6
1 ጾሳ ሱንꬂኔ ኢዛ ቲሚርቴይ ጫዬቶንታ ማላ ኣይሌቴꬃ ቃምባራ ጊዶን ዲዛይቲ ዉሪ ባ ጎዳስ ኩሜꬃ ቦንቾይ ቤሲዛይሳ ኤሬቶ።
2 ኣማኒዛ ጎዳቲ ዲዛ ኣማኒዛ ኣሽካራቲ ጎዳቲ ኢስታስ ኢሻታ ጊዲዳ ጊሻስ ጎዳታስ ቤሲዛ ቦንቾ ኢሜቶ፤ ሃራፔካ ኢስታ ኦሶን ማዴቲዛ ኣማኒዛ ጎዳቲ ኢስታስ ዶሴቲዳይታ ጊዲዳ ጊሻስ ኔካ ሃይታንታ ማላ ዮኦታ ታማርሳናሲኔ ዞራናስ ቤሴስ።
ዎርዶ ቲሚርቴኔ ቱሙ ዱሬቴꬅ
3 ኦኒካ ዎርዶ ቲሚርቴ ታማርሲኮ ጎዳ ዬሱስ ኪርስቶሳ ሎኦ ቃላኔ ኣያና ቱማቴꬃ ሚንꬂዛ ቲሚርቴራ ጋጎንታይሳ ጊዲኮ፥
4 ሄሳዴይ ኦቶሬቴꬃን ኩሚዴሲኔ ኣይኮካ ዩሺ ቆፔና፤ ኢሲ ኢሲ ቃላታ ጊሻስ ፓላሜታናሲኔ ኦዬታናስ ኢታ ኣሞይ ኢዛን ዴስ፤ ሄይቲካ ቃናቴቴꬅ፥ ኦሽ፥ ጫሽ፥ ኢታ ሲꬌ ካሌꬄቴስ።
5 ቱማይ ኢስታፌ ኤኬቲ ጊዲን ኣያና ኦሶን ዎꬌ ዴማና ሚሳቲዛ ኣሳታኔ ቆፋ ፓጬ ኣሳታ ጊዶን ጎሼቲዲ ዱጾንታ ኦሽ ኤሄቴስ።
6 ጊዶ ኣቲን ቱሙ ኣያና ኣስ ጊዴꬂ ኑስ ዲዛይሳን ዎፑ ጊዲ ዱሳራ ጊታ ዎꬌ።
7 ጋሶይካ ኑ ሃይሳ ሃ ኣላሜዛ ዪሼ ኣይኮካ ኤኪ ዪቤኮ፤ ቢሼካ ቃሴ ኣይኮካ ኤኪ ቦኮ።
8 ጊዶ ኣቲን ኑስ ማናይሲኔ ኑ ማይኣናይሲ ዲኮ ጊዳና።
9 ዱሬ ጊዳናስ ኮይዛይቲ ጊዲኮ ጌዴ ፓጬኒኔ ናርጻን ጌሊዲ ኦይኬቲዛይሳ ማላ ዳሮ ሃዳኒኔ ኢታ ኣሞን ኡንኤቴቴስ።
10 ጋሶይካ ሚሻ ሲቆይ ኢታቴꬅ ኡባስ ጻጶ፤ ኢሲ ኢሲ ኣሳቲ ዱሬ ጊዳና ጊዲ ኣሞቲዳ ኣሞፔ ዴንዲዳይሳን ኣማኖ ኦጌፔ ባሌቲዲ ሃራሶ ቢዳኔ ባርካ ባና ዳሮ ሜቶ ጊዶ ጌልꬂዳ።
ጳዉሎሲ ጺምቶሳስ ኢሚዳ ሃዳራ ቃላ
11 ኔኖ ጾሳ ኣሶ! ኔ ሄሳ ኡባፌ ባቃታ፤ ጺሎቴꬅ፥ ቱሙ ኣያናን ዱስ፥ ኣማኖ፥ ሲቆ፥ ዳንዳያኔ ኣሽኬቴꬅ ካላ።
12 ኣማኖ ባጼ ሎኤꬃ ባጼታ፤ ዳሮ ማርካታ ሲንꬃን ሎኦ ኣማኔቴꬃን ኔ ማርካቲዳይሳኔ ኔ ኢዛስ ጼይጌቲዳ ሜርና ዴኦዛ ሎኤꬃ ኦይካ።
13 ኡባሲካ ዴኦ ኢሚዛ ጾሳ ኣቻን ሄሳꬆካ ጳንጾሳ ጲላጾሳ ሲንꬃን ቱማ ማርካቲዳ ዬሱስ ኪርስቶሳ ሲንꬃን ታ ኔና ሃዳራ ጊዛይ፥
14 ጎዳ ዬሱስ ኪርስቶሲ ቆንጫና ጋካናስ ኔስ ኢሜቲዳ ኦሶዛ ዎሶይ ባይንዳ ኔ ፖላና ማላ ቤሴስ።
15 ሄ ቆንጬꬂ ኣንጄቲዳይሲ ባርካ ኡባ ሃሪዛይሲኔ ካዎታ ካዎይ፥ ጎዳታስ ጎዳይ ኢዚ ባ ዎዴን ቤሳና።
16 ኢዚ ጻላ ሃይቆንታይሳ፤ ኦኒካ ሺቃናስ ዳንዳዮንታ ፖኦ ጊዶን ዴስ፤ ኢዛ ቤኢዳ ኣሲ ኦኒካ ባ፤ ቤያና ዳንዳይዛዴይካ ዴና፤ ኢዛስ ዎልቃይኔ ቦንቾይ ሜርናፔ ሜርናስ ጊዶ። ኣሚን።
17 ሃይሳ ሃ ኣላሜዛን ዱሬቲዳይቲ ኦቶሬቶንታ ማላ ኣዛዛ፤ ኑ ኡፋዬታና ማላ ዉርሲካ ዳርሲ ቲርፊሲዲ ኑስ ኢሚዛ ጾሳን ኣቲን ኣማንꬆንታ ሚሻን ኣማኔቶንታ ማላ ኣሳስ ዮታ።
18 ሎኦ ኦꬃና ማላኔ ሎኦ ኦሶን ዱሬታ ጊዳና ማላ፥ ኪያታኔ ሻኪ ኢማናስ ዶሲዛይታ ጊዳና ማላ ኣሳ ኣዛዛ።
19 ሄሳꬆካ ቱሙ ጊዲዳ ዴኦ ዴማና ማላ ቡሮፔ ያና ዎዴስ ኣሳይ ሚኖ ጻጶ ጊዲዛ ሃሮ ባስ ሺሻና።
20 ጺምቶሳ! ኔ ሃዳራ ኤኪዳይሳ ዉርሳ ናጋ፤ ጾሳ ቦንቺሶንታ ሃዳ ዶና ሎምኡሎምኣፌኔ ዎርዶ ኤራቴꬅ ጌቴቲዛ ኣሲ ባፔ ሜꬊ ኬሲዳ ቲሚርቴፌ ሃካ።
21 ኑስ ሄሳ ማላ ኤራቴꬂ ዴስ ጊዛ ኢሲ ኢሲ ኣሳቲ ሄሳꬆ ኦሶን ኣማኖ ኦጌፔ ባሌቲዳ፤ ጾሳ ኪያቴꬂ ኢንቴናራ ጊዶ።