3
Iyoobi Ba Yelettida Gallas Qanggeth
Iyoobe Haasaya
1 Hayssafe guye Iyoobi haasaya doommides; ba yelettida gallassaa,
2-3 «Tani ta aayey ulon
medhettida omarsayanne
tani yelettida gallassaya
qanggettidayta gidetto!
4 He gallassay dhuman laametto;
Salo Xoossay iza qoppofo;
Poo7oy mulekka izan beettofo.
5 Shaarumaninne girdi gida dhuman
kamettidayssa gido;
shaaray kammiin dhumay
iza poo7o mitto.
6 He gallassa omarsayo
girdi gida dhumay kammo;
layththa gallassatara
issife taybettofo;
aginata qoodan geli qofettofo.
7 He gallassa omarsay
aykkoy bayndaaz gido;
ufayssa qaalaykka izan seetettofo.
8 Lewataane geetettiza do7a
qaaseththanaas dandayzayti,
gallassata qanggizayti,
he gallassayo qanggetto.
9 He gallassa omars
bakkale xoolintteti dhumetto;
poo7o hidotay izan beettofo;
wontta xalqqey izan xalqqofo.
10 Ta ayfetappe meto genththana,
ta aayey ulo ta bolla
gordontta aggida gishshas
he gallassay qanggettidayssa gido.
11 «Ta aayey ulon dashe
haaththe gida attidaakko aazee!
Ta aayey uloppe ke7ida mala
ays hayqqabeekkinaa?
12 Gulbateti tana mokki ekkanaas,
dhanththatikka tana dhanththanaas
ays beettidoo?
13 Ha7i tani saron ichchidaakko,
dhiskadakka shemppo
demmanakkoshin.
14 Ha7i laaletti beettizayta
baas keexxida biitta kawotaranne
zorizaytara ta dhiskada
shemppo demmanakkoshin.
15 Ba keeththa worqqaninne
biran kunththida;
daannatara ta issife
shempanakkoshin.
16 Qasseka ays biitta garsan
moogettida awucaya,
woykko issi gallassa poo7o
mulekka be7ontta naa mala
ays gidabeekkinaa?
17 Heen iitata waayisoy attana;
daabursiza ooson
de7idayti shempana.
18 Qashetti diza asatikka saro demmana;
bana oosisiza asata hanqo qaala
siyanayssafekka attana.
19 Laafatinne gita asati issife beettana;
aylletikka heen
ba godatappe wozzettana.
20 «Xoossi un7o bolla dizaytas poo7o,
duussazi camo qofan kumidaades
de7o ays immizee?
21 Hayqo laamotizaytassinne
qotetti diza aqoppe
aaththi koyidi demmonttaytas
de7o ays immizee?
22 Duge duufon gelishe ufayettizaytas
de7oy ays imettizee?
23 Izi biza ogey
izaadefe geemettidaadessinne
Xoossi gordi woththida asas
poo7oy ays imettizee?
24 Yeehoy taas kath gidides;
waasoykka taas
goggiza haaththa mala gidides.
25 Ta yayyida miish ta bolla yides;
ta dagammidayssika
ta bolla gakkides.
26 Ta giddon hirgay xalla diza gishshas
saroy, woppaynne
shemppoy deenna» gi qanggides.