Iyoobe Maxaafa
Giddo Qofa
Iyoobe maxaafan nuni be7iza taarikey wolqqama metoynne qohoy iza bolla gakkida issi suure asa gishshas qonccisees. He addezikka ba naytanne ba haaro ubbaafe mela atoyssafeka bollara iita madunth madunxidi waayettees; hessafe guye ginxo malan heedzdzuto shiiqida haasayan Iyoobinne iza laggeti ha iita waayisiza metozan baas seetettiza yo7oza qoncciseettes; wurseththankka Xoossi Iyoobes qonccisides.
Iyoobe laggeti iza bolla gakkida waayeza gishshas kase bantti eriza haymanote wogappe dendidi banttas diza dumma dumma qofa shiishsheettes; hessika, «Xoossi kiya; asas lo7o woga immees; iita as gidikko qaxxayees» geettes. «Hessaththoka Iyoobe ha ubba metoy gakkiday izi nagara ooththida gishshas gidontta aggenna» geettes. Iyoobe gidikko iza bolla wosoy bayndaadenne suure as gidida gishshas hayssa mala wolqqama qixaatey izas bessenna. Iyoobe mala suure asa bolla hayssa mala wolqqama metoy gakkidayssi birshettontta maaleththo gidides. Ha ubbaa metozan Iyoobe ammanoy yaanne haa qaaxxontta aggikokka tuma pirdiza Xoossay likke pirda izas immidi iza gakkida metozappe kessana malanne kase de7oza izas zaarana mala Xoossa minnidi woosappenne oyshoppe guye gibeenna.
Xoossi Iyoobe iza oychchida oyshatas zaaro maarara maarara immontta aggikokka Iyoobes diza mino ammanoza nashshidi Xoossi ba wolqqanne ba erateththaa malalisiza ogera ginxon izas qonccisides. Hessafe guye Iyoobi Xoossi bayranne era gididayssa shaakki erides. Xoossa Xoossateththa shaakki eridaappe guye kase izi hanqon kumidi kessida deexo qaalata gishshas yeellatidi maaroteththan gelides.
Maxaafaas wurseththa shemppoy Iyoobi bana gakkida metozappe zaaro demmidi kase de7ozan simmidayssanne qasseka haaro baggara kaseyssafe haa aadho demmidayssa qonccisees. Hara baggara qasse Iyoobe bolla gakkida metoy ay gaason iza bolla gakkidaakkon Iyoobe laggetas gelontta gishshas Xoossay istta minththi seerides.
Lose gidida dumma dumma haymanote wogatappe Xoossi ba baggara bayra gididayssa Iyoobi xalala erida gishshas ba laggeta gishshas woossides; Xoossika iza woosaa siyides. Xoossi Iyoobes wurseththa de7oza koyroyssafe aaththi lo7eththides.
Ha Maxaafay Oykkida Kumeththa Qofa
Iyoobe gakkida metota 1:1—2:13
Iyoobi ba yeleta gallassa qanggides 3:1-26
Koyro yuusho haasaya 4:1—14:22
Nam7anththo yuusho haasaya 15:1—21:34
Heedzdzanththo yuusho haasaya 22:1—26:14
Iyoobes wurseththa haasaya 27:1—31:40
Eelihu haasaya 32:1—37:24
Xoossi koyro yuusho haasayda haasaya 38:1—39:30
Nam7anththo yuusho Xoossa haasayanne Iyoobe zaaro 40:1—42:6
Xoossi Iyoobes zaaro immidi anjjides 42:7-17
1
Iyoobe Bolla Gakkida Paace
1 Uuxe geetettiza deren issi Iyoobe geetettiza asi dees. Izikka iita ubbaafe haakkidaade; wosoy iza bolla bayndaade; Xoossas yayyizaadenne suure asa.
2 Izas laappun attuma naytinne heedzdzu macca nayti deettes.
3 Haaro baggarakka izas 7,000 dorsati, 3,000 gaamellati, 500 waaththa booratinne 500 hareti deettes; qasseka keehi daro aylleti deettes. Arshey mokkizaso baggara iza mala durenne gita asi haray deenna.
4 Iyoobe attuma nayti issoy issoy bason taran taran diggisa giigsidi issife shiiqi ufayetteettes; heedzdzu michchetakka banttako xeygisidi isttara issife meettessinne uyeettes.
5 Diggisa gallassati aadhdhidaappe guye Iyoobi wonttara dendidi ba nayta xeygisidinne issaa issaa sunththan yarsho shiishshees. Izi hessaththo ooththizay, «Ta nayti geelli gidaa Xoossa cayidi awukkora nagara ooththidaakkonne!» guussa hirgan nayta nagarappe geeshshanaas giidi ooththees. Iyoobi hayssa yarsho woga qanxxontta ubba wode ooththees.
6 Gallassatappe issi gallas salo kiitanchchati GODAA sinth shiiqida wode Xala7eykka isttara issife shiiqides.
7 Xoossika, «Awappe yadii?» giidi Xala7e oychchides. Xala7eykka, «Sa7a gaxa ubbaa yaanne haa yuuyerettada yadis» giidi GODAAS zaarides.
8 GODAY Xala7eza, «Ta aylleza Iyoobe lo7eththa beyadii? Iza mala ammanettidanne suure as biitta bolla beettibeenna; izi iita ubbaafe haakkidi taas yayyiza suure asa» gides.
9 Xala7eykka zaaridi, «Iyoobi nees Xoossaas coo yayyizee?
10 Izi nees yayyizay neni izanne iza nayta, izas diza haaro ubbaa lo7eththa naagida gishshassa; izi ooththiza oosoza kumeth anjjida gishshassinne daro wude meheta ne izas immida gishshas gidennee?
11 Ane ne kushe yeddada izas dizayssa ubbaa ne dhayssidaakko tuma izi nena qonccen cayana» gides.
12 GODAYKKA Xala7es, «Ero ane Iyoobe bolla issi metokka gaththofa attiin izas diza haaroza bolla ne koyidaazi ooththanawu dandayaasa» gides. Hessafe guye Xala7ey Xoossa sinththafe ke7idi bides.
Iyoobe Nayta Hayqonne Iza Haaro Dhayo
13 Gallassatappe issi gallas Iyoobe nayti bayra ishason wuri shiiqidi miidinne woyne cajje uyidi ufayetteettes.
14 He gallas issoy kiitetti yiidi, «Nuni boorata waaxidi goyishin; haretikka nu mata demban heemettishin,
15 Saaba dere asati yiidi nu bolla ola denththidi ubbaaka di7i ekki bida; ne aylleta ubbatakka mashshan wodhida; tani xalala attada hanida ubbaa nees yootanaas yadis» gides.
16 Koyro kiitanchchay ba haasayza haasaya buro ongontta dishin nam7anththo kiitanchchay yiidi, «Dorsatanne heemmiza heenththanchcha ubbaa wolqqanth saloppe wodhdhidi wodhides; tani xalla attada hanida ubbaa nees yootanaas yadis» gides.
17 Hayssa kiitanchchay haasayi ongontta hara kiitanchchay yiidi, «Heedzdzu butten shaakettida bonqqiza Kaladaawe asati yiidi qoppontta dishin nu bolla iita meto gaththida; gaamellata ubbaa di7i efichchida; ne aylleta ubbaa mashshan wodhida; tani xalla attada hanida miish ubbaa nees yootanaas yadis» gides.
18 Hayssa ha kiitanchchay haasayi ongontta hara kiitanchchay yiidi, «Ne nayti ubbatikka banttas bayra ishason shiiqidi mishenne woyne cajje uyishe ufayettiza.
19 Bazzofe yida gote carkoy qoppontta dishin yiidi keeththa kumeth shirechchi yeggides; keeththazikka istta bolla wodhdhiin wurikka hayqqida; tani xalla attada hanida miish ubbaa nees yootanaas yadis» gides.
20 Hessafe guye Iyoobi dendidi kayottidi ba may7oza daakkides; ba hu7e bulusides; biittan gufanni goynnides.
21 «Tani ta aayey uloppe kallo yelettadis; hayqqiza wodekka kallo baana; GODAY immides; GODAY ekkides; GODAA sunththi galatettidaaz gido» gides.
22 Ha paacey ubbay Iyoobe bolla gakkinkka izi ubbaaka nagara ooththibeenna; Xoossa bollaka camo qaala kessibeenna.