24
1 «Ubbaa Dandayza Xoossay
ays ba pirda
immana gallassa baribeennee?
Izas ammanettidayti
awude gakkanaas
iza pirda qaala naagettandettoo?
2 Iita asati zawa laalleettes;
kaysi ehida dorsata heemmeettes.
3 Yi7ota hare bonqqeettes;
am7e maccassaya boora oyththadus
giidi banttas ekkeettes.
4 Manqota shaatettidi
coo ogeppe gooddeettes;
istta sinththafe baqatidi
qotettana mala ooththeettes.
5 Manqoti bazzon diza hardida mala,
bantta naytas kath
koyana ke7idi daabureettes.
6 Unetidi haratas
kath shiishshizayta gideettes;
iita asata haaro
gidida woyne tokkizasohozan
geedon attida pushulo maxeettes.
7 Kumeththa omars
kallo ichchi aqeettes;
mooce ashshiza may7oy
isttas deenna.
8 Zuma bolla bukkiza iran
istta asateththay musees;
aqizasoy dhayiin
zaalla gars shiiqi aqeettes.
9 Aaway hayqqida nay
isttas aylle gidana mala
aayey dhanth diggidi
bonqqeettes;
metotidayssa naaza
ba aco gishshas giidi
oyso ekkeettes.
10 Manqoti aykko may7oy baynda
paxa kallo ooson geleettes.
Kaththa shiisho wode
mirqqeza tookki miiyishe
banttas gafan hayqqeettes.
11 Iita asata gaden wogara ayfeppe
zayte kesseettes;
woyne miththa ayfeppe
cajje ageettesseshin
istti gidikko saametteettes.
12 Katamatan hayqqanaas
tooqiza asati gootareettes;
madunxida asatikka
maado oyshon waasseettes.
Xoossi gidikko istta bolla
oosettida geneza beyibeenna.
13 Poo7o ixxiza asati deettes;
poo7oy aazakko erontta gishshas
poo7o oge kaallettenna.
14 Shempo wodhiza uray
wonttontta dendidi
manqotanne metotanchchata
wodhees;
omarsika kaysos kezees.
15 Layma uray
gadey omarsanayssa naagettees;
oonikka be7ontta mala
ba sinththa goozeettes.
16 Kaysoti kaysotanaas
omarsara keeth bookki geleettes;
gallas gidikko qotetti pe7eettes.
Poo7oka ixxeettes.
17 Dhumara shiroteththi
istta ufayssiza gishshas
ubbaasikka girdi gida dhumay
isttas wontta maalado mala.
18 «Gidikkoka istti haaththa bolla
beettiza hoomo mala
guuththa wodes xalla istti beettana.
Istta biittayka
qanggettidayssa gidana;
istti woyne miththa
tokkizasohoza
oonikka beenna.
19 Shachchi ho7on maayidi
dhayzayssa mala
si7ooleykka nagaranchchata
baakko bonqqa ekkana.
20 Istta aayeti ubbay
istta dogana;
istta ashozakka guxuney maana;
iita asati qofettokona;
hessaththoka miththa mala
meqerettana.
21 Hayssi ubbay istta bolla gakkiday
istti yelontta maynida maccassata
bonqqida gishshassinne
istta azinati
hayqqida maccassatas
aykko qadheteththika
bessontta gishshassa.
22 Gido attiin Xoossi ba wolqqan
daannateththan diza asata diggana;
isttas de7oy giiga misatikkoka
istta duussas
ammanththiza miishshi deenna.
23 Xoossi istta
saron daana mala ooththikokka,
istti biza oge ubbaa
tishshi histti xeellees
24 Iita asati guuththa wodes duretana;
gido attiin eesora sharafa mala
shulli dhayana;
shulla kaththa mala buucettana.
25 «Hayssa mala gidenna geetettiko
tani wordanchchatanne
ta haasayda qaalay likke gidonttayssa
oonee ammanththanay?»