☰ Medheteththa 30
30
1 Eraheela Yaaqoobes nay izippe yelettonttayssa erada ba michchey bolla qanaatadus; hessa gishshas iza Yaaqoobe, «Taas naa imma; ixxis giikko ta hayqqana» gadus.
2 Yaaqoobey Eraheeli bolla hanqettidi, «Tana nees yelo digganaas Xoossa gadii?» gides.
3 Izakka, «Ta aylleyo Biliha hinno be7a; iza ta gishshas yelana mala neni izo ekka; histtiko izi baggara tanikka naa aayo gidana» gadus. 4 Eraheela ba aylleyo Biliha machcho histti ekkana mala izas immiin Yaaqoobey izo ekkides. 5 Biliha shaarada attuma naa Yaaqoobes yeladus. 6 Histtiin Eraheela, «Xoossi taas pirdides; ta woosaakka siyidi taas attuma naa immides» gadus; hessa gishshas yelettida naaza, «Daane» ga sunththadus.*
7 Eraheeli aylleya Biliha qasseka shaarada Yaaqoobes nam7anththo attuma naa yeladus. 8 Eraheelakka, «Tani ta michcheyra wolqqama baaxe baaxetada xoonadis» gashe naaza Niftaaleme ga sunththadus.†
9 Liyay baas yeloy eqqidayssa beyada ba aylleyo Zilfo efada Yaaqoobes machcho histta immadus. 10 Liya aylle Zilfa Yaaqoobes attuma naa yeladus. 11 Liyaykka, «Hayssi ay mala lo7o qaadaa!» gashe naaza Gaade‡ gaada sunththadus.
12 Liya aylleya Zilfay Yaaqoobes nam7anththo attuma naa yeladus. 13 Liyaykka, «Tani keeha ufayettadis! Maccassayka tana ufayettizaaro gaana» gadus; hessa gishshas iza naaza Aaseere§ ga sunththadus.
14 Gistte maxa aginan Oroobeeley gade giddo biidi inkoye teera demmidi ba aayo Liyas ehides; Eraheela Liya, «Ne nay ehida inkoyezappe ane taas imma» gadus.
15 Gido attiin, «Ne ta azinaza taappe woththa ekkidayssi gidontta ixxiin qasse ta naaza inkoyeza ekkanee?» gadus.
Eraheelakka, «Histtiko ne naaza inkoyeza gishshas Yaaqoobey hachcha qamma nenara aqo» gadus.
16 He gallassa omars Yaaqoobey oososoppe simmishin Liyay iza mokkanaas kezada, «Neni tanara aqana koshshees; ays giikko tani ta naa inkoyezan nena kiras ekkaychchadis» giin izi he gallassa omars izira aqides.
17 Xoossi Liya woosa siyides; hessa gishshas iza qanththatada ichchashanththo attuma naa Yaaqoobes yeladus. 18 Liyaykka, «Tani ta aylleyo ta azinaas immida gishshas Xoossi hessa kira taas qanxxides» gashe naaza Yisakoore* gaada sunththadus.
19 Liyay qasseka shaarada usuppunththa attuma naa Yaaqoobes yeladus. 20 Liyay, «Xoossi taas al7o imota immides; tani ta azinaas usuppun nayta yelida gishshas ha7i izi tana bonchchana» gadus. Hessa gishshas iza naaza Zaabiloone† ga sunththadus. 21 Hessafe guye issi macca naa yelada izo Diina‡ ga sunththadus.
22 Xoossi Eraheelo qoppides; izi woosaakka siyidi izis yeliza ulo doydes. 23 Izakka shaarada attuma naa yeladus; «Xoossi ta yeella taappe denththides; 24 GODAY taas hara attuma naakka gujjerennee!» gashe naaza Yooseefe§ ga sunththadus.
Yaaqoobeynne Laaba Palameteth
25 Eraheela Yooseefe yelidaappe guye Yaaqoobey Laaba, «Tani ta aawa biitta simmana mala tana moyza. 26 Tani istta gishshas nees ooththida ta machchetanne ta nayta taas imma; tani baana; ays giikko tani nees ay mala ooththidaakko ne eraasa» gides.
27 Qasse Laabay izas, «Tani nees issi miish yootays; GODAY ne geedon tana anjjidayssa ta beyadis. 28 Ne ekkana damoza taas yoota; tani nees iza qanxxana» gides.
29 Yaaqoobey, «Tani nees wostta ooththidaakko ne meheykka waani yelettidaakko neni eraasa. 30 Tani yaanaappe kase nees diza guuththay ha7i keehi darides; ta aadhdhida ubbason GODAY nena anjjides; gido attiin ha7i tani taso asaas ayde ooththoo?» gides.
31 Laabay, «Tani nees ay immoo?» gi iza oychchiin, Yaaqoobey, «Taas aykkoka immofa; gido attiin neni taas issi miish ooththiko tani ne wudeza qasseka heemmananne naagana. 32 Tani hach ne mehe ubbaa giddora aadhdhana; heen ne dorsaafe masara woykko puncara ubbaa, dorsa laaqqa kareththata ubbaa, deyshafe puncaranne masara gididayta ubbaa ta shaakkana; heytantti ta damoza gidetto. 33 Hessa gishshas ta xilloteththi neni taas qanxxida damozaa taybanaas sinththafe ne yiza wode erettana; ta deyshaafe xalaqa gidonttay woykko kareth gidontta issi laaqqay ta achchan beettiko kaysotida mala qoodetto» gides.
34 Laabay, «Ne gida mala gido» gides. 35 He gallassika Laabay xalaqa gidida orgeta ubbaa, xalaqa gidida macca deyshetanne kareththa dorsa laaqqata ubbaa kessidi heemmana mala ba attuma naytas immides. 36 Histtidi he mehezara heedzdzu gallassa oge Yaaqoobeppe haakki bides; gido attiin Yaaqoobey attida Laaba meheta heenth gelides.
37 Yaaqoobey miththafe qaye guufe kessidi baggaa poqqidi baggaa poqqontta aggidi guufeza baggaa kareth, baggaa booth histtidi warardes.* 38 Mehey haaththe uyana yiza ubba wode meheti haath uyiza gongge giddon guufeta woththides; meheteth kezida meheti haath uyanaas yiza wode, 39 he guufeta sinththan mehettida; isttika masara, xalaqanne battaka laaqqata yelida. 40 Yaaqoobey laaqqata mehetappe shaakkidi dumma woththides; attida meheta masaranne xalaqa gididayta Laaba mehe sinth zaarides; hessaththo Yaaqoobey ba mehe Laaba mehera walakettontta mala dumma shaakki woththides.
41 Gooba mino macca dorsatinne deyshati meheteth keziza wode ayde gidiinkka istti he guufeta achchan mehettana mala Yaaqoobey he guufeta haaththa gongge giddon meheta sinththan woththides. 42 Guufeza laafa meheta sinththan woththenna; hessa gishshas laafa laafa meheti Laabas gidiin goobizayti Yaaqoobes gidida. 43 Hessaththo hanidi Yaaqoobey keehi duretidi, daro mehe wude, macca aylletanne attuma aylleta, daro gaamellatanne hareta haarides.
* 30:6 Daane guussi Ibraaweta qaalara, «Taas pirdides» guussa. † 30:8 Niftaaleme guussi Ibraaweta qaalara, «Baaxe» guussa. ‡ 30:11 Gaade: Gaade guussi Ibraaweta qaalara, «Lo7o qaada» guussa. § 30:13 Aaseere: Aaseere guussi Ibraaweta qaalara, «Ufayssa» guussa. * 30:18 Yisakoore: Yisakoore guussi Ibraaweta qaalara, «Ooso waaga» guussa. † 30:20 Zaabiloone: Zaabiloone guussi Ibraaweta qaalara, «Bonchcho» guussa. ‡ 30:21 Diina: Diina guussi Ibraaweta qaalara, «Pirdides» guussa. § 30:24 Yooseefe: Yooseefe guussi Ibraaweta qaalara, «Taas gujjo woykko quccides» guussa. * 30:37 Warardes: Warardes gizayssa issi issi bagga gamoththo qaalan waarankides geetettees.
☰