5
1 Qeeseta halaqa gidi shuumettizaadey daro asaa giddofe dooretteessinne asa gishshas gididi imotanne nagara gishshas yarsho shiishshanaas doorettees.
2 Izikka ba baggara daaburanchcha gidida gishshas erontta asatassinne oge balidaytas qadhettana dandayees.
3 Izi ba nagara gishshassinne hara asata nagara gishshas yarsho shiishshanaas izas bessizay hessa gishshassa.
4 Aarooney xeygettidayssaththo izi Xoossi xeygidaade gidanaas bessees attiin hessa he bonchchoza barkka baas ekkizaadey deenna.
5 Hessaththoka Kirstoosi qeeseta halaqa gidana bonchcho barkka baas ekkibeenna; gido attiin,
«Ne ta naakko;
ta nees hach Aawaa gidadis»
gida Xoossaafe ekkides.
6 Hessaththoka harason
«Malkexeedeqe shuumeta mala
neni mernaas
qeeseta halaqa» gees.
7 Yesusi hayssa biittaa bolla diza wode iza hayqoppe ashshana dandayzayssako afunxxishe qaala dhoqqu histti woossides. Addafe ashketeththara izi azazettida gishshas iza woosaakka Xoossi siyides.
8 Izi Xoossa Naa gidikkoka ba ekkida waayezappe azazeteth tamaardes.
9 Hessa baggara pacey bayndaade gidi beettidayssafe guye baas azazettizaytas ubbaas mernaa atoteththas gaaso gidides.
10 Malkexeedeqe shuumeteththaa mala qeeseta halaqa geetetti Xoossan shuumettides.
Ammanon Minnana Mala Imettida Qofiso
11 Hessa gishshas nu haasayana miishshi buro daroy dees; gido attiin intte dotta7ata gidida gishshas inttena erisoy meto.
12 Intte hanni wode astamaare gidanaas bessishin Xoossa qaalaa buro koyroppe denththidi inttena tamaarsiza as inttes koshshees. Inttes mino kath gidontta maath koshshees.
13 Maath paahettizay qii guuththa naa gidiza gishshas lo7onne iita shaakkiza timirte shaakki erenna.
14 Mino kaththi gidikko lo7onne iita shaakki eranaas dandayza wozina kunththida asatassa.