30
Gibxera Caaqettida Hada Caaqo
1 GODAY,
«Makkallanchcha gidida naytas
aayye ana!
taappe gidontta qofa kaalleettes;
ta Ayanappe gidontta
caaqo caaqqeettes;
nagara bolla nagara gujjeettes.
2 Tana zore oychchontta
Gibxe wodhdheettes;
kawo Paarooney isttas
gondalle gidana mala
Gibxe kuwan attana koyeettes.
3 Gido attiin Paaroone
gondalleteththi
isttas kawushshateth gidana;
Gibxe kawon ateththi
istta bolla yeella ehana.
4 Istta shuumeti Xaanoosen diikkoka,
istta kiittidayti
Haneesen diikkoka,
5 isttas yeellateththinne
kawushshateth xalla gidana attiin
maado woykko wodhe
isttas ehontta
aykko go7akka isttas
immontta asata gaason
ubbayka yeellatana» gees.
6 Negeben diza medosata gishshas GODAY yootida qaalay
wodalla gaammotinne
macca gaammoti dizason,
marzera diza shooshshatinne
xongettiza shooshshati dizason,
metoynne ceecey kumida biittara
aadhdhi biidi,
istti go7ontta deretakko,
7 izi maados
mulekka go7ay baynda
dere istti Gibxe baana;
hessa gishshas tani izi sunththaa
«Aykkoka go7onttaaro Era7aabe»
ga xeygana.
Azazettontta Kawoteththata
8 Ha7i ba; saleedan isttas xaafa;
xaaththa maxaafa bollaka cadda;
hessi buroppe yaana wodetan
mernaas markka gidana.
9 Hayti GODAA azazo
siyana koyonttayti,
makkallanchcha derenne
baleththiza nayta.
10 Ajjuuta be7izayta,
«Hayssafe guye ajjuuta
be7opite» gaana;
nabeta, «Hayssafe guye nuus
tuma tinbite yootopite;
nuna ufayssizaazinne
miichchizaaz yootite.
11 Hayssa ogaappe kichchite;
ha wogga ogaappe haakkite;
Isra7eele Geeshshaara nuna
tiran gaththofte» gaana.
12 Hessa gishshas Isra7eele Geeshshay,
«Intte ha qaala kadhida gishshas,
genen intte ammanettida
gishshassinne
baleththon zemppida gishshas,
13 hayssi ha nagarazi
phalqetti kundananne
qoppontta dishin kundiza
gita gimbe mala
isttas gidana.
14 Meqerettoyssa giddofe
tama bonqqo kaashiza kon7ay,
haaththe duuqqiza kon7ay
dhayanaashe gakkanaas,
aykkoyka attontta tiifettiza
mana miishsha mala
tiifettana» gees.
15 Ubbaa Haariza GODAY,
Isra7eele Geeshshay,
«Intte taakko simoninne
tanan shempon attana;
woppaninne ammanon
intte minnana;
intte gidikko hessaththo
ooththibeekketa.
16 Qasseka, ‹Chii! Nuni
paran utti baqatana› gideta;
hessa gishshas intte baqatana.
Zaaridikka intte,
‹Nuni pilata paran
kessi ekki baana› gideta;
hessa gishshas inttena
yedeththizayti
pilatata gidana.
17 Intte zuma hu7en
eqqida bandira mala
zumbullata xeeran eqqida
malata mala
gidi intte attanaashe gakkanaas
issi asa mandeththan 1,000
asi baqatana;
ichchash asa mandeththan
intte ubbay baqatana» gees.
18 Gido attiin GODAY inttes
kiya ooththanaas naagees;
inttena ba qadheteththa
bessanaas dendees;
GODAY tumu pirdiza
Xoossa gidida gishshas
ammanettidi iza naagizayti
anjjettidayta.
Xoossa Deraa Anjjeteth
19 Intteno Yerusalaamen de7iza Xiyoone derezoo! Hayssafe sinththan intte yeekkeketa; intte izakko waassishin izi inttena waani maarennee? Intte waaso izi siyidi inttes eeson zaaro immana.
20 GODAY inttes waaye kaththinne meto haath immikokka hayssafe guye intte astamaarey inttefe qotettenna; intte ayfetikka intte astamaareza be7ana.
21 Intte hadirs woykko ushach giikko intte guyera, «Ogezi hayssa; izara biite» gizayssa intte hayththi siyana.
22 Hessafe biran meeshettida intte eeqa xoossatanne worqqan meeshettida misleta intte moorana; «Nuuppe haakkite» giidi tuna carqqa mala intte wora yeggana.
23 Ne zerida kaththas izi ira immana; biittafe mokkida kaththay muurutanne daro gidana. He wode intte mehey aaho demban heemettana.
24 Goshsha booratinne hareti bakkan bukki suragettida harqqonne basso maana.
25 Asay wuriza wolqqama gallassan miixati laalettishin gita zumata ubbata bollafenne zumbullata ubbata bollafe duge haaththi goggana.
26 GODAY meqqida ba deraa koolishin, madunththidayssa paththishin, aginay arshe mala poo7ana. Arshes issi gallassa poo7oykka laappun gallassa poo7o mala gidana.
Asoore Qaxxayeteth
27 Be7ite, GODAA sunththay
eexxiza hanqora,
shaara mala dhippi gida cuwara
haakoppe yaana;
iza metershati hanqon kumida;
iza inxarsayka
xuuggiza tama mala.
28 Iza peenoykka qoodhe gakkidi
meecci efiza kixa haaththa mala;
kawoteththatakka dhayso
zayzaren zayzarees;
asaa doonan oge baleththiza
bixala barssees.
29 Omars geeshsha ba7aale
intte bonchchishe
yexxizayssaththo intte yexxana;
GODAA zumaakko
Isra7eele Zaallaako
asay susul7e susul7ishe
ufayssan kezizayssaththo
intte wozinay ufayettana.
30 GODAY eexxiza hanqoninne
miza taman,
gote carkoninne dadan,
shachcha shuchchan,
teemay kumida ba cenggurssaa
asaa sissana;
wodhdhishe ba qesaa izi bessana.
31 GODAA cenggurssi
Asoore daganththana;
iza guufeykka istta shocana.
32 GODAY istta bolla
yeddiza qixaate guufe
ubbay karabe giirissaninne
diiththa giirissan
azhabettidayssa;
izi ba wolqqa olan bessidi
istta shocides.
33 Beni wodeppe doommidi
Toofeete geetettiza
xuuggizasoy giigetti uttides;
kawozasikka giigetti uttides;
xuuggana gongolozikka
aahonne ciimma;
iza giddon daro tamaynne
eexxana miththi dees;
GODAA peenoy diine tama mala
eeththi kessana.