Zaareththo Maxaafa
Giddo Qofa
Zaareththo maxaafay Isra7eele asay bazzo biittan daro wode hemettishe Kanaane gelanaas guuth ashshidi Mo7aabe deren gam7idaappe guye Musey isttas zaari zaari yootida yo7ota oykkides. Zaareththo maxaafan xaafeti dizayti daro go7iza miishshata giddofe issi issi oosoti hayssafe kaalli dizayta, 1. Musey kase aadhdhida oyddu tammu layththatan hanida daro gita hanota yuushshi qoppidi yootees. Xoossay istta bazzo biittan wostti wostti kaaleththidaakko dereza akeekisson asay Xoossas ammanettiza as gidana malanne suureteththan izas azazettana mala qofsides. 2. Musey tammu azazota zaari zaari yootishe harappeka koyro azazoza birsheththi birshi yootidi derezi Xoossas xalla goynnana mala qofsees; hessarakka gaththidi Isra7eele asay isttas hidotan imettida dereyin dishe istti naaganaas bessiza wogata dumma dumma wogata qonccisi yootides. 3. Musey Xoossi izara caaqettida qaalay ay malakko derezas birshi yootidi derezi hessa he qaalaas ba ammaneteththaa ooraxissana mala istta qofsides. 4. Iyaasoy Musesohon gididi Xoossa deraa kaaleththana mala shuumettides. Musey Xoossaa ammaneteththa gishshas giigida ginxo yexxidaappe guye Isra7eele deraa ubbaa anjjidaappe guye Yordaanoose shaafappe arshey wulliza baggara diza Mo7aabe deren hayqqides. Ha maxaafaas ayfe yo7oy Xoossi ba dosidaytanne doorettida ba dereta izi ashshidayssanne anjjidayssa yootees. Derezikka Xoossa anjjoy izappe shaakettontta shemppora paxa daana mala Xoossi asaas ooththida ooso ubba wode akeekidi istti Xoos siiqanaasinne izas azazettanaas bessizayssa asaa qofsides. Ha maxaafas ayfe qofata oykkida xiqiseti ha maxaafan shemppo 6:4-6 gakkanaas dizayta gidishin heytikka Yesusi, «Azazota ubbatappe aadhdhiza gita azazota» giidi isttas yootida qaalata oykkidayta. Heytikka, «Neni ne GODAA kumeththa wozinappe, kumeththa shemppofe, kumeththa wolqqafe siiqa» gizayssa.
Ha Maxaafay Oykkida Kumeththa Qofa
Musey koyro haasayda haasaya 1:1—4:49
Musey nam7anththo haasayda haasaya 5:1—26:19
Tammu azazota 5:1—10:22
Wogata, maaratanne seerata 11:1—26:19
Istti Kanaane gelanaappe kase isttas imettida kaaleththo wogata 27:1—28:68
Caaqo qaala ooraxiso 29:1—30:20
Musey wurseththan haasayda qaala 31:1—33:29
Muse hayqo 34:1-12
1
Isra7eele Asay Siina Zumaa Matappe Dendi Baana Mala Imettida Azazo
1 Hayssa ha maxaafan diza qaalay wurikka Yordaanoose shaafappe he pinththan arshey mokkiza baggara diza bazzon istti dishin Musey Isra7eele naytas yootida qaala. Museykka ha qaalaa yootiza wode istti Suufe geetettizaso ginara Paaraane katamaappe qasseka hara baggara Topeele, Laaba, Haxirootenne Dizahaabe geetettiza katamata giddon diza Yordaanoose shoobbaan deettes.
2 Siina zumaappe dendidi Qaadeese Barine gakkanaas Eedoome zumata bollara efiza toho ogera biikko tammanne issi gallas ekkees.
3 Gibxeppe istti kezidaappe oyddu tammanththo layththan tammanne issinththa aginay gelida koyro gallas Musey derezas erisana mala GODAY izas yootida qaala ubbaa isttas yootides.
4 Hessika haniday Haseboone katamaan kawoti haariza Amoore dere kawo Sihoonenne Astarooten, Edira7e katamaan uttidi haariza Baasaane kawo Aage xoonidaappe guyenna.
5 Asay Yordaanooseppe arshey mokkiza baggara Mo7aabe deren dishin Musey hayssafe kaalli diza GODAA woga qoncciseth doommides;
6 «Nuni Siina zumaa bolla diza wode GODAA nu Xoossay nuus, ‹Hekko intte hayssa zuma bolla daro gam7ideta;
7 hayssafe guye intte dizasoppe dendi gede gezzettiza Amooreta dere, istta heeran diza Arabe deren diza gezzenne gadha, Negebe dere, Mediteraane abbaa lanqera, Kanaane derenne Libaanoose baggara kanththidi gita haaththaa Efiraaxise shaafaa gakkanaas kanththi biite.
8 Hekko tani ha biittayo inttes immadis; intteka biidi intte aawatas Abrahaames, Yisaaqas, Yaaqoobessinne isttafe guyen yaana istta zereththatas immanaas GODAY caaqqida biittayo laattite› gides» giidi yootides.
Musey Dere Kaaleththizayta Shuumides
(Kessa 18:13-27)
9 Musey derezas, «He wode tani inttes, ‹Tani tarkka inttena kaaleththanaas dandaykke.
10 Intte GODAY intte qooda Salo xoolintte mala darssides.
11 Ha7ikka intte aawata Xoossay kase inttes immida hidota qaalaa mala shii dakko gujjidi inttena anjjo.
12 Gido attiin ha7i intte garsan diza palamaa, ooshshaanne intte metoza tani tarkka wostta birshana dandayazinaa?
13 Intte intte qommofe qommofe akeekay, aadho erateththi dizaytanne ooththi losidayta doorite; tanikka istta intte bolla shuumana› ga yootadis.
14 «Intteka, ‹Ne shiishshida qofay lo7o› gi ekkideta.
15 Hessa gishshas issi issi qommofe intte dooridayta ooso losidayta, aadho eranchchatanne akeekizayta inttefe ekkada baggayta shaalaqata, baggayta mato halaqata, baggayta hamsa halaqatanne asira halaqata, baggayta qommota kaaleththiza halaqa histta shuumadis.
16 «Ta he wode isttas, ‹Intte deraa garsan dendiza palamanne oosh ekki geellay baynda suure pirda pirdite; intte deraa giddon woykko hara dereppe yiidi intte giddon diza asaas geellay baynda suure pirda pirdite.
17 Intte gela pirda pirdofte; guuth gidiin gita gidiin maado pirda pirdofte; pirday Xoossas gidida gishshas ay asaska babofte; inttefe bolla gididayssa ubbaa taakko ehite; hessa tani pirdana› gadis.
18 Intte ooththanaas bessizayssa ta inttes he wode lo7eththa yootadis.
Qaadeese Barineppe Dereza Yuuyi Wochchizayta Kiiteteth
(Tay 13:1-33)
19 «Hessafe guye nu GODAY nuna azazida mala Siina zumaappe dendidi intte be7ida iita bazzozara kanththidi Amoore deren shaara menththora aadhdhi biidi Qaadeese Barine gakkidos.
20 Tani inttes, ‹Xoossay nuna laatissanaas qaala gelida shaara menththo gidida Amoore dere hekko gakkideta.
21 He dereyo hanno be7ite! GODAY nu aawata Xoossay beni azazida mala intte gelidi izo laattite; baboftenne hidota qanxxofte› ga yootadis.
22 «Intte ubbatikka taakko yiidi, ‹He biittayn diza katamati ay malakko qasse nuna hee gaththana ogeykka ay mala ogekko bi wochchi simmidi nuus yootana asata nu garsafe ane dooroos› giidi tana oychchideta.
23 «Hessa histtanayssi taas lo7o misati beettiin intte garsafe qommaafe qommaafe issi issi as doorada tammanne nam7u asata yeddadis.
24 Isttika shaara menththo deraara kanththi biidi Eshkoole shoobba gakkanaas yuuyi xomosi xeellida.
25 Isttika heen ba be7ida miththaa ayfeppe amardayssa ekki yiidi GODAA nu Xoossay nuus immana qoppida biittaya keeha lo7o biitta gididayssa nuus qonccisi yootida.
26 «Gido attiin GODAA intte Xoossaa azazo bolla makkallida gishshas he biittayo gelanaas koyibeekketa.
27 Intte intte dunkaanen, ‹Xoossi nuna ixxides; izi nuna Gibxeppe kessiday hayta Amoore asatan nuna wodhisanaassinne istta kushen nuna aaththi immanaassa;
28 histtiin nu hee aazas bizonii? Nuni babboos; nuni kiittida asati heen diza asay wurikka minonne keehi adussata gididayssa qasseka istti diza katamata gimbey salo gakkidayssa nuus yootida; keehi adus gidida Enaaqe nayta be7ida› giidi zuuzumideta.
29 «Gido attiin tani inttes, ‹Hayta ha asatas baboftenne dagammofte.
30 Inttefe sinththara biza GODAA intte Xoossay kase intte ayfen be7ishin Gibxeta bolla ooththoyssa mala ha7ikka izi intte gishshas olettana.
31 Aaway ba naa al7isiza mala intte biza bazzo biitta ubbaan izi inttena kaaleththishe inttena saron hayssa wostti gaththidaakko intte beyideta.›
32-33 Ha ubbaa ta yootiinkka intte dunkkaanana sohoza bessanaassinne intte baana oge bessanaas omars tuussa taman, gallas tuussa mala shaaran inttena kaaleththida intte GODAAN ammanettibeekketa.
Xoossay Isra7eele Asaas Immida Qixaate
(Tay 14:20-45)
34 «Intte zuuzumida zuuzunththaa Xoossi siyidi hanqettides;
35 hessa gishshas, ‹Tani kase intte aawatas immana gaada caaqqida he lo7o biittayo ha iita yeletaappe issoyka gelenna.
36 Yoofine naa Kaalebey xalla he biittayo gelana; izikka kumeththa wozinappe ammanetti beettida gishshas he izi be7ida biittayo izassinne iza zereththatas ta immana› gi caaqqides.
37 «Intte gaason GODAY tana hanqettidi, ‹Muse nenikka he dereyo gelakka.
38 Gido attiin nena maaddiza Nawe naa Iyaasoy he biittayo gelana; he biittayokka laattana mala Isra7eele nayta kaaleththanay iza gidida gishshas ne iza menththeththa› gides.
39 «Qasseka GODAY inttes, ‹Intte nu nayti di7ettana› gida iitanne kiya shaakki erontta qii nayti xalla he biittayo gelana; tani he biittayo isttas immana; isttika he biittayo laattana.
40 Intte gidikko simmidi Zo7o abbaako efiza ogezara duge bazzo biite» gides.
41 «Intteka, ‹Musee! Nuni nu GODAA qohidos; ha7i GODAY nu Xoossay nuna azazida mala nu olettana› gideta; he shaara menththo dereyo worajjoy kawushsha miish misati beettiin issoy issoy olas giigettideta» gides.
42 GODAY gidikko, «Ta inttenara ke7ontta gishshas olas kezopite; intte ixxis gi kezikko intte morkketi inttena xoonana» giidi taas yootides.
43 Tanikka GODAY taas yootoyssa inttes yootadis shin intte ixxideta. Iza bollaka makkallideta; otoro daroppe dendidayssan intte he shaara menththo biittayo olanaas bideta.
44 He zumbullata bolla diza Amoore dere asati inttenara ola oykettida; istta olanchchati maththa mala intte bolla yiidi Horma gakkanaas inttena yedeththida; zumbullati dari uttida Eedoome deren inttena xoonida.
45 Hessa gishshas intte simmi yiidi GODAA sinththan yeekkideta; gido attiin izi intte yeehozanne waasoza siyidi inttena maaddanaas koyibeenna.
46 Histtiin intte Qaadeesen daro wode gam7ideta.