Hawaareta Ooso
Giddo Qofa
Hawaareta ooso maxaafazi Luqaasa Mishiraachcho qaalaappe kaallizayssa; ha maxaafazas ayfe qofay koyro Yesusa kaallizayti Xillo Ayanay kaaleththiin iza gishshas yootiza Mishiraachcho qaalaa, «Yerusalaamen, Yuhuda dere ubbaan, Samaariyaninne biitta gaxa gakkanaas» 1:8 Mishiraachcho qaalaa istti wostti ubbaa gaththidaakko hessa yootanaassa; maxaafazi ammanoy Ayhudata garsan doommidi kumeththa alame asay ammanana gakkanaas izi waani waani aakki aakki bidaakko yootizayssa. Hayssa maxaafaa xaafidayssi ammanizayti Oroome kawora eqettanaas garsara yo7o qachchizayta gidonttayssanne ammanizayta ammanoy hankko Ayhudata ammano polokko gaththizaaz gididayssa erisanaas daro baaxetides.
Hawaareta Ooso maxaafay Yesusa gishshas Mishiraachcho qaalay gakkizasoy woden woden aakki aakki bizayssanne Woosa Keeththey minni xaphidayssa bessiza heedzdzu gita kifiletan shaakettanaas dandayees.
1. Ammanizayta ammanoy Yesusi dendidi pude salo bidaappe guye Yerusalaamen doommides.
2. Isra7eele dere kumeth gakkides.
3. Oroome gujji ekkidi Mediteraane abbaa yuushon diza deraa gakkanaas oykkoyssa yootees.
Hawaareta Ooso maxaafan keehi qoncci beettizay Xillo Ayana ooso gidishin Phenxeqoste ba7aale gallas Yerusalaamen ammaniza asaa bolla wolqqara wodhdhoyssa, hessaththoka he maxaafazan yootettida yo7otan ubbaan qonccida mala Xillo Ayanay Woosa Keeththanne Woosa Keeththa kaaleththizayta kaaleththidayssanne minththeththidayssa gujjees. Beni wode yootettiza ammano qaalay dumma dumma ogera sabbakettides. Hawaareta ooso maxaafan polettida oosotikka kiitazi ammanizayta de7onne istta issifeteththaan diza wolqqay ay mala minokkonne eriseettes.
Ha Maxaafay Oykkida Kumeththa Qofa
Markkateththas giigeteth 1:1-26
Yerusalaamen yootettida markkateth 2:1—8:3
Yuhudaninne Samaariyan yootettida markkateth 8:4—12:25
Phawuloosa Hawaareteththa ooso 13:1—28:31
Mishiraachcho qaalaa yootanaas Phawuloosas koyro buus 13:1—14:28
Yerusalaame shiiqo 15:1-35
Mishiraachcho qaalaa yootanaas Phawuloosas nam7anththo buus 15:36—18:22
Mishiraachcho qaalaa yootanaas Phawuloosas heedzdzanththo buus 18:23—21:16
Yerusalaamen, Qisaariyaninne Oroomen Phawuloosa qasheteth 21:17—28:31
1
Yesusi Salo Dendi Buus
1 Tofiloosaa! Yesusi ooththanaassinne tamaarsanaas oykkidayssa wursa ta nees koyro maxaafaan xaafadis.
2 Hessika izi pude denththa gallas gakkanaas ba doori kiittidaytas Xillo Ayana baggara izi isttas immida azazokko.
3 Izi daro waaye be7idaappe guye isttako shiiqidi hayqoppe dendanayssa isttas daro markkara qonccisishe oyddu tammu gallas gakkanaas isttas gallas gallas beettishe Xoossa Kawoteththa gishshas yootides.
4 Isttara issife maaddan utti dishe istta, «Yerusalaameppe kezopite; gido attiin ta inttes yootishin intte siyidayssa ta Aaway immida ufayssaa naagite.
5 Yohannisi haaththan xammaqides; intte gidikko guuththa wodeppe guye Xillo Ayanan xammaqettana» giidi yootides.
6 Isttika issi bolla shiiqetti dishe, «Godoo! Ne Isra7eeleta kawoteth zaarada ha7i essanee?» gi oychchida.
7 Izikka isttas, «Aaway ba shenen woththida wode eroy inttes imettibeenna.
8 Gido attiin Xillo Ayanay intte bolla wodhdhida wode intte wolqqa ekkana. Yerusalaamenkka, Yuhudankka, Samaariyankka ubbason biitta gaxa gakkanaas intte taas markkatta gidana» gides.
9 Hessa gi yootidaappe guye istti xeellishin pude salo dendides; shaaraykka istta ayfeppe iza genththides.
10 Izi bishin istti iza tishshi histti pude salo xeellishin booththa may7o may7ida nam7u asati qoppontta istta achchan eqqidi,
11 «Intteno Galila asatoo! Intte pude salo xeellishe hayssan aazas eqqidetii? Hayssi intte matappe pude salo dendishin intte be7iza Yesusi salo kezishin intte be7ida mala hessaththoka izi haa simmi yaana» gida.
Yuhuda Sohon Maatiyaasa Dooreteth
12 Hessafe guye Dabrazayte geetettiza zuma bollafe wodhdhidi Yerusalaame simmida. He zumaykka Yerusalaameppe issi kilo metire mala haakkees.
13 Gede katamayo gelidi kase ba diza keeththaa pooqe bolla kezida; heytikka Phexroosa, Yohannisa, Yaaqoobe, Indiraasa, Piliphoosa, Toomaasa, Bartelemoosa, Matoosa, Ilfiyoosa naa Yaaqoobe, ba baggas mishettiza Simoonanne Yaaqoobe naa Yuhuda.
14 Heyti wurikka maccassatappe Yesusa aayo Maaramira hessaththoka iza ishatara issi wozinan issi bolla qanxxontta minni woossida.
15 He gallassatan Phexroosi xeetanne nam7u tammu ammaniza asaa giddon eqqidi,
16 «Ta ishatoo! Yesusa oykkida asata kaaleththi ehida Yuhuda gishshas Xillo Ayanay kasetidi Dawite doonan haasayda Geeshsha maxaafa qaalay polettana koshshees.
17 Izikka nuuppe issaade mala taybettidi hayssa ha oosozan gelanaas qaada demmides» gides.
18 Gidikkoka hayssaadey ba iita ooson demmida miishshan gade shammides; heenkka ba liiphen gufanni kundiin iza asateththay giddofe phalqetti wodhdhides; iza maracey biitta bolla zaazettides.
19 Hessika Yerusalaamen diza asaa ubbaas siyettides; biittayka istta qaalara, «Akeldaama» geetettides; hessas birsheththayka suuththa biitta guussa.
20 Gujjidikka Phexroosi,
«Yeththa maxaafan,
‹Iza gadey mela atto;
izan ay asikka dooppo;
qasseka iza daannateth
hara asi ekko›
geetetti xaafettides.
21 «Hessa gishshas Godaa Yesusi nunara diza wode ubbaan nunara issife dizayta giddofe nu issaade dooranaas koshshees.
22 Hessika Yohannisa xinqatappe haa simmiin Yesusi nuuppe shaaketti dendi baana gakkanaas nunara dizaade gidanaas bessees; gaasoykka ha asatappe issaadey nunara Yesusa denththaas markka gidana koshshees» gides.
23 Hessa gishshas Barsabaasa woykko Yosxoosa geetettiza Yooseefenne Maatiyaasa nam7ata shiishshidi,
24 «Godoo! Neni asa ubbaa wozina eraasa; hayta nam7ata giddofe ne oona dooridaakko izaade nuna bessa.
25 Yuhuday yeggi bidason ha oosaa ooththanaadenne Hawaare gidanaade ne doora» gi woossida.
26 Hessafe saama yeggiin saamay Maatiyaasas kezides; izikka tammanne issi Hawaaretara issife taybettides.