34
1 Eelihuy ba haasaya gujjidi hizgides;
2 «Intteno aadho eranchchatoo!
Ta inttes haasayzayssa siyite;
intteno eranchchatoo
ta haasaya ezgite.
3 Inxarsi kaththa mal7o
shaakki erees;
hessaththoka hayththi yo7o
shaakki erees.
4 Tumu gidida yo7o
ane shaakki eroos;
lo7o gidida miishshika
issife tamaaroos.
5 «Iyoobi, ‹Tani xillo shin
Xoossi tana suure pirda diggides.
6 Tani tumanchchashin
wordanchcha mala qoodettadis;
ta aykkoka moorontta dashe
paxontta madunththan
waayettays› gides.
7 Iyoobe mala Xoossa bolla
qilccizaadey beettandeesha?
8 Izi iita ooththizaytara laggetees;
izas peyshayka iita laggetara.
9 ‹Xoossa ufayssana giidi oosoy
as aykkoka maaddenna› gees.
10 «Akeekiza asatoo
ane tana ezgite!
Iita oosoy Xoossafe;
bala oosoy
Ubbaa Dandayza
Xoossafe haakko!
11 Xoossi asas
izaade ooso mala immees;
izas izaade hemeththa mala
ooththees.
12 Ubbaa Dandayza Xoossay
mulekka iita miish ooththenna;
ay asaska
suure pirda geellasenna.
13 Xoossasi biitta
hadara immidaadey deenna;
iza alame bollaka
shuumidaadey deenna.
14 Xoossi ba ayanazanne
ba shemppoza;
baakko zaari ekkana koyidaakko,
15 asho may7iday kumeth dhayana;
asa zereththika
duge biittan simmana.
16 Neni akeekizaa gidikko hayssa siya;
ta nees haasayzayssa ezga.
17 Suure pirda ixxizaadey
dere ayssanaas dandayzee?
Neni xillonne wolqqama Xoossa
nagaranchcha kessay?
18 Kawota intte dhalleketa;
shuumetakka intte iita
gaanay oonee?
19 Ubbatikka iza medhetata gidida
gishshas izi shuumeta
shaakki maaddenna;
duretakka manqotappe
shaakkenna.
20 Istti leela giddoth
qoppontta hayqqana;
ubbay kokkori dhayana;
wolqqamatikka oona kusheykka
bochchontta kichchana.
21 «Xoossi asa ubbaa
tanggoza xeellees;
issaa issaa hemeth kaalleettes.
22 Iita asati qotettana mala
girdi gida dhumay deenna.
23 Xoossi asa bolla pirdanaas
bare immenna.
24 Wolqqama daannata
daannateththafe denththanaas,
isttasohon hara woththanaas,
aykko oyshay shiiqontta
izi hessaththo ooththees.
25 Izi istta oosaa eriza gishshas
issi omars
istta daannateththafe dhayssana.
26 Istti ooththida makkallateththa
gaason ubbaa asa sinththan
makkallanchchata qaxxayees.
27 Izi istta qaxxayizayssi
istti iza kaallizayssa aggida
gishshassa;
iza azazotakka
istti kadhida gishshassa.
28 Istti manqota un7eththida;
pude Xoossako waassana mala
ooththida.
Xoossika manqota
waasoza siyides.
29 Xoossi co7u giikko
oonee iza bolla pirdanay?
Izi ba zokko zaarikko
oonee iza beyanay?
30 Hessaththoka Xoossas
yayyontta deraa
un7eththiza kawoy
deraa bolla dendiko
iza oonee digganay?
31 «Iyoobee! Neni ne nagara
Xoossas paaxada
zaara nagara ooththike ga
qaala geladii?
32 Ta ooththida nagaray awayssako
tana tamaarsa;
ta mooridaa gidikko
zaarada izaththo
ooththike! gadii?
33 Histtiin neni maarettanaappe
ixxis gaada
neni shiishshiza qofa mala
Xoossi ne amoza
nees polana mala
ne koyay?
34 «Tana siyiza asati
akeekiza eranchchatikka,
35 ‹Iyoobi erateththi baynda haasayees;
hu7ey baynda haasayata
haasayees› geettes.
36 Iita asata zaaro mala
zaariza gishshas
Iyoobi wurseththi gakkanawu
paacettidaakko aazee dizay!
37 Nu giddon wogappe kare ke7ides;
Xoossa bolla kadhe darssides;
ba nagara bollaka
makkallateth gujjides» geettes.