1ሳሜላ ማጻፋ
ጊዶ ቆፋ
ሳሜላ ማጻፋ ኮይሮዚ ኢስራኤሌ ኣሳይ ዳናታ ኣይሶ ዎጋፔ ጌዴ ካዎይ ኣይሲዛ ዎጋን ፒኒዳ ሃኖታ ቆንጪሴስ። ሄሳ ማላ ላሜይ ኢስራኤሌን ሃናናስ ዳንዳይዳይ ዳሮ ባጋ ሄꬑ ኣሳታ ጋሶና። ሄይቲካ ኮይሮዚ ዉርሴꬃን ዴንዲዳ ጊታ ዳናታፔ ኢሶይ ሳሜላ፤ ናምኣንꬆዚ ኢስራኤሌስ ኮይሮ ካዎ ጊዲዳ ሳኦሌ፤ ሄꬓንꬆዚ ኢዚ ማታ ኦይካናፔ ካሴ ኢዛ ታሪኬይ ሳሜላ ታሪኬራኔ ሳኦሌ ታሪኬራ ኢሲፌ ኦይኬቲ ዲዛ ዳዊቴ።
ሃይሳ ሃ ማጻፋስ ዋና ኪታይ ጋልኣ ጫቆ ማጻፋን ዲዛ ሃራ ታሪኬ ማጻፋታ ማላ ጾሳስ ኣማኔቴꬃይ ኣንጆኒኔ ሎኦ ዱሳን ጋꬄስ፤ ኣዛዜቴꬅ ኢጾይካ ኩንዴꬃሲኔ ባሻስ ጋꬂዛይሳ ቤሴስ፤ ሄሲካ ጾሳይ ቄሴ ኤሌስ፥ «ታና ቦንቺዛይታ ታ ቦንቻና፤ ታና ካꬊዛይታ ታኒ ካዉሻና» ጊዲ ኢዚ ዮቲዳ ቃላይ ቆንጪ ቤቲዴስ። (2፡30)
ሃይሲ ሃ ማጻፋይ ካዎይ ዋኒ ካዎታናኮ ዲዛ ዱማ ዱማ ቆፋታ ቆንጪሴስ፤ ሄሳፌ ሲንꬄ ኢስራኤሌን ቱሙ ካዎ ጌቴቲ ኤሬቲዳይ ጾሳ፤ ጊዶ ኣቲን ጉዬፔ ዴሬይ ኦይቺዳ ኦይሾ ጋሶን ጾሲ ኢስታስ ካዎ ዶሪዴስ። ሄሳ ጊዲኮካ ኣይፌ ዮኦይ ካዎዛፔኔ ኢስራኤሌ ዴራፔ ቦላራ ፒርዲዛ ጾሳ ጋርሳን ኢስቲ ዲዛይሳ (2፡7-10)። ሄሲካ ጾሳ ዎጋ ጊዶን ዱሬታ ጊዲን ዎይኮ ማንቆታ ጊዲን ኢስታ ማታይ ኢሲ ጊና ናጌታናስ ቤሲዛይሳ ኤሪሴስ።
ሃ ማጻፋይ ኦይኪዳ ኩሜꬃ ቆፋ
ሳሜሊ ኢስራኤሌ ካሌꬂዛዴ ጊዴꬅ 1፡1—7፡17
ሳኦሌ ካዎቴꬅ 8፡1—10፡27
ሳኦሊ ዴራ ኣይሲዳ ኮይሮ ላይꬃታ 11፡1—15፡25
ዳዊቴኔ ሳኦሌ 16፡1—30፡31
ሳኦሌኔ ኢዛ ናይታ ሃይቆ 31፡1-13
1
ሂልቃናኔ ኢዛ ኬꬃ ኣሳታ
1 ኤፍሬሜ ዴሬን ኤራማቴ-ዙፊሜ ጌቴቲዛ ሻራ ሜንꬆን ዲዛ ሂልቃና ጌቴቲዛዴይ ዴስ፤ ኢዚካ ኤፍሬሜ ዴሬ ኣሳ፤ ኢዚ ዪሮሃሜ ና፥ ኤሊሁ ና፥ ቶሁ ና፥ ዙፌ ና።
2 ኢዛስ ሃናኔ ፊናና ጌቴቲዛ ናምኡ ማቼቲ ዴቴስ፤ ፊናናስ ናይቲ ዴቴስ፤ ሃናስ ጊዲኮ ኣይኮ ናይካ ዴና።
3 ሂልቃናይ ኡባ ዳንዳይዛ ጎዳ ጎይናናሲኔ ኢዛስ ያርሾ ሺሻናስ ላይꬃን ላይꬃን ባ ዲዛ ካታማፔ ፑዴ ሴሎ ኬዜስ፤ ሄን ኤሌ ና ናምኣቲ ኣፊኔይኔ ፊኒሃሲ ጎዳ ቄሴታ።
4 ሂልቃናይ ሴሎ ቢዲ ያርሾ ያርሺዛ ዎዴይ ጋኪዳ ዎዴ ኡባን ባ ማቾ ፊናናስ፥ ኢዚ ኣቱማ ናይታሲኔ ማጫ ናይታስ ኡባስ ኣሾዛፔ ኢስታ ጋኪዛ ጊሻ ኢስታስ ኢሜስ።
5 ጊዶ ኣቲን ኢዚ ሃና ሲቂዛ ጊሻስ ኣሾዛፔ ኢዚስ ናምኡ ኩሼ ኢሜስ፤ ጊዲኮካ ጎዳይ ኢዞ ማይኒሲ ዎꬂዴስ።
6 ጎዳይ ኢዞ ማይኒሲ ዎꬂዳ ጊሻስ ኢዚ ዳዉꬃያ ኢዞ ሃንቄꬃዉሲኔ ዪሎቻዉስ።
7 ሄሲካ ላይꬃን ላይꬃን ፓጬይ ባይንዳ ሃኔስ፤ ሃናይ ጎዳ ኬꬅ ዪዛ ዎዴ ኡባን ኢዛ ዬካናሼኔ ካꬃ ሙሲ ኢዞ ጾናናሼ ጋካናስ ዳዉꬃያ ኢዞ ዪሎቻዉስ።
8 ሄሳ ጌዶን ኢዚ ኣዚና ሂልቃናይ ኢዞ፥ «ሃኔ! ኣይስ ዬካይ? ኣይስ ካꬅ ሚኪ? ኔ ዎዚናይ ኣይስ ጬጪዜ? ታኒ ኔስ ታሙ ኣቱማ ናይታፔ ኣꬊኪና?» ጊሼ ታኪዴስ።
ሃናይ ጎዳኮ ሺሺዳ ዎሳ
9 ኢሲ ጋላስ ኢስቲ ሴሎን ዲሼ ሚዲኔ ኡዪዳፔ ጉዬ ሃናይ ዴንዳ ኤቃዱስ። ሄ ዎዴ ቄሴ ኤሌይ ጾሳ ኬꬃ ፔንጌን ቆሲላꬃ ኣቻን ኦይዴ ቦላ ኡቴꬃን ዴስ።
10 ሃናይ ኢዚ ዎዚናይ ሜቂዳ ጊሻስ ሂቂማ ዬካሼ ጎዳ ዎሳዱስ።
11 ኢዛካ፥ «ኡባፌ ዎልቃማ ጎዳዉ ታና ኔ ኣይሌይ ካዉሻቴꬃ ኔ ሃ ጼላዳ ታና ኔ ቆፒኮኔ ታና ኔ ኣይሌዮ ባሎንታ ኔ ታስ ኣቱማ ና ኢሚኮ ኢዚ ባ ዴኦ ላይꬅ ኡባን ኔስ ጊዳና ማላ ታኒ ኢዛ ጎዳስ ኢማና፤ ማጋላይካ ኢዛ ሁኤ ቢናና ቦቼና» ጋዉስ።
12 ሃናይ ጎዳ ኣጎንታ ዎሳሼ ታኪን ኤሌይ ኢዚ ዶና ጼሊዴስ።
13 ሃናይ ኣይኮካ ቃላ ሲሶንታ ዎዚናን ዎሲዛ ጊሻስ ኢዚስ ሜቴርሻይ ጻላ ቃጼስ። ሄሳ ጊሻስ ኤሌይ ኢዞ ማꬆቲዳ ኣሳ ማላ ቆዲዴስ።
14 ኢዚካ ኢዞ፥ «ሃኔ ኔ ኣይዴ ጋካናስ ሃይሳꬆ ማꬆታኔ? ኔኒ ሄሳ ዎይኔ ኡሻ ኔፔ ዲጋ!» ጊዴስ።
15 ሃናይካ ኢዛስ፥ «ታ ጎዳዉ ታ ማꬆታቤኬ፤ ታኒ ኬሂፔ ዎዚናይ ሜቂዳ ማጫሳ፤ ሄሳ ጊሻስ ታኒ ታ ዎዚና ጎዳ ሲንꬃን ሚጫይሲፌ ኣቲን ዎይኔ ኡሹ ጊዲን ዎይኮ ሃራ ማꬆሲዛ ኡሹ ታ ኡያቤኬ።
16 ታኒ ሃይሳ ኬና ኣዱሳ ዎሳ ዎሲዳይ ዴጾ ሜቶይኔ ጬጬይ ታና ጋኪዳይሳፌ ዴንዲዳይሳን ጊዲዳ ጊሻስ ታና ኔ ኦሳንቻዮ ኢሲ ጎኣይ ባይንዳ ሹፉሮ ማጫሳ ማላ ቆዶፓ» ጋዱስ።
17 ኤሌይካ ኢዞ፥ «ሳሮን ባ፥ ኢስራኤሌ ጾሲ ኔ ዎሶይሳ ኔስ ኢሞ» ጊዴስ።
18 ኢዛካ ኢዛስ፥ «ኔ ኣይሌያ ኔ ሲንꬃን ቴማ ዴሙ!» ጋዱስ። ኢዛ ዴንዳዳ ባ ኦጌ ባዱስ፤ ካꬂካ ማዱስ፤ ሄሳፌ ጉዬ ኢዚ ቦላ ጬጬይ ቤቲቤና።
ሳሜላ ዬሌቴꬅ
19 ዎንቴꬃ ጋላስ ሂልቃናይኔ ኢዛሶ ኣሳይ ማላዶ ዎንታራ ዴንዲዲ ጎዳ ጎይኒዳፔ ጉዬ ባንታሶ ጌዴ ኤራማ ቢዳ፤ ሂልቃናይ ባ ማቾ ሃናራ ኣቂዴስ፤ ጎዳይካ ኢዞ ቆፒዴስ።
20 ሂስቲን ሃናይ ቃንꬃታዱስ፤ ኢዚስ ዎዴይ ዉሪን ኣቱማ ና ዬላዱስ፤ ናዛ ሱንꬃካ፥ «ጎዳፔ ዎሳዳ ዴማዲስ ጋሼ ሳሜላ» ጋ ሱንꬃዱስ።
ሃናይ ሳሜላ ጎዳስ ኢማዱስ
21 ሂልቃናይ ጎዳስ ላይꬃን ላይꬃን ሺሺዛ ያርሾዛ ያርሻናሲኔ ባ ኣዲኔቲዳ ኣዲና ጋꬃናስ ባሶ ኣሳ ኡባ ኤኪዲ ሴሎ ኬዚዴስ።
22 ጊዶ ኣቲን ሃናይ ኢስታራ ባቤኩ፤ ኢዛ ባ ኣዚናስ፥ «ዪꬋዚ ꬋንꬅ ዱꬂዳፔ ጉዬ ታኒ ኤፋዳ ጎዳ ሲንꬅ ሺሻና፤ ኢዚካ ባ ዴኦ ላይꬅ ኡባን ሄን ዴኣና» ጋ ዮታዱስ።
23 ኢዚ ኣዚና ሂልቃናይካ ኢዚስ፥ «ኔስ ሎኦ ሚሳቲ ቤቲዳይሳ ኦꬃ፤ ኔ ꬋንꬂ ዱꬃናሼ ጋካናስ ሃይሳን ታካ፤ ጾሲ ኔስ ኢሚዳ ሂዶታ ቃላ ጻላ ፖሎ» ጊዴስ፤ ሄሳ ጊሻስ ሃናይ ዪꬋዛ ꬋንꬅ ዱꬃናሼ ጋካናስ ባሶን ኡታዱስ።
24 ናዚ ꬋንꬅ ዱꬂዳፔ ጉዬ ኢዛራ ሄꬑ ላይꬃ ዎፋኖ፥ ታሙ ኪሎ ꬊሌኔ ኢሲ ሉካሞ ኩሜꬅ ዎይኔ ኡሹ ኤካዳ ጌዴ ሴሎን ዲዛ ጾሳ ኬꬅ ኤፋዱስ፤ ናዚካ ቡሮ ዪꬋ።
25 ኮርማዛ ሹኪዳፔ ጉዬ ዪꬋዛ ኤኪዲ ኤሌኮ ሺሺዳ።
26 ሃናይካ ኤሌ፥ «ታ ጎዳዉ፥ ሼምፖ ጋምኣ፤ ሃይሳን ኔ ሲንꬃን ኤቃዳ ጎዳ ዎሲዳ ማጫሳያ ታናኮ!
27 ሄ ዎዴ ሃይሳ ሃ ናዛ ኢማና ማላ ዎሳዲስ፤ ጎዳይካ ታ ዎሲዳይሳ ታስ ኢሚዴስ።
28 ሄሳ ጊሻስ ታኒካ ሃኢ ዛራዳ ጎዳስ ኢዛ ኢማይስ፤ ኢዚ ባ ዴኦ ላይꬅ ኡባን ጎዳስ ኢሜቲዳይሳ ጊዳና» ጋዱስ፤ ሄሳፌ ጉዬ ሄን ጎዳስ ጎይኒዳ።