Yohannisi koyro yeddida kiitazan nam7u ayfe yooti deettes; heytikka he kiitaza nababizaytas Xoossaranne Xoossa Naa Yesus Kirstoosara issifeteththi de7ana mala istta minththeththanaassinne hessa he issifeteththaa dhayssiza wordo timirtefe istti naagettana malassa. Hayssi kiitay xaafettiza wode he alameza bolla keehi iita wordo timirtey dees; he timirtezikka issi issi ammaniza asata ammanoppe kare kessides; he wordo astamaareti tamaarsiza iita timirtey 1. «Xoossi Ayana alame xalla medhdhides. 2. Hayssa ha alamezan diza ayfen beettiza miish ubbaanne nu asateth Xoossi medhdhibeenna; hessa gishshas he medheteththati wurikka iita xalla. 3. Hayssi ayfen beettiza alamezinne nu asateththay nu Ayana qohanaassinne tunisanaas dandayenna.» Hessa guussi, «Koyro Xoossafe yida Yesusas asa asateththi deenna; qasseka nam7anththora issaadey hara asa bolla nagara ooththikonne izi hara as ixxiko hessaade oosozi iza ayana qohanaassinne tunisanaas dandayenna» guussa. Heyti he astamaareti, «Atoteththa guussi hayssa alameza duussas qoppontta ago koshshees» gi tamaarseettes. Hessarakka gaththidi, «Lo7o ooson gidiin woykko ase siiqoy mulekka koshshenna» gi tamaarseettes.

Hessa gishshas Yohannisi ba kiitaan, «Hessaththo wordo timirtey tumu ammano timirtefe kare gididayssa tamaarssees; hessa he timirteza ixon Yesus Kirstoosi kumeththara asekko; Yesusan ammanizaytinne Xoos siiqizayti wurikka ba garsan issoy issaara siiqettanaas bessees» giidi erisides. Qasseka Yesusi tumappe asa asho may7idayssanne yelettidayssa kaddizaadey Xoossafe yelettibeenna. (4:2-3) Godaa Xoossaafe yelettonttaadey qasse Xoossaafe gididaade siiqanaas dandayenna; Xoossafe yelettidaadey ubba wode nagaran de7anaas dandayenna. (3:10)