Phawuloosi
Efesoone Asaas
Xaafida Kiita
Giddo Qofa
Phawuloosi Efesoone asaas xaafida kiitay harappeka kasetidi izi lo7eththi xeellizay, «Xoossa sheney polettanay saloninne Sa7an diza medheteththati wurikka issife issi Kirstoosa Godateththaa gars aadhdhiza wodey gakkishinna» (1:10) giza qofaa bolla. Qasseka Godaa Yesus Kirstoosa issifeteththaan asa zereththi wurikka issino gidana mala hayssa gita qofaa ooson peyshshana mala Xoossa dereza qofsizaaza.
Efesoone kiitaan koyro kifileza xaafezi issifeteththa gishshas doommidi ayfe yo7oza aassidi Xoossa Aaway dereza wostti dooridaakko, ba naaza Yesus Kirstoosa baggara istti ba nagarappe maaroteth demmidi waani attidaakonne Xoossa gita hidotaa qaalay Xillo Ayana baggara waani qonccidaakko erisees; nam7anththo kifilezan qasse xaafezi nababizayti issifeteththa de7on Kirstoosan isttas diza issifeteththay tumu gidana mala istti waani waani de7anaakko istta qofsees.
Asay Kirstoosan diza issifeteththaan ay mala issifeteththi isttas dizaakko dumma dumma haasaya qommotan qonccides; Woosa keeththi Kirstoosa asateth gidishin Kirstoosi qasse asateththas hu7e mala. Woosa keeththaya gimbe keeththa mala gidishin Kirstoosi qasse keeththas gulan uttiza shuchcha mala; Woosa keeththiya machchi mala gidishin Kirstoosi qasse azina mala; xaafezi Kirstoosa baggara qonccida Xoossa kiyateththaa keehi dhoqqisi yootiza wode ciimmateththi diza qaalan yootees. Ubba miishsheka izi xeellizay Kirstoosa siiqon, iza yarsheteththan, iza maaroteththan, iza kiyateththaninne iza saroteththa baggarakko!
Ha Maxaafay Oykkida Kumeththa Qofa
Geloso 1:1-2
Kirstoosanne Woosa Keeth 1:3—3:21
Kirstoosan gidida ooraththa de7o 4:1—6:20
Kuushsha qofa 6:21-24
1
1 Xoossa shene mala Yesus Kirstoosa Hawaare gidida Phawuloosappe, Yesus Kirstoosan diza ammanettizaytas Efesoonen ammaniza asaas,
2 nu Aawaa Xoossafenne Godaa Yesus Kirstoosappe kiyateththinne saroteththi inttes gido.
Kirstoosappe Beettiza Ayana Anjjo
3 Nu Godaa Yesus Kirstoosa baggara salon Ayana anjjo ubbaan nuna anjjida Godaa Yesus Kirstoosa Aaway Xoossi anjjetto.
4 Nu iza sinththan geeshshinne wosoy bayndayta gidana mala buro alamey medhettanaappe kase ba siiqon Kirstoosa baggara nuna doorides.
5 Yesus Kirstoosa baggara nu iza naa gidana mala ba lo7o qofaan koyro ubbaa woththides.
6 Hessika ba dosizaade baggara coo mela nuus imettida bonchcho kiyateththi galatettana malassa.
7 Xoossa aadho kiyateththa dureteththaafe dendoyssan Yesusa suuththan wozzettidi nagarappe nu maarettidos.
8 Izi ba kiyateththaa, hiillateththaninne erateth ubbaan nu bolla keehi darssides.
9 Xoossi qoppida ba xuura qofaa Kirstoosa baggara ba lo7o qofaa mala nuna erisides.
10 Buroppe wode wurseththan hananaas diza iza qofay salo bollanne biitta bolla dizaytas ubbaas hu7e gidida Yesus Kirstoosappe ubbaa gars aaththanaassa.
11 Wursika ba shene mala ooththiza iza shenen koyrokka izi qoppi woththidayti nuni izan doorettidos.
12 Nuni kasetidi Kirstoosa baggara ekkana giidi ufayssan naagizayti Xoossa bonchcho galatan qonccisanaassa.
13 Intteka qasse tumaa qaalaa hessika inttena ashshiza Mishiraachcho qaalaa siyidi Kirstoosan ammanideta; iza ammanidi kase imettana geetettida Xillo Ayana maatamen attamettideta.
14 He Ayanazikka iza bonchcho galatan qonccisana mala Xoossi baas gididayta ubbata wozzana gakkanaas nu laatas oyso.
Galatanne Woosa
15-16 Hessa gishshas intte Godaa Yesusa ammanida gishshassinne ammaniza asaa intte siiqizayssa ta siyoosoppe haa simmiin inttena qoppa qoppa ekkada tani ta woosan intte gishshas Xoossas galata shiisho aggabeekke.
17 Bonchcho Aawaa gidida nu Godaa Yesus Kirstoosa Aawaa Xoossaa intte lo7eththi erana mala qonccisiza Ayanaynne erateththa Ayanay inttes imettana mala ta inttes pacey baynda woossays.
18 Hessaththoka intte izan xeygettida ufayssay hessika ammanizayta achchan diza iza dureteththi aazakkonne intte erana mala intte wozina ayfey poo7ana mala woossays.
19-20 Nuus ammanizaytas ubbaafe bolla gidida iza wolqqa dhoqqateth intte erana mala ta woossays; he wolqqayka iza gita minoteththaa ooson bessidayssi hayqoppe Kirstoosa denththidi salon ba ushachchan utissida Kirstoosa baggara.
21 Ayssizaytappe, godateththafe, wolqqafenne kawoteththafe qasseka ha7i xalla gidontta buroppe yaana wodekka gidiin sunth ubbaafe izi bolla.
22 Xoossi hara wursi iza tohoppe garsan haarisides; Woosa keeththankka ubbaa bolla hu7e ooththides.
23 Woosa Keeththiya Kirstoosa asateththa; he izakka ubbason ubba miish kunththiza he iza kumeththa.