21
ሳኦሌ ዜሬꬃታ ቃጻዬቴꬅ
1 ዳዊቴ ካዎቴꬃ ዎዴ ሄꬑ ላይꬅ ኩሜꬅ ኢታ ኮሻይ ቢታ ቦላ ዴንዲዴስ፤ ሄሳ ጊሻስ ዳዊቲ ጎዳ ኦይቺዴስ፤ ጎዳይካ ኢዛስ፥ «ሳኦሊ ጌባኦኔ ኣሳ ዎꬊ ዉርሲዳ ጊሻስ ኢዛ ቦላኔ ኢዛሶ ኣሳ ቦላ ሱꬃ ኣጮይ ዴስ» ጊዴስ።
2 ካዎዚ ጌባኦኔ ኣሳ ጼይጊ ሃሳይሲዴስ፤ ጌባኦኔቲ ኣሞሬታፔ ኣቲዳይታ ኣቲን ኢስራኤሌ ዴሬ ኣስ ጊዴቴና፤ ኢስራኤሌ ኣሳይ ካሴ ኢስቲ ናጋናስ ጫቂዳ ጊዲኮካ ሳኦሊ ኢስራኤሌ ኣሳሲኔ ዩሁዳ ኣሳስ ሚሼቲዛ ጊሻስ ጌባኦኔታ ሙሌራ ꬋይሳናስ ኮዪዴስ።
3 ሄሳ ጊሻስ ዳዊቲ ጌባኦኔ ኣሳ፥ «ታ ኢንቴስ ኣይ ኦꬆ? ጎዳ ጺንጾ ኢንቴ ኣንጃና ማላ ናጋራ ኡባስ ታ ኣይ ኦꬃና ቤሲዜ?» ጊ ኦይቺዴስ።
4 ጌባኦኔ ኣሳይ ኢዛስ ዛሪዲ፥ «ሳኦሌፔ ጊዲን ኢዛሶ ኣሳፔ ቢራ ዎይኮ ዎርቃ ኦይቻናስ ማታይ ዴና፤ ቃሴካ ኑኒ ኢስራኤሌፔ ኦናካ ዎꬋናስ ማታይ ዴና» ጊዳ።
ዳዊቲካ፥ «ሂስቲን ታ ኢንቴስ ኣይ ኦꬆ?» ጊ ኦይቺዴስ።
5 ኢስቲካ፥ «ኑኒ ላሌታና ማላኔ ኢስራኤሌ ጊዶን ኣዋንካ ዶንታ ማላ ኑ ቦላ ጌኔ ኦꬂዲ ኑና ꬋይሲዳዴ
6 ዜሬꬃፌ ላፑን ኣቱማ ናይቲ ኑስ ኢሜቴቶ። ኑኒካ ጎዳን ዶሬቲዳ ሳኦሌ ዴሬ ጊቢኣን ጎዳ ሲንꬃን ኢስታ ካቃና» ጊ ዛሪዳ። ሂስቲን ካዎዚ፥ «ኤሮ ታ ኢማና» ጊዴስ።
7 ካዎ ዳዊቲ ሳኦሌ ና ዮናታኔ ጊዶኒኔ ባ ጊዶን ጎዳ ሲንꬃን ጫቄቲዳ ጫቆ ጊሻስ ጊዲ ሳኦሌ ናዛ ዮናታኔ ና ሜምፌቦስቴ ሃይቆፔ ኣሺዴስ።
8 ጊዶ ኣቲን ካዎዚ ኣያ ቢዮ ኤርጺፋይ ሳኦሌስ ዬሊዳ 2 ኣቱማ ናይታ ኣርሞኔኔ ሜምፌቦስቴ፥ ኢስታራካ ኢሲ ቦላ ሳኦሌ ቢያ ሜሮባ ማሆላቴ ዴሬ ኣስ ባርዚሌ ና ኣዲርኤሌስ ዬሊዳ 5 ኣቱማ ናይታ ኤኪ ቢዴስ።
9 ኢስታ ጌባኦኔ ኣሳታስ ኣꬂ ኢሚዴስ፤ ጌባኦኔቲ ኢስታ ዎꬊዲ ዙምቡላታ ቦላ ጎዳ ሲንꬃን ካቂዳ፤ ላፑናቲ ኢሲ ቦላ ሃይቂዳ፤ ኢስቲ ሃይቂዳይ ካꬃ ሺሾ ዎዴ ኮይሮ ጋላስ፥ ባንጋይ ማጻ ዶሜቲዳ ጋላሳ።
10 ሄሳፌ ጉዬ ኣያ ቢዮ ኤርጺፋይ ማቃ ኤካዳ ዛላ ቦላ ዱንካናዱስ፤ ካꬃ ሺሾ ኮይሮ ጋላሳፌ ቢዲ ኢራይ ቡካናሼ ጋካናስ፥ ጋላስ ሳሎ ካፎቲ ቦቾንታ ማላ፥ ኦማርስ ዎራ ዶኣቲ ቦቾንታ ማላ ናጋሼ ሄን ጋምኣዱስ።
11 ሳኦሌ ላጌꬆያ ኣያ ቢዮ ኤርጺፋይ ኦꬂዳይሳ ዳዊቲ ሲዪዳ ዎዴ፥
12 ቢዲ ሳኦሌ ሜቄꬃኔ ኢዛ ና ዮናታኔ ሜቄꬃ ያቡሴ ጋላኣዴ ኣሳፔ ኤኪዴስ። ያቡሴ ኣሳይ፥ ኢስቲ ካቂዳሶፔ ቤቲ-ሳኔ ዱቡሻፔ ቆታራ ኤኪ ቢዳ።
13 ዳዊቲ ሳኦሌ ሜቄꬂኔ ኢዛ ና ዮናታኔ ሜቄꬅ ሄፔ ኤሂዴስ። ሄሳꬆካ ሄ ሃይቂዳ ኣሳታ ሜቄꬅ ሺሺዳ።
14 ሳኦሌ ሜቄꬂኔ ኢዛ ና ዮናታኔ ሜቄꬅ ቢኒያሜ ቢታን ጼላ ጌቴቲዛሶን ኢዛ ኣዋ ቂሴ ዱፎን ሞጊዳ፤ ካዎዚ ኣዛዚዳይሳካ ኡባ ኦꬂዳ። ሄሳፌ ጉዬ ቢታይስ ኢስቲ ዎሲዳ ዎሳ ጾሲ ሲዪዴስ።
ፊሊስጼሜ ቦላ ዴንዲዳ ኦላ
(1ታሪ 20፡4-8)
15 ቃሴካ ፊሊስጼሜሲኔ ኢስራኤሌስ ጊዶን ኦላይ ዴንዲዴስ፤ ዳዊቲካ ባ ኣሳራ ፊሊስጼሜ ኣሳ ኦላናስ ዱጌ ዎꬊዴስ፤ ኢዚ ሄን ዳቡርዴስ።
16 ኤራፋዬ ዜሬꬃታፔ ኢሶይ ኤሽቢ-ቤኖቤ ጌቴቲዛ ኣሲ ዴስ፤ ኢዚ ጻርቂማላፔ ኦሴቲዳ 300 ሳቂሌ ዴጺዛ ቶራኔ ኦራꬃ ማሻ ጊጺ ኡቲዴስ፤ ኢዚካ ዳዊቴ ዎꬋና ቆፒዴስ።
17 ጊዶ ኣቲን ጹሪያ ና ኣቢሳዬይ ዳዊቴ ሼምፖ ኣሻናስ ዪዲ ፊሊስጼሜ ኣዴዛ ጫዲ ዎꬊዴስ። ሄሳፌ ጉዬ ዳዊቴ ኣሳቲ፥ «ኢስራኤሌ ጾምፔይ ቶኦንታ ማላ ሃይሳፌ ጉዬ ኔ ኑናራ ኦላሶ ኬዛና ቤሴና» ጊ ጫቂዳ።
18 ሄሳፌ ጉዬ ጎቤ ጌቴቲዛሶን ፊሊስጼሜ ኣሳራ ኦላይ ዴንዲዴስ። ሄ ዎዴ ሁሼ ዴሬ ኣስ ሲቢካዬይ ኤራፋዬ ዜሬꬃታፔ ሳፌ ዎꬊዴስ።
19 ጎቤን ፊሊስጼሜታራ ዴንዲዳ ሃራ ኦላን ቤቴሊሄሜ ዴሬ ኣስ ጃር-ኦርጊሜ ና ኤልያኔይ ኢዛስ ቶራ ቶማይ ዎንዲራሼ ሚꬅ ሊኪዛይሳ ጌቴ ዴሬ ኣስ ጎልያዴ ዎꬊዴስ።
20 ቃሴካ ጌቴን ዴንዲዳ ኦላን ኢዛስ ኢሲ ኢሲ ኩሼ ቦላኔ ኢሲ ኢሲ ቶሆ ቦላ ኡሱፑን ቢራꬌይ፥ ኢሲ ቦላ ናምኡ ታማኔ ኦይዱ ቢራꬌቲ ዲዛ ኢሲ ዎልቃማ ኣሲ ዴስ፤ ኢዚ ኤራፋዬ ዜሬꬃ።
21 ኢዚ ኢስራኤሌ ኣሳራ ኤቄቲሺን ዳዊቴ ኢሻ ሺምኤ ና ዮናታኔይ ኢዛ ዎꬊዴስ።
22 ሃይቲ ኦይዳቲ ጌቴን ዲዛ ኤራፋዬ ዜሬꬃታ፤ ኢስቲካ ዳዊቴ ኩሼኒኔ ኢዛ ኣሳታ ኩሼን ኩንዲዳ።