Phawuloosi
Galatiya Asaas
Xaafida Kiita
Giddo Qofa
Yesusi ashshizaade gididayssa yootiza Mishiraachcho qaalay ubbason Ayzaabetas sabbakettiin asay ammani ammani darshin, «Ammanizaade gidanaas kase Muse wogaa poli naaganaas koshshizeyee? Koshshennee?» giza oyshay dendides; qeeri Iisiya geetettizason Oroome kawoy haarizason Galatiyan diza ammaniza asaa garsan, «Asi Xoossa achchan xillo gidanaas Yesusan ammano xalla gidontta Muse baggara imettida wogaza polo koshshees» giidi Phawuloosara eqettizayti deettes.
Phawuloosi qasse Galatiya kiitaa xaafiday hayssa ha timirtezan balettida asati tuma timirtekkonne tuma ammanookko zaaranaassa; Phawuloosi Yesus Kirstoosa Hawaare gididayssa qoncciseththan doommees; iza Hawaareteththas xeygiday Xoossa attiin izi asa xeyssan kiitettonttayssanne qasse izi kiitettiday Ayhuda asaakko gidontta Ayzaabetas gididayssa ubbaa birshi yootees. Wurseththa shempota garsan ammano duussi Yesusa ammanon beettiza siiqoppe gididayssa lo7eththi yootees.
Ha Maxaafay Oykkida Kumeththa Qofa
Geloso 1:1-10
Phawuloosas imettida Hawaareteththa maata 1:11—2:21
Xoossa kiyateththa Mishiraachcho qaala 3:7—4:31
Ammanizayta goqateththinne ammano 5:1—6:10
Kuushsha qofa 6:11-18
1
1 Asi kiittidaade gidontta Yesus Kirstoosa hayqoppe denththida iza Aawaa Xoossaafe kiitettida Phawuloosappe,
2 tanara diza ishata ubbaafe Galatiyan diza Woosa Keeththatas,
3 nu Aawaa Xoossaafe Godaa Yesus Kirstoosappe Xoossa kiyateththinne saroy inttes gido.
4 Nu Aawaa Xoossaa shene gidiin iita alamezappe nuna ashshanaas bana aaththi immidayssas,
5 merippe mernaa gakkanaas izas bonchchoy gido.
Mishiraachcho Qaalay Mexi Issino
6 Intte Kirstoosa kiyateththan xeygidayssa aggaagidi hara dumma shaako Mishiraachcho qaalaakko simmidayssi tana daro malalisees.
7 Ta hessa gida gaasoykka inttena baleththizaytinne Kirstoosa Mishiraachcho qaalaa mirqqiza issi issi asati diza gishshassa; tumappe giikko Mishiraachcho qaalay issino xalla.
8 Gido attiin nuna gidiin woykko salo kiitanchcha gidiinkka nu inttes sabbakida Mishiraachcho qaalaappe hara dumma Mishiraachcho qaala sabbakikko hessaadey mernaas qanggettidaade gido.
9 Ta kase gida malakka ha7ikka zaaradakka kase intte ekkida Mishiraachcho qaalaappe hara dumma Mishiraachcho qaalaa sabbakikko izaadey mernaas qanggettidaade gido gays.
10 Ha7i tani asi tana eroshsho! Hashshu gaana mala koyazinayee? Xoossi hashshu gaana mala koyazinaa? Woykko as ufayssana koyazinaa? Ta as ufayssana koyzaakko Kirstoosa oosanchcha gidikke.
Xoossan Phawuloosa Xeygeteth
11 Ta ishatoo! Ta inttes sabbakida Mishiraachcho qaalay asa ooso gidonttayssa intte erana mala koyays.
12 Hayssa ha Mishiraachcho qaalaza Yesus Kirstoosi taas qonccisides attiin ta oonappeka ekkabeekke; woykko oonikka tana tamaarsibeenna.
13 Tani kase Ayhudata ammanon waana dizaakkonne Xoossa Woosa Keeth ta ay mala gooddidaakko qasse mulera dhayssanaas ta ay mala dafettidaakko intte siyideta.
14 Kase ta diza woden diza daro Ayhuda asata darotappe ammanon aadhdhays; kase nu aawata wogaa naaganaas daro dafettayssishin.
15 Gido attiin kase koyro tani ta aayi ulon dishin baas dooridi ba kiyateththan tana xeygida Xoossay,
16 Ayzaabeta giddon iza naaza gishshas ta sabbakana mala ba naaza tanan qonccisanaas dosida gishshas tani oonarakka zorettabeekke.
17 Taappe kase Hawaare gididaytakko Yerusalaame babeekke shin ammanida mala heerakka Arabe biitta badis; heeppeka Damasqo simmadis.
18 Heeppeka heedzdzu layththafe guye Phexroosara gaagganaas Yerusalaame badis; izara gaaggada tammanne ichchashu gallas gakkanaas heen gam7adis.
19 Gido attiin Godaa ishaa Yaaqoobeppe attiin Hawaaretappe oonakka beyabeekke.
20 Hayssa ta inttes xaafizayssan ta wordo haasayonttayssa Xoossa sinththan yootays.
21 Hessafe guye Sooriyanne Kilqiya geetettiza dere badis.
22 Yuhuda deren diza Kirstoosan ammaniza asay tana beyibeenna.
23 Gido attiin, «Beni nuna ammano gishshas gooddi dhayssana koyza addezi ha7i he ammanoza zaari sabbakees» giza wore xalla siyida.
24 He asay ta gaason Xoos galatides.