36
1 Eelihuy ba haasaya gujjidi hizgides;
2 «Xoossa gishshas tani haasayana
haray diza gishshas
guuth dandayada ta gizayssa siya.
3 Tani darosoppe demmida
erateththan, tana medhdhida
Xoossi Xillo gididayssa
tani nees erisays.
4 Ta qaalay wordo gidonttayssa
neni lo7eththa era;
nenara haasayana taas kumeththa
erateththi dizayssa era.
5 «Tumukka Xoossi wolqqama;
gido attiin oonakka kadhenna;
izi ubbaaka akeekees.
6 Izi iita asata paxa woththenna.
Metotida asatas gidikko
suure pirda pirdees.
7 Xoossi xillo asata naagees;
kawota mala
bonchcho algan utisees;
mernaas istta
dhoqqu dhoqqu histtees.
8 Gido attiin asi
sansalatan qashettiko,
woykko meto giten oykettiko,
9 istti ba otoreteththan
ooththida nagara qonccisees.
10 Istti seera siyana mala
istta hayththaa doyees;
istti bantta iita oosaappe simmidi
maarettana mala azazees.
11 Istti Xoossas azazettidi ooththiko,
banttas attida layththa
dureteththaninne
ufayssan ongana.
12 Gido attiin iza siyontta ixxiko
istti olan wurana;
istti bantta eeyateththan
dishe hayqqana.
13 «Bantta wozinara Xoossa kaddizayti
qaxxayettida mala daana;
izi istta qaxxayshinkka
istta kaaleththizayti
woossettenna.
14 Istti ba poliza
iita laymateththa
boshan dhayana;
bantta yelagateththa layththankka
mulqqetti hayqqana.
15 Xoossi meton un7ettizayta
istta metaappe ashshana;
istta gakkida metaan
isttas timirte immana.
16 «Hayssa ha wodezan
Xoossi nees qoppizay
nena ne diza metaappe kessidi
lo7o kaththi kumida
maaddan efanaassa.
17 Ha7i gidikko
ne ooththida mooraappe
dendoyssan ne bolla
pirdettida gishshas,
nees bessiza qixaate
eko bolla daasa.
18 Oonikka nena dureteththa daron
cimontta mala;
matta7enkka nena
baleththontta mala naagetta.
19 Nees diza aqotaynne godateththi
daro gidikkoka
nena metoppe ashshettenna.
20 Deraa dizasoppe dhayssiza
dhuma wodey
yaana mala amottofa.
21 Neni meto giddon paacettizay
hessa gaason gidida gishshas
simmada nagara
ooththontta mala naagetta.
22 «Xoossa wolqqay
ay mala gitakko akeeka;
Xoossi ubbaafe aadho astamaare.
23 ‹Hayssa ooththa› giidi
Xoossa azaziza asi woykko,
‹Iita ooso ooththadasa› giidi
iza walassizay oonee?
24 Izi ooththiza oosaa gishshas
asay ubba wode mazamuren
galatizayssa mala,
nenikka iza oosaas
yeththan galata.
25 Asa zereththi ubbay
Xoossa oosaa be7ides;
asay tishshi ooththi
haakon be7ides.
26 Xoossa gitateththa
pilggidi gakkanaas
nuni dandayokko;
iza layththa qoodaykka
nu erappe bolla.
27 «Xoossi haaththa abbafe
pude salo efees;
zaaridikka ira saloppe
duge bukisees.
28 Ira shaarappe kessidi
wolqqama ira asas bukisees.
29 Gido attiin Xoossi
shaara wostti miccizaakko,
wolqqanththa giddon uttidi
izi waani haasayzaakko
ooni eranawu dandayzee?
30 Xoossi abba ciimmateththa
kammidi izi ba yuushon
wolqqanththa
wostti laallizaakko xeella.
31 Hayssa mala ooththidi
Xoossi ba deraa ayssees;
asay miza daro kaththaaka
mokisees.
32 Wolqqanththa izi
ba kushen oykkees;
oykkidi ba dosida
bagga baana mala azazees.
33 Daday wolqqama iray
yaanayssa malatees;
mehetikka ira uushoy yizayssa ereettes.