7
De7o Gishshas Qofa
1 Lo7o shittofe
lo7o sunththi aadhdhees;
yeleta gallassafe
hayqo gallassi lo7o.
2 Gibira keeth buussafe
yeeho keeth buussi lo7o;
gaasoykka hayqoy
as ubbaas wurseththa;
shemppora paxa diza
asi ubbay
hessa ba wozinan
woththanaas bessees.
3 Miichchafe kayoy kiya;
gaasoykka kayoy
sinth kareththikokka
wozina poo7isees.
4 Aadho eranchcha wozinay
kayo keeththan dees;
eeyata wozinay gidikko
ufayssa keeththan dees.
5 Eeyati sabbishe yexxiza
yeth siyanaappe
aadho eranchchay seeriza
seera ezgoy lo7o.
6 Eeyata miichchi
oto garsan eexxishe
dhuuqettiza agunththa mala;
hessika hada.
7 Gene oosoy aadho eranchcha
eeya kessees;
maganxoy asas wozina moorees.
8 Issi miishshas doomeththafe
wurseththi kiya;
qasse otoranchchafe
dandayanchchay kiya.
9 Eeyata hanqoy
istta ki7o garsan diza gishshas
neni hanqos eesotoppa.
10 Neni, «Ha wodey
kase aadhdhida wodetappe
ays lo7idee?» ga oychchofa;
heytantta mala oyshata oyshoy
aadho erateth gidenna.
11 Aadho erateththi lo7o xinxxo mala;
iza go7ay
poo7o be7iza as ubbaassa.
12 Miishshi as iitappe
kammi ashshiza mala
aadho erateththi ashshees.
Hessafe bollarakka
aadho erateththi
keeththa aawa shemppo naagees.
13 Ane Xoossay ooththidayssa
wozinan woththa!
Izi bokkasidayssa
ooni luulisana dandayzee?
14 Nees wodey lo7ishin ufayetta;
gido attiin wodey iitishin
hayssa wozinan woththa;
Xoossi issaa ooththida mala
harakka ooththides;
hessa gishshas asi
sinththafe hanana miish
aykkoka pilggidi
erana dandayenna.
15 Nagaranchchay ba nagaraara
adussa layth de7ishin,
xilloy ba xilloteththara
eeson hayqqishin
hada gidida ta de7o layththatan
hayta be7adis.
16 Hessa gishshas ne dhayontta mala
keeha xillo,
woykko keeha
aadho eranchcha gidoppa.
17 Qasse keeha iita as,
woykko ubbaa eeya as gidoppa;
ne ays wodey baynda hayqqay?
18 Issaa oykkidi hankkoyssaka
yeddontta agoy lo7o;
Xoossas yayyiza asi
shikkalateth ixxees.
19 Aadho erateththi aadho eranchchas
immiza wolqqay
issi kataman dere haariza
tammatappe aadhdhees.
20 Nagara ooththontta
mulera suure oosoninne
xilloteththan xalla kanththiza asi
biitta bolla deenna.
21 Haasayettiza qaala ubbaa hayth
yegga siyoppa;
ne histtontta aggiko
ne ashkaray nena qanggishin
ne siyandasa.
22 Qasse nenikka ne hu7en
harata qanggoyssa
ne wozinay erees.
23 Hayssa ubbaa tani
aadho erateththan
pilgga xeellada,
«Tanikka aadho eranchcha
gidanaas qachchadis» gadis.
Gido attiin tani
gida mala hanibeenna.
24 Aadho erateththi ay gidikkoka
keehi ciimmanne haako;
histtiin ooni gakki
erana dandayzee?
25 Hessa gishshas aadho erateththinne
yo7oti hanizayssa pilgga eranaas,
xanna7anaas nagara
iitateththinne
eeyateththi gooshshateth
gididayssa
akeekanaas ta wozinan
yuushsha qoppadis.
26 Izis wozinay woximade mala,
izi kusheti agrimooqe malanne
yarde mala gidida
hayqoppe iita
maccas be7adis;
izippe kessi ekkanay
Xoossas yayyiza as xalla;
nagaranchcha as gidikko
yarden oykkawus.
27 Aadho eranchchazi,
«Tani kaalla pilgga
xeellada demmida
hara miishshi
hayssafe kaallizayssa.
Yo7oti hanizayssa
hiillateththan pilggidi
demmanaas
issaa issaa bolla gujjo;
28 Hessika tani hach gakkanaas
pilggashe dhaydayssa
shii attumasappe
issi suure as demmadis.
Gido attiin haytantta giddofe
issi suure maccas demmabeekke.
29 Tani hayssa ubbaafe
issi miish tamaaradis;
Xoossi as suure
histti medhdhides;
gido attiin asi
daro gitettidaaz giigsides» gides.