Izra
Giddo Qofa
Izra maxaafay hanidaaz zaari yootiza maxaafa nam7atappe kaalliza maxaafa gidishin izi yootizay Baabilooneppe simmida guuththa ayhuda asay simmidayssanne Yerusalaamen asaa duussaynne goyno wogay ooraxidayssa yootees; heytikka hayssafe garsa baggara dizayta.
1. Paarise kawo Qiroosa piqaaden Baabiloone di7etti bidaytappe koyro simmidayta (1-6).
2. Xoossa Keeththazi simmi keexettidi anjjettiin asay Yerusalaamen Xoossas goyno doommides (7-8).
3. Daro layththatappe guye Xoossa woga eranchchaza Izira kaaleththon Ayhuda asay guye Yerusalaame simmides; Izray Xoossa keeththa miishshata istti kase dizaso zaaranaas derezi ba ayana duussanne sa7a duussa zaari essanaas maaddides (9-10).
Ha Maxaafay Oykkida Kumeththa Qofa
Ayhuda asay di7etti bidasoppe guye simo 1:1—2:70
Yarsho yarshizasoza zaari oosonne Xoossaa keeththaa keexo doometh 3:1—4:6
Yerusalaame zaari keexxishin gakkida meto 4:7-23
Xoossa Keeththaa ooso poleteth 4:24—6:22
Izray Ayhuda asaa kaaleththidi Yerusalaame buus 7:1—8:36
Ayhudati Ayzaabetappe ekkida machcheta anjji yeddana mala shiiqida qofa 9:1—10:44
1
Ayhudati Simmana Mala Kawo Qiroosa Awajja
1 Qiroosi Paarise deren kawotida koyro layth Xoossay Qiroosa ayana denththeththidi izi ba kawoteththa ubbaan awajja awajjidinne he awajjaa xaafi woththana mala ooththides; hessika haniday kase nabe Ermaasa baggara Xoossi yootida qaalay polettana malassa.
2 Paarise kawo Qiroosi awajjan kessida azazoy, «GODAA Salo Xoossay tana biitta kawoteththata ubbaa ayssana maata taas immides; Yuhuda biittan diza Xoossa Keeth Yerusalaamen ta izas keexxana mala azazides.
3 Intte giddofe Xoossa as gididayssara Xoossi gido; Yuhuda deren diza Yerusalaame katama biidi GODAA Isra7eele Xoossa Keeththaa keexxo.
4 Hayqoppe attidi ba dere simmizaytas heen ba dizason attizayti Yerusalaamen diza Xoossa Keeththaa keexos immiza imotaappe bollara bira, worqqa, Mehetanne hara miishshata gujji imon maaddetto; hessika istti bantta dosan immiza imota gido» gees.
5 Hessafe guye Yuhudanne Biniyaame zereththata daannati, qeeseti, Lewetinne Xoossay wozina denththeththida asay wuri simmi baanaassinne Yerusalaamen diza Xoossa Keeththa zaari keexxana giigetti dendida.
6 Dooththatikka wuri ba kiyateththan immida imotaa bolla gujjidi birappenne worqqafe oosettida miishshata, dumma dumma soo giddon go7ettiza miishshatanne meheta Xoossa Keeththan muxuwaata gidiza hara go7iza miishshata immi maaddida.
7 Kawo Qiroosi kase kawo Nabukadanaxoorey Yerusalaamen diza Xoossa Keeththafe bonqqi ekki efidi ba eeqa xoossa keeththan woththida Xoossa miishshaa ubbaa zaari immides.
8 Paarise kawo Qiroosi minjja keeththa daanna Mitiradaaxu baggara Xoossa Keeththa miishshati yaana malanne Yuhuda dere ayssiza Sesabisaares sheedhdhides.
9 Simmida miishshati hayssafe kaalli dizayta; Worqqafe oosettida saaneti 30, Birappe oosettida saaneti 1,000 hara dumma dumma saaneti 29;
10 Worqqafe oosettida guuqa saaneti 30 birappe oosettida qeeri saaneti 410 go7iza hara miishshati 1,000.
11 Sesabisaarey di7ettida asatara gididi Baabilooneppe Yerusalaame simmi yishe ekki kezida miishsha qooday issi bolla 5,440.