Phawuloosi
Tasolonqe Asaas
Xaafida Koyro Kiita
Giddo Qofa
Tasolonqey Maqidooniya geetettiza Oroomes waanna katama. Phawuloosi Tasolonqe Woosa Keeththayo essiday Piliphisiyoose yeggi bidaappe guyenna. Heerakka issi agina kumontta dishin Ayhudati izi Piliphisiyoose yeggi bidayssa siyida; hessa gishshas Phawuloosi isttas xaafida ba kiitazan Mishiraachcho qaalaa qaanththara qonccisides. (1:9-10) Isttika Ayhudata ammano ekkanaas mati uttida Ayzaabeti Phawuloosi yootiza ammanon wozina boshettida. Hessa gishshas Ayhudati qanaateteththan Phawuloosa bolla palama denththida; hessa gishshas Phawuloosi Tasolonqe yeggidi gede Beeriya baanayssi izas manne gidides. Guuth gam7ishe Qorontoose katama bi gakkida mala Ximtoosi Woosa Keeththay hanizayssa wursika izas yootides.
Phawuloosi koyro kiitaa Tasolonqe asaas xaafiday ammanizayta denththeththanaassinne minththeththanaassa; izi istta lo7o ammano gishshassinne istta siiqoteththaa gishshas lo7o wore siyidi Xoos galatides. Kase Phawuloosi isttara diza wode izi isttara ay mala duus de7idaakko istta qofsees; hessafekka Kirstoosas nam7anththo yuussaa gishshas dendida oyshatas zaaro immees.
He oyshatappe baggayti, «Kirstoosi haa simmi yaanaappe kasetidi kase hayqqida ammaniza asay Kirstoosa yuussaan beettiza mernaa de7o demmanee?» gizayta. Phawuloosikka hessa gaaso histtidi, «Kirstoosas nam7anththo yuussa timirteza hidotan naagishe he wode gakkanaas co7u giidi intte ooso ooththite» giidi istta zorees.
Ha Maxaafay Oykkida Kumeththa Qofa
Geloso 1:1
Phawuloosa ufayssinne iza galata 1:2—3:13
Ammaniza asay kaallana woga 4:1-12
Kirstoosi nam7anththo yaana yuussaa gishshas imettida timirte 4:13—5:11
Wurseththa zore 5:12-22
Kuushsha qofa 5:23-28
1
1 Phawuloosappe, Silwaanoosappenne Ximtoosappe; Xoossaa Aawassinne Godaa Yesus Kirstoosayta gidida Tasolonqen diza ammaniza asaas nu Aawaa Xoossaafenne Godaa Yesus Kirstoosa kiyateththinne saroteththi inttes gido.
Tasolonqen Ammaniza Asaa Ammano Gishshas Shiiqida Galata
2 Nu inttena nu woosan qoppishe ubba wode Xoossaa intte gishshas galatoos.
3 Ammanoninne mino siiqoteththan intte ooththida ooso gishshas Godaa Yesus Kirstoosa bolla diza intte mino hidotan beettida intte minoteththaa gishshas nu Godaa Xoossaa, nu Aawaa sinththan ubba gallas intte gishshas qoppoos.
4 Xoossan dosettida nu ishatoo! Izi inttena dooridayssa nu eroos.
5 Gaasoykka Mishiraachcho qaalay intteko yiday wolqqara Xillo Ayananinne lo7eththi shaakki eriin attiin coo qaala xallan gidenna; qasseka nu intte gishshas giidi waani de7idaakko intte ereeta.
6 Ha7i intte nunanne Godaa misatideta; intte bolla ay metoy gakkidaa gidikkoka Xillo Ayana ufayssan qaalaa intte ekkideta.
7 Hessafe dendidayssan intte Maqidooniyaninne Akayan ammaniza asa ubbaas lo7o leemisota gidideta.
8 Godaa qaalay inttefe kezidi Maqidooniyaninne Akayan siyeteth xalla gidontta inttes Xoossa bolla diza ammanoy ubbason erettides; hessa gishshas nu inttes yootanaas aykkoka koshshenna.
9 Intte nuna wostti mokki ekkidaakkonne de7on diza tumu Xoossaas ooththanaas intte eeqatappe Xoossaako waani simmidaakko asay intte gishshas haasayees.
10 Qasseka Xoossi hayqoppe denththidayssa buro yaana hanqofe nuna ashshana Saloppe yaana Xoossa Naa Yesusa yuussaa intte wostti naagizaakko asay haasayees.