44
Doorettida Isra7eele
1 GODAY, «Gido attiin
ta ashkara Yaaqoobe,
ta doorida Isra7eele, siya.
2 Nena medhdhiday,
ne aayey ulon ooththiday,
nena maaddiza GODAY,
‹Ta ashkara Yaaqoobee!
Tani doorida Yishuruune! Yayyofa.
3 Tani saamettida biittan
haath gussana;
mela biittankka shaafa gogisana.
Tani ta Ayana ne zereththa bolla,
ta anjjo nees
naa naa bolla gussana.
4 Istti demban cilila maata mala,
shaafa doonan diza miththa mala
mokkana› gees.
5 Issoy, ‹Tani GODAASSA› gaana;
haray bana Yaaqoobe
sunththan xeygana;
haray qasse ba kushe bolla,
‹Tani GODAASSA› gi xaafana;
izi bana Isra7eele sunththan
xeygana» gees.
Godaappe Attiin Hara Xoossi Deenna
6 Isra7eele kawoynne istta wozzizay,
GODAY Ubbaafe
Wolqqama Xoossay,
«Koyroy tana; wurseththika tana.
Taappe hara Xoossi baawa.
7 Ta malay ooni dizee? Ane yooto;
koyro ta deraas ta yoch yeggishin
aazi hanidaakko,
sinththafekka
aazi hananaakko yooto;
ane taas qoncciso;
buro hanana miishsha gishshas
sinththati yooto;
buro yaanayssa kaseti yooto.
8 Yayyofte; dagammofte.
Hayssa tani inttes
yootabeekkinaa?
Beniisofe ta inttena
erisabeekkinaa?
Hessas intte ta markkata.
Taappe attiin hara xoossi dizee?
Mulekka deenna;
woykko hara Zaallay dizee?
Deenna; ta oonakka erikke» gees.
9 Eeqa misleta medhdhizayti
ubbati hada;
misleta isttafe
ooththiza miishshatikka hada;
isttas yootizaytikka qooqe;
Isttas erateththi deenna;
istti yeellatana.
10 Aykkoka go7ontta eeqa xoossa
massi giigsizay oonee?
11 Eeqa xoos medhdhizay as attiin
hara gidenna;
izinne iza misatizayti yeellatana;
ubbayka shiiqidi
issi bolla eqqetto;
istti dagammananne yeellatana.
12 Birata qoxxizay naariqa oykkees;
xiifa bonqqo bolla
woththi ooththees;
eeqa xoos naariqan qoxxidi
misle giigssees;
ba mino qesen giigssees.
Hessafe guye gafees;
wolqqa dhayees;
haath saamettees; daaburees.
13 Massizay wodoron wadhdhees;
chokken malata woththees;
maarssara woocees;
irsaasen iza bolla
malata woththees;
asa misatissi giigssees;
asa mala puulasees;
goynoson efi woththees.
14 Ziga mith qanxxees;
wola woykko moqoththa doorees;
woran diza miththatara
issife diccana mala aggees;
woykko xiidda tokkees;
izakka iray dichchees.
15 Asi eesos go7ettees;
izappe guuth ekkidi
taman eeththi ho7ees;
ukeththika izan uukkees;
izappe massidi
eeqa xoos giigssees;
izaskka goynnees.
Eeqa xoos ooththees;
kundidikka izas ziggees.
16 Bagga miththaa eeththees;
iza bollaka quma kaththees;
asho izan xiixidi kalli mees;
tamaza ho7ishe,
«Eroshsho tana ho7ides;
tamazikka taas beettees» gees.
17 Qasse attida miththaza
baas eeqa xoos giigssees;
hokkidi izas ziggees;
izakka goynnees;
iza woossishe,
«Neni ta xoossaa gidida gishshas
tana ashsha» gees.
18 Istti aykkoka erettennanne
akeekettenna;
istti xeellontta mala
istta ayfey goozettides;
istti yuushshi qoppontta mala
istta wozinay gordettides.
19 Oonikka takki gi qoppibeenna;
erateththi woykko
akeekay baynda gishshas,
«Baggaa taman eeththadis;
iza bonqqon kath kaththadis;
izan asho xiixada madis;
histtiin attidayssan wosttada
tani harassiza miish ooththanee?
miththa anos tani
goynnana bessizee?»
gaanaas dandaybeenna.
20 Eeya wozinay iza baleththiin
izi bidinth qam7ees;
bana ashshana dandayenna;
«Hayssi taas ushachcha kushen
dizay wordo gidennee?
gaanaas dandaybeenna.»
21 GODAY, «Isra7eele neni
ta ashkara gidida gishshas,
‹Yaaqoobe hayssa qoppa;
tani nena ooththadis;
neni ta ashkara.
Isra7eele tani nena dogikke.
22 Tani ne mooro shaara mala,
ne nagarakka maalado tulala mala
qucca dhayssadis;
tani nena wozzida gishshas
ha taakko simma› » gees.
23 GODAY hayssa ooththida gishshas
Salotoo yexxite;
ciimma biittatoo ufayssan ililite.
Intteno zumatoo,
intteno woratoo,
miththatoo ubbay ililite;
gaasoykka GODAY
Yaaqoobe wozzides;
ba bonchcho
Isra7eele bolla qonccisides.
Yerusalaamey Asa Duussaso Gidana
24 Nena aayi ulon medhdhidi
wozzida GODAY,
«Ubbaa medhdhada
salota tarkka piddisiday,
sa7akka micciday tana GODAA.
25 Tani wordo nabeta malata
hada ooththana;
bitizaytakka eeya kessana.
Tani aadho eranchchata
shira yeggana;
istta erateththaaka
hada ooththana.
26 Ta ashkaraza qaala ta polana;
ta kiittidayta zore ta minththana;
tani Yerusalaame,
‹Neni asi dizaso gidana›,
Yuhuda katamatakka,
‹Istti keexettana›,
istta laaleththaaka,
‹Tani ooraxissana› gaana.
27 Tani ciimma haaththaaka,
‹Ne mela gida!
Ne shaafatakka
ta melissana› gaana.
28 Qiroosekka,
‹Izi ta heenththanchcha;
izi ta shene polana› gaana;
Yerusalaameykka,
‹Simma eqqu› gaana;
Xoossa Keeththaas,
‹Iza yochchi yegetto› gaana» gees.