19
Isra7eele Daannata Gishshas Zilalettida Zilas
1 GODAY, «Isra7eele daannata gishshas zilas zilalana mala taas yootides;
2 izikka taas,
« ‹Ne aaya kase
gaammota giddon
ay mala gaammoo!
Wodalla gaammota
giddon ichchadus;
ba maratakka heen dichchadus.
3 Ba maratappe issaa iza dichchiin,
izi mino gaammo gidides;
izi shankkateth tamaaridi
as mides.
4 Kawoteththati ubbay iza hano siyida;
istti bookkida ollan
gelidi oykettides;
isttika iza siidhen dafo aaththi
goochchidi Gibxe biitta efida.
5 « ‹Iza hidota ooththidayssi
calqamidayssa,
iza naagidayssi polettonttayssa
be7ida wode,
ba marata giddofe
nam7anththoza dichchada,
mino gaammo kessadus.
6 Izi gaammota giddon noochu gides;
minni minnika bides;
wodhi muus eridi asaakka mides.
7 Izi istta miixa menththereththides;
istta katamatakka kayzisides;
Biittaynne biittan diza asay ubbay
iza xaagoppe dendidayssan
kokkorida.
8 Iza yuushon diza kawoteththati
ubbay iza bolla dendida;
bantta dere ubbaafe
iza bolla shiiqida;
bantta gite iza oykkana yeggida;
izi istta ollan
gelidi oykettides.
9 Siidhen dafo yeggidi
kooththa giddon gelththida;
Baabiloone kawookko efida;
Nam7anththo iza cenggurssi
Isra7eele zumata bolla
seetettontta mala,
istti iza qasho keeth gelththida.
10 « ‹Ne aaya haaththa
doonan tokettida
woyne tura mala;
goshsha gaden daro haaththi diza
gishshas, daayida ayfida
woyne tura misatadus.
11 Izi haggati kawoteththas
bessiza mino guufeta.
Cippi gida hayththata giddon,
ba adussateththaninne
ba cora haggatan
lo7a beettadus.
12 Gido attiin hanqon dhoqallettadus;
duge biittan olettadus;
arshey mokkiza bagga carkoy
izo melissides;
iza ayfida ayfeza qoqofides;
mino izi haggati dagammida;
tamaykka istta mides.
13 Ha7i haath saamettida mela biittan
bazzon tokettadus.
14 Izis wogga haggata
issaafe tamay kezides;
iza ayfida ayfeza mides;
kawoteththas gidiza issi mino
haggayka attibeenna;
hayssi zilassa; ceece gallas
milassas gidana› ga» gides.