሚሳቴስ፤ ሄꬓንꬆዛ ኣይፌሶይ ኣሳ ኣይፌሶ ሚሳቴስ፤ ኦይዳንꬆዚ ፒራꬊዛ ጎሌ ካፎ ሚሳቴስ።
8 ሄ ኦይዱ ዶኣቲ ኢሶይ ኢሶይ ኡሱፑን ቄፌራ ዴቴስ፤ ቄፌታ ዩሾኒኔ ቄፌታ ጊዶን ኣይፌይ ኩሚዴስ፤ ኢስቲ ቃማኔ ጋላስ፥
«ጌሻዉ! ጌሻዉ!
ጌሻዉ!
ኡባ ዳንዳይዛ ጎዶ!
ካሴካ ሃኢካ ዲዛይሶ!
ቡሮካ ያናይሶ
ጉሳፌ ሼምፒ ኤሬቴና።
9 «ሄ ዶኣቲ ኣልጋ ቦላ ኡቲዳይሳሲኔ ሜርናፔ ሜርና ጋካናስ ዲዛይሳስ ጊታቴꬅ፥ ቦንቾኔ ጋላታካ ሺሺዛ ዎዴ ኡባን፥
10 ናምኡ ታማኔ ኦይዱ ጪማቲ ሜርናፔ ሜርና ጋካናስ ዲዛ ባ ኣልጋ ቦላ ኡቲዳይሳ ሲንꬃን ጉፋኒዲ ኢዛስ ጎይኔቴስ፤ ባ ኣኪሊሌታካ ሄ ኣልጋዛ ሲንꬃን ዎꬂዲ፥
11 «ኑ ጎዳ ጾሶ!
ኔኒ ኡባ ሜꬊዳ ጊሻስ
ሜꬌቴꬂ ዉሪካ
ሜꬌቲዳይኔ
ሼምፖራ ዲዛይ
ኔ ሼኔን ጊዲዳ ጊሻስ
ጊታቴꬂ፥ ቦንቾይኔ
ዎልቃይካ
ኔስ ቤሴስ» ጊዳ።