10
1 Hayqqida udunxxeti
shitto zeeqeththeettes;
hessaththoka guuththa eeyateththi
aadho erateththinne
bonchcho kawushshees.
2 Aadho eranchcha wozinay
iza ushach kaaleththees;
gido attiin eeya wozinay
hadirs kaaleththees.
3 Eeyay oge bishin
izas akeekay paccees;
ba eeyateththa oonaska qonccisees.
4 Ne goday ne bolla hanqettiko
ne soho yeddofa;
gaasoykka dandayay
gita hanqo
co7u histtees.
5 Salo gufanththon tani be7ida
iita miishshi dees;
hessika dere haarizaadefe
keziza bala.
6 Eeyati keehi dhoqqasohon uttiin
dureti hirki ziqqa sohon uttida.
7 Aylleti daannata mala togan bishin
daannati qasse aylleta mala
tohon bishin be7adis.
8 Olla bookkiza asi he ollan
izi kundana;
qasse dirsa laalliza as
shooshshi dukkana.
9 Shuch dhoqallizay
he shuchchaan deshettees;
qasse mith qerizay
he miththaan qohettees.
10 Dun7e kaltta leefontta ooththiko
daro wolqqa wursees;
gido attiin hiillan ooththiko
oosoza ayfisees.
11 Shooshshi muurennon
jallanaappe sinththan dukkiko
muurennizaade aykkoka go7enna.
12 Aadho eranchchaa doonappe
keziza qaalay
puulan kumidaaza;
gido attiin eeyay barkka
ba inxarsan dhayees.
13 Koyroppe doommidi
iza qaalay eeyateththa;
wurseththankka iita goosh gidees.
14 Eeyay haasaya darssees;
buroppe hananayssa
erizay deenna;
hayqqidaades izappe
guyen hananayssa
oonee izas yootana dandayzay?
15 Eeya oosoy
ooththizaade daaburssees;
izi katama
gaththiza oge erenna.
16 Hanne ne kawoy
yelaga gididaaree!
Ne daannati wonttara
gibira giigsiza biittayee
nees aayye ana!
17 Hanne ne kawoy bonchchettida
zareppe gididaaree!
maththottanaas
gidontta minettanaas
koshshiza wode miza daannati
diza biittayee!
Neni anjjettidaaro.
18 Addey azalla gidikko
kaaray yarphattees;
iza kusheti daaburkko
keeththi aaththees.
19 Gibiray miicisees;
woyne ushshi as ufayssees;
miishshi diikko miishshi hanees.
20 Qofankka gidiin kawo kadhoppa;
ne aqiza kifilen dashe
dure qanggofa;
qefen piradhdhizaara
ne gizayssa
efa gaththana dandayawus.