Yoonaasa Tinbite
Giddo Qofa
Yoonaasa tinbitey Xoossas azazettike gida issi nabe bolla gakkida dumma dumma metota yootiza maxaafa gidida gishshas hara tinbite maxaafatappe dummatees. Xoossi Yoonaasa, «Isra7eele asaas mino morkke gidida gita Asoore kawoteththas waanna katama Nannawe ba!» giidi iza azazides.
Yoonaasi gidikko, «Xoossay katamayo dhayssanaas immida mino qofsozas izi gida mala ooththenna» gi qoppida gishshas Xoossa qaala ekkidi Nannawe baanaas koyibeenna; daro hanoti handaappe guye keehi ufayettontta dishe azazettides; izi buro hanana gida iza qaalazi polettontta aggiin lancettides.
Ha maxaafazi Xoossas iza medheteththa ubbaa bolla godateththi dizayssa erisees. Harappeka Xoossi siiqonne maariza Godaa gidida gishshas ba deraa morkketa bolla hanqettidi mulera dhayssanaappe atto giidi maaranaas dosizayssa bessees.
Ha Maxaafay Oykkida Kumeththa Qofa
Godaappe Yoonaasa baqata 1:1-7
Yoonaasa woosa 2:1-10
Yoonaasi Nannawe biin dereza maareteth 3:1-10
Xoossi dereza maarida gishshas Yoonaasa hanqeteth 4:1-11
1
Yoonaasi Azazettontta Ixo
1 Amaate naa Yoonaasakko GODAA qaalay,
2 «Dendada he gita katamaa Nannawe ba; he katamaa asaa iitateth ta be7idayssa isttas yoota» gishe yides.
3 Gido attiin Yoonaasi GODAA sinththafe baqatidi Tarseese biitta baanaas dendides; izi Yoophphe katamaa wodhidi Tarseese biza markabe demmides; GODAA sinththafe baqatidi isttara Tarseese baanaas miish qanxxidi markabezan gelides.
4 Markabezi bishin GODAY abba bolla gote carko denththiin abba dambalay keehi darida gishshas markabezi meqqana gakkides.
5 Histtiin markabezan diza asay babbida gishshas wurikka ba xoossaako waassides; qasse markabezi kawuyana mala iza giddon diza caanaa denththidi abbaan olida; gidikkoka Yoonaasi markabezas garsa kifile wodhidi heen deexo dhisko wodhides.
6 Markabeza halaqay izakko biidi, «Ays dhiskadii? Dendada ne xoossaa woossa! Izi ba lo7o ayfen xeellidi nuna ashshanaakko ooni erizee!» gides.
7 Markabezan diza asay issoy issaa, «Haa yiite! Hayssi iita miishshi oona gaason nuna gakkidaakko eranaas ane saama yeggoos» gida; histtiin istti saama yeggiin saamay Yoonaasa bolla wodhdhides.
8 Hessafe guye istti Yoonaasa, «Hayssi iita miishshi oona gaason nu bolla gakkidaakko ane nuus yoota! Ne oosoy aazee? Awappe yadii? Ne derey awa? Neni oona zereththee?» gi oychchida.
9 Histtiin Yoonaasi zaaridi, «Tani Ibraawe asa; abbaanne biittaa medhdhida salo GODAA goynnays» gides.
10 Hessa gishshas Xoossa sinththafe izi baqatizayssa izi isttas yootidayssafe asay erida gishshas keehi Babbidi, «Haysso ay pala miish ooththadii?» gida.
11 Qasse abba dambalay kaseyssafe haa darida gishshas asay Yoonaasa, «Nuus abbay co7u gaana mala nena nuni wosttinoo?» giidi oychchida.
12 Izikka isttas, «Hayssi wolqqama dambalay intte bollan dendiday ta gaason gididayssa ta erays; hessa gishshas tana denththidi abban olite; histtiko abbay inttes co7u gaana» gides.
13 Gido attiin markabezan diza asay markabeza guye abba lanqe kessanaas minththi laaggida shin abba dambalay keehi darida gishshas kessanaas dandaybeettenna.
14 Hessa gishshas isttas, «Abeet GODAWU! Hayssa addeza shemppo gishshas neni nuna dhayssontta malanne hayssa geeshsha suuththa acozakka neni nuuppe oychchontta mala nuni nena keehi woossoos. Ays giikko GODAWU neni ne koyida mala ooththadasa» giidi GODAAKKO waassida.
15 Hessafe guye Yoonaasa denththidi abban oliin abba dambalay co7u gides.
16 Histtiin asay GODAAS keehi babbides; GODAAS yarsho yarshida; adinakka adinettida.
17 Yoonaasa mittana mala issi gita mole GODAY giigsiin he moleza ulon Yoonaasi heedzdzu gallassinne heedzdzu omars aqides.