15
Muse Yeththa
1 He wode Museynne Isra7eele asay hayssa mazamureza GODAAS yexxides;
«Bonchchon izi keehi
dhoqqu dhoqqu gida gishshas,
tani GODAAS mazamure
yexxana.
Paranne para toggida asaa
abba giddon yeggides.
2 GODAY taas
wolqqanne mazamure;
izi tana ashshides.
Izi ta Xoossa;
tani iza sabbana.
Izi ta aawa Xoossa;
tani iza
dhoqqu dhoqqu histtana.
3 GODAY olanchcha;
iza sunththika GODAA.
4 Gibxe kawo para-gaaretanne
iza olanchchata
abban wursides;
ubbaafe aadhdhi doorettida
Gibxe kawo halaqati,
Zo7o abbaan mitettida.
5 Ciimma haaththi
istta kammides;
istti shuchchaththo
ciimman mitettida.
6 «Abeet GODAWU!
Ne ushachcha kushey
wolqqan goobides;
GODAWU ne wolqqama
ushachcha
kushey morkke
menththereththides.
7 Ne gita wolqqaan
nenara eqettidayta
kundisadasa.
Eexxiza ne hanqo ne yeddadasa,
izikka istta
gafe mala mides.
8 Ne peenoy
haaththaa pude essi doorides.
Goggiza haaththika goda mala
minni eqqides;
ciimma giddon diza haaththi
abbaa giddon irkkides.
9 «Morkkey ceeqettishe,
‹Tani istta yedeththa oykkana.
Tani istta haaro shaakkada,
ta koyidayssa ubbaa ekkana.
Tani ta giththa
mashsha shoddada,
istta dhayssana› gides.
10 Gido attiin neni istta
ne peenon punniin,
abbay istta kammides.
Istti wolqqama haaththan
biratay mitettiza mala
mitettida.
11 «Abeet GODAWU!
Eeqa xoossata giddon
ne malay oonee?
Geeshshateththan
bonchchettizay,
bonchchon babisizaynne,
malalisiza miish ooththizay
ne malay oonee?
12 Neni ne ushachcha
kushe piddisadasa,
biittayka istta mittides.
13 «Ne wozzida ne asaa
wurontta ne siiqon
kaaleththadasa.
Neni ne wolqqan
istta ne aqiza
geeshsha soo gelththadasa.
14 Dere asay
hessa siyidi kokkorides.
Filisxeeme biitta asatakka
hirga miixay oykkides.
15 He wode Eedoome biitta
halaqati dagammida.
Mo7aabe biitta haarizayti
hirgan kokkorida.
Kanaane dere asay
wuri seerides.
16 Abeet GODAWU!
Dagamaynne hirgay
istta oykkana.
Istti ne wolqqa
gitateth be7idi,
ne asay aadhdhana gakkanaas,
neni wozzida asay
aadhdhana gakkanaas,
shuchcha mala toletti eqqana.
17 Neni istta ehada,
nees buzo biittan diza
zuma hu7en tokkana.
Abeet Mernaa Godoo,
he sohoy
neni nees deyanaas
ooththida sohokko.
Abeet GODAWU! He geeshsha sohoy
neni ne kushen
minththa essida sohokko.
18 GODAY mernaappe
mernaa gakkanaas kawotana.»
19 Gibxe kawo parati wuri, para-gaaretinne toga asati abbaan gelida wode GODAY istta bolla abba haaththaa guye zaari ehides; gido attiin Isra7eele asay abbaa giddora mela biitta bollara hemettidi pinnides.
Maarami Yeththa
20 Aaroone michcheya, nabe Maarama karabe ekkadus; maccassay wuri karabe baqqidi yexxishenne guppishe izo kaallides.
21 Maarama isttas mazamureza yexxashe,
«GODAY keehi dhoqqu dhoqqu
gida gishshas
izas yexxite.
Paranne para toggidayta
izi abban olides»
ga yexxadus.
Camo Haath
22 Hessafe guye Musey Isra7eele asaa Zo7o abbaafe pinththiin istti Shuura geetettiza bazzo bida. He bazzon istti haath demmontta heedzdzu gallas hemettida.
23 Istti Maara geetettizaso gakkida wode Maara haaththi camo gidida gishshas uyana dandaybeettenna; hessa gishshas he sohoy Maara geetettides.
24 Asaykka, «Nuni ay uyanee?» giidi Muse bolla zuuzumides.
25 Musey GODAAS waassiin GODAY iza issi mith bessides; Musey he miththaa haaththaan yeggiin haaththay mal7ides.
Heen GODAY isttas woganne maara kessidessinne istta paaccides.
26 Izi isttas, «GODAA intte Xoossay yootizayssa intte lo7eththi siyikko, iza ayfe sinththan lo7o ooththiko, intte iza azazo wozinan woththi naagikko, iza wogaakka ubbaa naagikko, tani Gibxe asaa bolla ehida hargefe issaaka intte bolla ehikke; gaasoykka tani inttena paththiza GODAA» gides.
27 Hessafe istti tammanne nam7u haaththa pulttotinne laappun tammu zamba miththati dizaso Eelaame yiidi heen haaththa doonan uttida.