Hose7e Tinbite
Giddo Qofa
Nabe Hose7ey Kirstoosi yelettanaappe kase 721 layththan Samaariya katamaya laalettanaappe kase diza nabe. He wode metoy kumida iita wodezan nabe Amoxeppe guye pudeha baggara diza Isra7eele kawoteththa garsan tinbite deraas yootides. Hose7ey derezi eeqa xoos goynnizayssanne GODAAN ammaneteth pacisidayssa qonccisi yootides. Hose7ey hessa derezi GODAAN ammanettonttayssa asaa erisanaas ammanettontta machcho ekkidi isttas leemiso gididi istta tamaarssees; iza machcheya Goomera izas ammanettonttayssaththoka derezi GODAA ba Xoossaa aggaagides; hessa gaason pirday Isra7eele bolla yaana gees; gido attiin wurseththan GODAY ba dereza keehi siiqiza gishshas baakko zaaridi baassinne deraas giddon diza issifeteththaa ooraxissides; he gita siiqozi hayssafe kaalli diza qaalan qonccides; «Isra7eele asawu! Ta nena wostta aggaagoo? Ta nena wostta haras aaththa immoo? Ta nena siiqiza siiqoy keehi gita gidida gishshas hessa ubbaa ooththanaas ta wozinay koyenna.» [11:8]
Ha Maxaafay Oykkida Kumeththa Qofa
Hose7e soo asay ammanoy bayndaytas leemiso gideth 1:3-5
GODAY Isra7eele, Yuhudanne istta kaaleththizayta walasse 4:1—5:15
Derezi GODAAKKO simmidaa misatisso 6:1—7:10
GODAAN ammanettontta ixxida Isra7eele deraa 7:11—8:14
Isra7eele derezi baas bessiza qixaate eko 9:1-16
Isra7eele deraas yootida mino qofso 10:1-15
GODAY deraa siiqiza siiqo 11:1-11
GODAY deraa bolla yeddida pirda 11:12—13:16
Nagarappe maareteththinne anjjo hidota 14:1-9
1
1 Ooziyay, Iyo7aatamey, Akaazeynne Hizqiyaasi issoy issaafe kaalli kaallidi Yuhudan kawotida wode hessaththoka Iyo7aasa naa Iyorba7aamey Isra7eelen kawotida wode Bi7eere naa Hose7ekko yida GODAA qaalay hayssafe kaallizayssa.
Hose7e Machchonne Iza Nayta
2 GODAY Hose7e baggara Isra7eele naytas qaala buro yootishe Hose7es, «Ta derey taappe shaakettidi iita layma laymatiza gishshas neni baada issi laymatiza maccas nees machcho ekka; izippe nees nayta yela» gides.
3 Hessa gishshas Hose7ey biidi Dibilayeme nayo Goomero machcho ekkides; izakka qanththatada izas attuma naa yeladus.
4 Hessafe guye GODAY Hose7es, «Iyunne iza zereththati Izra7eelen wodhida asata geedon Iyu zereththata ta qaxxayana wodey haaho gidenna; Isra7eele kawoteththi hayssafe guye kundana mala ta ooththana.
5 He wode Izra7eele shoobban Isra7eele ola asa ubbaa ta menththereththana; hessa gishshas ne naaza sunththaa, ‹Izra7eele› gaada sunththa» gides.
6 Goomera qasseka qanththatada macca naa yeladus. GODAYKKA Hose7es, «Tani hayssafe guye Isra7eele asaas qadhettike; ta istta maarikke; hessa gishshas neni izi sunththaa, ‹Loruhama› ga sunththaa.
7 Yuhuda asaas gidikko tani ta siiqo bessana. Tani GODAY istta Xoossay ashshana; ta istta ashshanayssi ola wolqqan gidenna; mashshan, tooran woykko paraninne paran olizaytan gidenna» gides.
8 Goomera ba nayo dhanththi duuththidaappe guye qasseka qanththatada attuma naa yeladus.
9 GODAYKKA Hose7e, «Hayssafe guye Isra7eele asay ta dere gidenna; tanikka istta Xoos gidikke. Hessa gishshas neni ne naaza sunththaa, ‹Lo7aami› ga xeyga» gides.
Isra7eele Asaas Imettida Hidota
10 Gidikkoka Isra7eele asay qooday baynda abban shaamintta mala darana. Ha7i Xoossi, «Intte ta dere deekketa» geetettidasohon, «Intte de7o Xoossa nayta» geetetti xeygettana wodey yaana.
11 He wode Yuhuda asaynne Isra7eele asay simmidi issino gidana. Nam7ati banttana ayssanaade issi as doorana. Qasseka istti bantta deren dichchaninne dureteththan de7ana. Izra7eele gallassay gita gidana.