32
Paaroone Gishshas Zilalettida Zilas
1 Nuni di7ettida tammanne nam7anththo layththan, tammanne nam7anththo aginan, koyro gallassan GODAA qaalay taakko yiidi,
2 «Haysso asa nawu! Gibxe kawo Paaroones zilalashe,
« ‹Neni kawoteththa giddon
gaammo mala;
abba giddonkka miimintte mala;
neni shaafatan bobolccu gaasa;
haaththata ne tohon wadhdhaasa;
pulttota uullosaasa.
3 « ‹Ubbaa Haariza GODAY:
daro dere shiishshada,
ta giteza ne bolla yeggana;
istti nena ta gitezara
goochchi kessana.
4 Ta nena biitta bolla yeggana;
demba bollaka miccana;
salo kafoti ubbay
ne bolla uttana mala
ta ooththana;
wora do7ati ubbay
nena yiiqeti mi kallana.
5 Tani ne asho zumata bolla laallana;
zulletakka ne ahan kunththana.
6 Biittaa ne suuththan ta caphisana;
neeppe goggizayssi zulleta kumidi
zumata gakkanaas diza
oge ubbaa kammana.
7 Ta nena dhayssiza wode
salota goozana;
istta xoolinttetakka dhumisana;
awakka shaaran kammana;
aginaykka ba poo7o diggana.
8 Salon poo7isiza poo7ota ubbaa,
ne bolla ta dhumisana;
ne biittaa bolla
ta dhuma ehana› gees.
9 «Ne bolla yida bashshaa
ta sissiza wode
ne erontta biittan
kawoteththata giddon,
daro asata wozina ceecisana.
10 Daro asay ne bolla gakkida meton
dagammana mala ta ooththana;
tani ta mashshaa istta sinththan
shodda seessishin
ne bolla gakkida hanoza gaason
istta kawoti dagaman
nozhzhu gaana;
neni kundiza gallas issoy issoy
ba shemppos
yashshan ayfe qiphon kokkorana.
11 «Ubbaa Haariza GODAY
Gibxe kawos,
‹Baabiloone kawo mashshay
ne bolla yaana.
12 Kawoteththata ubbaafe
keehi menxe iita gidida,
wolqqama asata mashshan
ne shiishshida olanchchati
kundana mala ta ooththana;
Gibxe otoreteththaa
istti kundisana;
izis cora olanchchatakka
dhayssana.
13 Daro haaththa matan diza
izi wudeta ta dhayssana;
hessafe guye asa tohon
yedhettettenna;
mehe tohoy uullosenna.
14 Histtada ta izi haaththata xillisana;
izi shaafata zayte mala
ta gogisana.
15 Ta Gibxe bulasishin
biittayn dizay ubbay dhayshin,
heen diza ubbaa tani shocishin,
tani GODAA gididayssa istti
he wode erana› gees» gides.
16 Ubbaa Haariza GODAY, «Hessi ubbay izi gishshas zilalettiza zilassa; kawoteththata macca nayti zilalana; Gibxessinne izi cora olanchchata gishshas zilalishe koyzana» gees.
Gibxes Wurseththa Kayo
17 Nuni di7ettida tammanne nam7anththo layththan, he aginan, tammanne ichchashanththo gallassan GODAA qaalay taakko yiidi,
18 «Haysso asa nawu! Gibxe olanchcha corata gishshas yeekka! Izonne wolqqama kawoteththata macca nayta duge duufon gelizaytara issife duge biitta gars gelththa.
19 Neni isttas, ‹Intte haratappe aadhdhidi lo7eetii? Duge wodhdhada ammanonttaytara issife ichcha› ga yoota.
20 Istti mashshan siifettidayta giddon kundana; mashshay shodettides; iza ba daro oosanchchatara issife gooshettu.
21 Duufo giddon wolqqama halaqati Gibxe gishshassinne izira zuppetizayta gishshas istti duge wodhdhidi, ‹Mashshan hayqqidaytaranne ammanonttaytara issi bolla ichchida› gaana.
22 «Asoorey ba kumeththa olanchchatara dawus; izippe mashshan kundidaytanne siifettidayta duufon doodetta uttadus.
23 Istta duufoy ciimma olla giddon dees; izi olanchchati izi duufo yuushon korettida; paxa dizayta biittan shiro denththidayti ubbay shukettida; mashshankka wurida.
24 «Elaama heen dawus; izi olanchchati ubbay izi duufo yuuyi aadhdhi deettes; ubbatikka shukettida; mashshankka hayqqida; paxa dizayta biittan shiro denththida ubbati ammanontta biitta gars gelida; duge biitta gars gelidaytara issife yeella may7i gelida.
25 Izi duufo yuushon diza kumeththa olanchchatara shukettidayta giddon hiixay izis giigettides. Istti ubbay ammanonttaytanne mashshan siifettidayta; istta shiroy shemppora paxa dizayta biittan worekettida gishshas duge duufon gelizaytara issi bolla yeella may7ana; shukettidayta giddon istti ichchana.
26 «Mesheekeynne Tubaale duufoy bantta olanchchata duufon doodetti uttana; istti ubbayka ammanonttayta gidi uttidi shemppora paxa dizayta biittan ba shiro denththeththida gishshas mashshan hayqqida.
27 Daro layththafe kase hayqqida ola qarati bantta mashsha borkotidi, bantta gondalle bantta tira bolla oykkidi, bantta kumeththa ola miish ubbaara duufon gelidayta mala bonchchon moogettibeettenna. Ha olanchchati shemppora paxa dizayta biittan diza wolqqama asata bolla shiro denththida gishshas istta nagara qixaatey istta meqeththa bolla shempana.
28 «Paaroone! Nenikka hessaththo meqqana; mashshan siifettidaytaranne ammanonttaytara ne issi bolla ichchana.
29 «Eedooma heen de7awus; izi kawotinne izo haarizayti ubbay heen deettes; istti wolqqara dizayta gidikkoka mashshan siifettidaytara, duge duufon gelidaytaranne ammanonttaytara issi bolla ichchida.
30 «Pudeha bagga haarizaytinne Sidoonati ubbay heen deettes; hayssafe kase istti ba wolqqan ammanettidi shiro denththidayta gidikkoka shukettidaytara issife yeellan kundida; mashshan siifettidayta ammanonttaytaranne duge duufon wodhdhidaytara issife yeella may7i ichchana.
31 «Paarooneynne iza olanchchati ubbay istta be7ana; mashshan siifettida ba olanchchata ubbaa kayoppe izi minettana.
32 Tani hayssafe kase kawoteththati ubbay Gibxe kawos yayyana mala shemppora paxa dizayta biittan shiroy aakkana mala koykkoka Paarooneynne iza olanchchati ubbay mashshan siifettidaytaranne ammanonttaytara issife ichchana; tani Ubbaa Haariza GODAY hayssa yootadis» gides.