Ibraawe Asaas
Xaafettida Kiita
Giddo Qofa
Hayssi ha kiitazi xaafettiday istta bolla gakkida gita metoza gaason ba ammano agganaas matida ammaniza asaa gishshassa. Hayssa xaafidaadey Ibraaweppe ammanidaytas Yesus Kirstoosi tumanne wurseththan Xoossi asa naas qonccisiday Xoossa Nay iza gididayssa bessanaassa; ha ammanizayti ba ammanon minni eqqana mala izi istta minththeththees; hessika tumu gididayssa heedzdzu tuma yo7ota qonccisi bessees.
1. Ba ekkida metoza baggara ba Aawaas tumappe azazettizaade gidida gishshas kase Gal7a Caaqo Maxaafan diza nabetappe, Museppenne kiitanchchatappeka keehi aadhdhees.
2. Yesusi kase Gal7a Caaqo wode qeesetappeka keehi aadhdhiza mernaa qeesey iza gididayssa Xoossi ba doonan yootides.
3. Ammanizaadey nagarappe, baboppenne hayqoppe Yesusa baggara attana; Yesusi qeeseta halaqa gidida mala Ibraaweta ammano wogatinne meheta yarshoy coo eesho mala gidida atoteththay izi tumu gidana mala ooththides.
Ha maxaafaa xaafidaadey Isra7eele nayta taariken erettida asata ammano leemiso go7ettidi (shempo 11) nababiza asay ammanon minnana mala qofsees. Hessaththoka (shempo 12) bolla nababiza asay ba ayfe Yesusa bolla lo7eththi woththidi ammanon minnana malanne ay metoynne waayeykka istta bolla gakkikokka dandayana mala zorees. Wurseththankka izi isttas dumma dumma zorenne seera qaala imon kuuyees.
Ha Maxaafay Oykkida Kumeththa Qofa
Geloso, Xoossi bana Kirstoosa baggara qonccisides 1:1-3
Kirstoosi kiitanchchatappe bolla gideth 1:4—2:18
Kirstoosi Museppenne Iyaasoppe bollateth 3:1—4:13
Kirstoosa qeeseteth 4:14—7:28
Kirstoosa caaqo qaalaa bollateth 8:1—9:22
Kirstoosa yarsheteththa bollateth 9:23—10:39
Ammano bayrateth 11:1—12:29
Xoossaa ufaysso 13:1-19
Wurseththa woosa 13:20-21
Kuushsha qofa 13:22-25
1
Ba Naaza Baggara Xoossi Yootida Qaala
1 Beni wodeppe oykkidi Xoossi dumma dumma ogera nabeta baggara kase nu Aawatas daro wode yootides.
2 Qasse hayssa wurseththa wode bolla wursi laatissidaadenne ha alameza medhdhida ba naaza baggara nuus yootides.
3 Izikka Xoossa bonchcho bessizaadenne Xoossa Xoossateththaas lo7o leemiso gididi ba wolqqama qaalan wursika shiishshi oykkides; izi asaa nagarappe geeshshidaappe guye salon bonchcho Xoossaa ushachchan uttides.
Kiitanchchatappe Xoossa Naa Aadheth
4 Hessa gishshas izas imettida sunththay kiitanchchata sunththaafe aadhdhizayssa mala izikka kiitanchchatappe keehi aadhdhees.
5 Xoossi kiitanchchafe,
«Neni ta naa;
ta nena hach yeladis.
Woykko ta izas Aawaa gidana;
izikka ta naa gidana»
oonas gidee?
6 Qasseka Xoossi ba bayra Naaza duge ha biittaa bolla yeddishe, «Xoossa kiitanchchati wurikka izas goynnetto» gides.
7 Kiitanchchata gishshas haasayshe qasse, «Kiitanchchata ayanata; ba oosanchchatakka tama laco kessees» gides.
8 Naaza gishshas qasse, «Godoo! Ne zufaaney mernaappe mernaa gakkanaas minni daana; neni ne kawoteththaa likke kaaleththaasa.
9 Neni xilloteth dosadasa; makkallaka ixxaasa; hessa gishshas Xoossi ne Goday nena ne laggetappe bolla kessides; nena ufayssa zayte tiydes» gees.
10 Qasse, «Godoo! Koyro neni biitta medhdhadasa; Salotikka ne kushen oosettida.
11 Istti dhayana; neni gidikko minna daana; istti wurikka may7o mala gal7ana.
12 Neni istta may7o mala qalam7ana; isttika may7o mala laamettana; ne gidikko aydekka neni nena; ne duussas wurseththi deenna» gees.
13 Xoossi kiitanchchatappe, «Tani ne morkketa ne toho garsan yedhisana gakkanaas ne ta ushachchan utta» oona gidee?
14 Kiitanchchati wurikka atoteth laattana asata ooththanaas Xoossafe kiitettiza oosanchcha Ayana gidettennee?