38
Xoossafe Iyoobes Imettida Zaaro
1 Hayssafe guye GODAY
gote carko giddon gididi
Iyoobes hizgides,
2 «Hayssi eray baynda haasayan
ta zoreza kadhizay
izi baas oonee?
3 Ane adde gidikko
danccetta ta sinththan eqqa;
tani nena oychchizayssa
taas zaara.
4 Tani hayssa alameza medhdhishin
neni awan day?
Ne erizanne akeekizaa gidikko
ane taas yoota.
5 Hayssi sa7ay ay keena gidanaakko
qofa qachchiday oonee?
Sa7a bolla izi
mixe wodorota micciday
oonakko ne eray?
6 Biitta tuussati kundontta mala
minththi oykkida wolqqay aazee?
Alameza ooso doommishin
yochcha shuch yeggiday oonee?
7 Bakkale xoolintteti
issi bolla yexxizaashe,
kiitanchchati ubbay ililizaashe
neni awan day?
8 «Abbay biittafe
dhuuqqi ke7iza wode
pultto ayfeta gordiday oonee?
9 Abba shaaran kammiday
Qasseka girdi gida dhuman
gordiday tana.
10 Abbas zawa medhdhiday
pengenne zawa woththiday tana.
11 Hayssa gakkanawu ya!
Hayssafe aadhdhofa!
Ne wolqqama dambalay,
‹Hayssan eqqo› gadis.
12 «Iyoobee! Neni yelettoosofe
wonttay wonttana mala
azaza eray?
Wontta poo7oska
soho giigsa eray?
13 Wonttay biitta bolla
poo7o bessana mala
iita asati qotettidasoppe
qoncce kezana mala
ne istta azaza eray?
14 Wontta poo7oy biitta
qalam7etti diza may7o mala
beettana mala ooththees;
mana miishsha bolla diza
maatame mala
qonccen bessees.
15 Iitati poo7o digettida;
istti makkallateththan denththida
kusheykka meqqides.
16 «Ne duge ciimma abban
wodhdhadii?
Wogga gita abba garsan
simeretta eray?
17 Hayqo pengeta nena bessidee?
Girdi gida dhuma
pengetakka beyadii?
18 Sa7ay ay keena dalga gididaakko
ne eray?
Ane hayssa ubbaa erizaa gidikko
ne taas yoota.
19 «Poo7oy dizaso efiza ogey awanee?
Qasseka dhumay
de7izasoy awakko
ne eray?
20 Neni poo7onne dhuma
istti dizaso dizaso
efanaas dandayayii?
Isttasoy dizaso efiza ogeza
ne eray?
21 Neni biittay medhettiza wode
yelettida gishshassinne
nees layththayka
daro gidida gishshas
ne erontta aggaka!
22 Shachchi wodhdhiza
keeththan geladiyee?
Woykko uttida shachcha
doore beyadii?
23 Hayssa ha shachchaza
ta ola gallassasinne
meto gallassas
go7ettanaas minjja woththidaaza.
24 Wolqqanththi awappe dendizee?
Woykko arshey mokkiza baggafe
carkoy biitta bolla laalettizaso
efiza ogey awanee?
25 Iraththo wodhdhizaso giigsiday;
daday walakettida uushos
oge giigsiday oonee?
26 Oonikka baynda biittan
asikka dontta bazzon ashshizay,
27 iray bukkana malakka
ooththizay oonee?
Asi baynda sohozanne
bazzo biitta
haath kalssiday
biittayka maata mokkana mala
ooththiday oonee?
28 Iranne xaaza immizay oonee?
29 Shachchinne kenchcho
immizay oonee?
30 Kenchcho haaththa shuchcha mala
minththees;
abba haaththika shachchaththo
shuchchatana mala ooththees.
31 «Piliyaadise geetettiza xoolintteta
issi bolla qachchanaas dandayay?
Ooriyo geetettiza xoolintteti
issi bolla oykettida wodoroza
duuththanawu dandayay?
32 Xoolintteta ubbaa
istta woden woden
kessanawu dandayay?
Zardo geetettiza do7a
medhoy diza xoolinte,
istta maaratara
ne kaaleththanawu dandayay?
33 Saloti ay mala wogan a
qizaakko eray?
Hayssa ha wogazakka
biitta bolla oosisana dandayay?
34 «Daro ira nees bukisana mala
shaara ne azazanawu dandayay?
35 Wolqqanth ne azazon wolqqamizee?
Wolqqanth ne yeddanaas dandayay?
Isttika nees,
‹Hekko nu haan doos› gi erizoo?
36 Wozinas cinccateth
qoppanaas kaha immiday oonee?
37 Ba eran shaarata qoodanaas
dandayzay oonee?
saloppe haath duge tiganaas
dandayzay oonee?
38 Gudulla oyseththidi
phashe kessanaas
dandayzay oonee?
39 «Macca gaammoy wora giddon
zamada uttidaashin
ne izis miza miish shankkatada
immanaas dandayay?
40 Woykko gafi uttida izi marata
kalssanawu dandayay?
41 Quuroti gafidi bichchariza wode
istta ciyetikka miza miish
dhaydi taakko waassiza wode
isttas miza miish
immizay oonee?