Daaneela Tinbite
Giddo Qofa
Daaneela maxaafay xaafettiday kase Ayhuda dere asay hankko Aramaaweta kawo garsan goodeteththinne gita metoy istta bolla gakkida wode; he wode xaafezi taariketaninne ba be7ida ajjuutatan asa minththeththees; Xoossi he wolqqara waayisi haarizayssa diggidi ba derezas kase bonchchoza zaaranayssa hidota immides. Hayssi ha maxaafazi nam7u kifilen shaakettees.
1. Daaneelinne izara issife di7etti biidi diza guuththa asatas Xoossa bolla diza mino ammanoninne istti izas azazettiza azazeteththan istta morkketi yeellatidayssa yootees; hessi he taarikezi polettiday Baabiloone kawoteththa woden paarise kawoteththa wode (1-6).
2. Daaneeli be7ida dumma dumma ajjuutata gidishin haytikka Baabiloone kawoppe doommidi dumma dumma kawoti kawotanayssanne kundanayssa, qasseka Aramaawe dere ayssizayti mulera dippi gi dhayiin Xoossa derey kase ba diza dere simmi gelanayssa leemison qonccisiza ajjuutata oykkides (7-12).
Ha Maxaafay Oykkida Kumeththa Qofa
Daaneelanne iza lagge heedzdzata 1:1-21
Kawo Nabukadanaxoore agumo 2:1-49
Xoossi Sidiraaqa, Misaaqanne Abdinaago tamappe ashshides 3:1-30
Ceeqeteththi kawo Nabukadenaxoore bolla gaththida meto 4:1-37
Kawo Belishaxoorenne iza keeththa goda bolla xaafettida qaala 5:1-31
Xoossi Daaneela gaammo doonappe ashshida asho 6:1-28
Daaneeli ajjuutan be7ida oyddu do7ata 7:1-28
Daaneeli ajjuutan be7ida dharshonne deysha orge 8:1-27
Daaneeli ba deraas woossida woosa 9:1-27
Daaneeli Xegroose shaafa achchan be7ida Xoossa kiitanchchaza 10:1—11:45
Daaneeli wode wurseththa gishshas be7ida ajjuuta 12:1-13
1
Nabukadanaxoore Kawoteththa Keeththan Daaneelanne Iza Laggeta
1 Kawo Iyo7aaqemey Yuhudan kawotida heedzdzanththo layththan Baabiloone kawo Nabukadanaxoorey Yerusalaame dooddides.
2 GODAY Yuhuda kawo Iyo7aaqeme amarda Xoossa Keeththa miishshatara iza kushen aaththi immides; izikka ba xoossa keeththan woththana Sana7oore efides; izi di7i efida Xoossa Keeththa miishsha ubbaaka ba eeqa xoossata miishshe woththiza keeththan woththides.
3 Hessafe guye kawo Nabukadanaxoorey ba oosanchchata halaqa Ashifenaazey kawoso asaappenne daannata zereththafe gidida Isra7eeleta ehana mala azazides.
4 He doorettidayti naateththinne kawo keeththan ooththanaas dandayza erateththi dizayta gidana mala, mala lo7ota, aadho erateththi dizayta, yuushshi qoppizayta, ubbaa eeson ekkizaytanne istta asateththa bolla borey bayndayta gidana mala qofsides; heyta qasse Baabiloone qaalaninne he dere qaalan xaafo woga tamaarsana mala azazides.
5 Istti maana kaththinne uyana woyne ushshi kawoza maaddafe gidana mala azazettides; histtidi heedzdzu layth tamaari eridaappe guye istti kawoza sinth shiiqidi kawo keeththan ooththana mala yo7oy qashettides.
6 He doorettidayta giddofe Yuhuda qommofe Daaneeli, Hanaaniyay, Misha7eeleynne Azaariyaasi yida.
7 Kawoza shuumeta halaqay istta sunththaa laammidi Daaneela Bilxxasoore, Hanaaniya Sidiraaqa, Misha7eele Misaaqa, Azaariyaasa qasse Abdinaago gi sunththides.
8 Daaneeli kawoza maaddafe miidinne woyne ushsha uyidi bana tunisontta mala qofa qachchides; histtidi hessa he qofaza ero gi ekkana mala Ashifenaaze woossides.
9 Xoossi Daaneelas shuumeza sinththan teema immidi qadhettana mala ooththides.
10 Gido attiin Ashifenaazey kawozas babbida gishshas Daaneelas, «Intte maana kaththinne uyana ushshu inttes azaziday kawozaakko; intte qasse hankko naateththatappe gilqidinne laafi beettiko kawoppe intte bolla meto gasisana» gi yootides.
11 Hessafe guye Daaneela, Hanaaniya, Misha7eelenne Azaariyaasa naagi kath mizana mala shuumeta halaqa Ashfenaazey woossidaadekko Daaneeli biidi,
12 «Nuni atakilte mishenne haath uyishe gam7ana mala ne nuna ne oosanchchata ane tammu gallas gakkanaas paacca beya.
13 Hessafe guye nuna hankko kawoza maaddafe miza naateththatara gaththa paacca xeellada ne dosidaaz nu bolla ooththa» gides.
14 Istta naagizayssika he qofaza ekkidi tammu gallas gakkanaas istta paaccides.
15 He tammu gallassay wuridaappe guye kawoza maaddafe miza naateththa ubbaafe aadhdhidi istta asateththay lo7idinne ordidi beettides.
16 He gallassafe doommidi istta naagizayssi kawo maaddafe isttas yiza lo7o qumanne woyne ushsha aggidi atakilte imo oykkides.
17 Xoossika he oyddu naateththatas aadho erateth, xaafo erateththinne akeeka immides; Daaneelas gidikko hessafekka bollara ajjuutanne agumo birshiza erateth dees.
18 Kase kawozi woththida heedzdzu layththay gakkiin Ashfenaazey he naateththata ubbaa ekki efidi Nabukadanaxoore sinth shiishshides.
19 Kawozikka istta ubbaa haasayssida wode istta giddofe Daaneelara, Hanaaniyara, Misha7eeleranne Azaariyaasara ginattiza asi beettibeenna; hessa gishshas istti kawoza sinththan ooththana mala doorettida.
20 Kawozi oychchida ay aadho erateththaninne akeekan izi ayssiza deren diza marotappe, saggatappe, tammu kusheppe aadhdhi beettida.
21 Daaneelikka Paarise kawo Qiroosi kawotida koyro layth gakkanaas kawoteththa garsan ooththishe gam7ides.