Hiziqeela Tinbite
Giddo Qofa
Nabe Hiziqeeli Yerusalaamey Kirstoosa yeletappe kase, 586 layththan laalettanaappe sinththaninne laalettidaappe guyen di7ettidi Baabiloonen de7ides. Izi tinbiten yootida qaalay di7etti biidi Baabiloonen dizaytasinne Yerusalaamen diza asatassa; Hiziqeela tinbite maxaafay oyddu ayfe yo7on shaakettees. 1. Asaa bolla Xoossa pirday yaana matidayssanne Yerusalaamey oykettada laalettana matidayssa qofsees (1-3). 2. Xoossay ba asaa un7eththidanne baleththida dumma dumma kawoteththata qaxxayanaas yootiza qaala (4-24). 3. Yerusalaame kundeththaafe simmiin Isra7eele asaa minththanaas imettida kiitanne sinththafe izis yaana lo7o qaada gishshas yootettida hidota qaala (25-39). 4. Xoossa keeththinne Isra7eele kawoteththay beniyssaththo hananayssa Hiziqeeli dumma mislen qonccisides (40-48).
Hiziqeeli gita ammanoynne akeekay diza asa. Sinththafe hanana yo7ota izi ajjuutan be7ides. Iza kiitatappe dariza baggati qonccen leemisora polettida. Hiziqeeli qonccisi bessiday giddo wozinaninne ayanan ooraththateth koshshiza gishshas issoy issoy ba nagara gishshas oyshettana; hessafekka bollara dereza ooraththateththan yaana hidota qonccisees. Hiziqeeli qeesenne nabe gidida gishshas Xoossa Keeththa gishshassinne geeshshateththa gishshas dumma wudettidayssa bessides.
Ha Maxaafay Oykkida Kumeththa Qofa
Hiziqeeli nabeteththas dooreteththinne Xoossa bonchcho be7o 1:1—3:27
Hiziqeeli leemison qonccisida Yerusalaamenne Yuhuda dhayo 4:1—5:17
Bashshi matidayssa qoncciseth 6:1—7:27
Xoossa bonchchoy nagaranchcha gidida Yerusalaame aggi buus 8:1—11:25
Yuhuda kundeththinne Yerusalaame kundeth 12:1—24:27
Hara kawoteththata bolla yootettida pirda 25:1—32:32
Derey ba nagarappe simmana mala Hiziqeeli immida seera 33:1-20
Yerusalaame kundeth 33:21-22
Xoossi deraa zaaranaassinne Yuhuda ashshanaas immida hidota 34:1—37:28
Googe xooneteththinne Isra7eele simo 38:1—39:29
Sinththafe oosettana Xoossa Keeththa gishshas Hiziqeeli be7ida ajjuuta 40:1—46:24
Xoossa Keeththa giddofe pulttiza haaththa 47:1-12
Isra7eeleta qommon qommon gakkana xinxxo 47:13—48:35
1
Godaa Bonchcho
1 Heedzdzu tammanththa layththan, oydanththo aginan, ichchashanththo gallassan, tani Koboore shaafan di7ettidi bidayta giddon dashe saloti doyettiin Xoossa ajjuuta be7adis.
2 Kawo Iyo7aakiney di7ettida ichchashanththa layththan, he aginan ichchashanththo gallassan,
3 Baabiloonen Koboore shaafa matan diza Buuze naa qeese Hiziqeelakko GODAA qaalay yides; GODAA wolqqay tana oykkides.
4 Tani dhoqqu ga xeellishin pudeha baggafe gote carkoy yizayssa be7adis; izappe wolqqanththi wawaci giza dhippi gida shaaraa gita poo7oy giddoththi woththides; tamazas giddo adday birata bonqqo misatees.
5 Tamaza giddon shemppora paxa diza oyddu medheteththata misley dees; istta medhaykka asa medha misatees.
6 Isttas issaas issaas oyddu ayfesoynne oyddu qefey dees.
7 Isttas sitti gida luule tohoy dees; istta tohoy mara qinccifille malanne qucettidi xolqiza xarqimala misatees.
8 Isttas oyddu baggara qefeta garsan asa kushey dees; he oyddatasikka ayfesotinne qefeti deettes.
9 Istta qefeti issoy issaara diishetteettes; istti ubbayka guye simmi xeellontta sitti giidi sinth beettes.
10 Istta ayfesoy hayssafe kaalli dizayssa mala; istta oyddatasikka issaas issaas sinththa baggara asa ayfeso malay dees; ushachcha baggara gaammo ayfeso malay, hadirsa baggara boora ayfeso malay, qasseka istta issaas issaas guye baggara golle ayfeso malay dees.
11 Istta ayfesoy hessa misatees; istta qefey pude yangetti uttides; isttas issaas issaas nam7u nam7u qefey dees; issaa issaa qefey hankkoyssa qefera diishetti uttides.
12 Istti ubbayka sitti giidi sinth beettes; guye simmontta Xoossa Ayanay bizaso awakka beettes.
13 Ha shemppora paxa diza medheteththata medhay eexxiza tama bonqonne xomppe misatees; he shemppora paxa diza medheteththata giddon tamay yaanne haa qaaxxees; tamazi phoollees; iza giddofekka wolqqanththi kezees.
14 Ha shemppora paxa diza medheteththati wolqqanththi eeson wawaci giza mala yaanne haa simeretteettes.
15 Ta ha oyddu shemppora paxa diza medheteththata xeellashe, oyddu ayfesoti shemppora paxa diza medheteththata matan issi issi irzo biitta bolla beyadis.
16 He irzota medhaynne hanotay hayssafe kaallizayssa mala; al7o shuchcha mala xolqeettes; oyddata medhaykka issi mala; issi issi irzoy hara irzora qaxetti uttidaa misatees.
17 Istti biza wode medheteththati oyddu bagga yuuyana dandayeettes; medheteththati biza wode irzoti yaanne haa geettenna.
18 He oyddu irzotas odzdzodzdzoy dees; ha oyddu irzoti gitanne babisizaaza; yuuyi aadhdhanaaska isttan ayfeti kumida.
19 Ha shemppora paxa diza medheteththati biza wode istta millen diza irzotikka beettes; he shemppora paxa diza medheteththati biittafe pude dendiza wode irzotikka isttara issife dendeettes.
20 Xoossa Ayanay bizaso awakka istti beettes; ayanay istta giddon diza gishshas irzoti isttara issife pude dendeettes.
21 De7oy diza medheteththati biza wode irzotikka beettes; istti eqqiza wode irzotikka eqqeettes; qasse irzoti isttara issife pude dendeettes.
22 Ha shemppora paxa diza medheteththata hu7eppe bollara babisizanne mastoote mala xolqidi ayfe caddiza salo gufanththo misatizay micetti dees.
23 He salo gufanththozappe garsa baggara istta qefey sitti giidi, issoy issaakko micetti uttides; qasse istta ubbaasikka istta bolla kammiza nam7u nam7u qefey dees.
24 Ha shemppora paxa diza medheteththati piradhdhiza wode istta qefeta giirissa siyadis; he giirissay di7o haaththa gunththa mala, Ubbaa Dandayza Xoossa cenggurssa malanne cora olanchchata wocama mala hanizayssa siyadis. Istti piradho aggiza wode bantta qefeza shiphphi histteettes.
25 Istti piradhdhizayssa aggidi bantta qefeza shiishshida mala istta hu7eppe bollara diza salo gufanththofe bollara giirissi seetettides.
26 Isttafe bollara diza salo gufanththofe dhoqqu giidi simpere araata misatizay dees; he araataa bolla as misatizaazi uttides.
27 Izas xees misatizasoppe pude baggay taman bonqqida birata misatizayssa; xees misatizasoppe duge baggay tama misatizayssa be7adis; iza yuushon phoolliza poo7oy dees.
28 Iza yuushon diza phoolliza poo7oy ira gallas shaara bolla eqqida zuulla misatees.
Hessika GODAA bonchcho qoncceth misatees. Tani hessa be7ida wode, biittan duge gufannada issaade haasaya cenggurs siyadis.