Yohannisi Xaafida
Nu Godaa Yesus Kirstoosa Mishiraachcho Qaala
Giddo Qofa
Yohannisa Mishiraachcho qaalay Yesusi asho may7idi asa giddon beettida de7o Xoossa qaala gididayssa qonccisees. Hessika Aaway Godaa Xoossaa gidida mala, Yesusikka Godaa Xoossaa gididayssa bessees. Yoha 1:1; 8:58; 12:41; 20:28. Maxaafazi lo7eththi qonccisiza mala hayssi Mishiraachcho qaalay xaafettiday nababizayti Yesusi as ashshizaade gididi yaana geetettida Xoossa Naa gididayssa ammanana malanne asay iza ammanidi mernaa de7oy izan dizayssa erana malassa. (20:31)
Mishiraachcho qaalazas koyro kifiley mernaas diza Xoossa qaalaynne Yesusi issino gididayssa koyro shiishshidaappe guye Yesusi as ashshizaade gididi yaana geetettida Xoossa Nay iza gididayssa bessiza dumma dumma malatatakka shiishshees. Hessafe qasse he malatatappe ay ayfey beettidaakko qonccisiza taariketi kaalleettes. Hayssi ha kifilezi issi issi asati Yesusan ammanidi iza kaallizayta gididayssanne hara asati qasse izara waani eqettidaakkonne izan nu ammanokko gizayssa yooteettes. Shempo 13-17 gakkanaas Yesusi oykettida omars bana kaallizaytara izas ay mala mino issifeteththi dizaakko izas kaqeteththa wodey matishin izi bana kaallizaytas giigsiza qaalanne minththeththiza qaala izi istta sissidayssa qoncciseettes. Hankko attida wurseththa shempoti qasse Yesusi oykettidayssa, pirdas shiiqidayssa, iza kaqeteththaa gishshassinne hayqoppe denththaa gishshas hessaththoka iza denththaafe guye bana kaallizaytas izi bana qonccisidayssa yooteettes.
Yohannisi Yesus Kirstoosa baggara beettiza mernaa de7o lo7eththi bessizay, Xoossa kiyateththi ha7ippe doommidi Yesusa, oge, tumanne de7o histti ammanon ekkizaytassa. Yohannisa Mishiraachcho qaala haratappe dummasizay ayana tumateth erisanaas keehi erettida asi hach hach go7ettiza miishshata heytikka haaththa, quma, poo7o, heemmizaade, dorsata, woyne miththinne woyne miththa ayfe misatizayta leemison yootizayssa.
Ha Maxaafay Oykkida Kumeththa Qofa
Geloso 1:1-18
Xammaqiza Yohannisanne Yesusa kaallida koyro tamaareta 1:19-51
Yesusi Xoossa ooso doommides 2:1—12:50
Yerusalaameninne he heeran Yesusas wurseththa ooso gallassata 13:1—19:42
Hayqoppe Godaa denththinne iza qoncceth 20:1-31
Kuushsha qofa 21:1-25
1
1 Qaalay kase koyro dees. Qaalaykka Xoossa achchan dees. He qaalaykka Xoossa.
2 Izi koyro Xoossa achchan dees.
3 Medheteththi wuri izan medhettides. Medhettidaazan izi baynda medhettiday issinakka duukku.
4 De7oy izan dawus; hanna de7oya asas poo7o.
5 Poo7oy dhuman poo7isees; dhumay poo7o mulekka xoonenna.
6 Xoossafe kiitettida Yohannisa geetettiza issaadey dees.
7 Iza markkateththan asi wuri ammanana mala Poo7os markka gidi yides.
8 Izi poo7o gishshas markkattana yides attiin izi ba hu7es poo7o gidenna.
9 As ubbaas poo7o immiza tumu poo7oy hayssa ha alamezan yuussan dees.
10 Qaalaykka kase alamen dees; alameykka medhettiday izanna. Gido attiin alamey iza eribeenna.
11 Izi ba baggataakko yiin iza baggati iza ekkibeettenna.
12 Gido attiin iza ekkidayti iza sunththan ammanidayti istti Xoossa nayta gidana mala maata isttas immides.
13 Isttika Xoossa nayta gididay Xoossafe yelettida gishshas attiin asa zereththafe hessika asa wogan woykko asho shenen gidenna.
14 Qaalaykka as gidides; Xoossa kiyateththaninne tuman kumidi nunan aqides; issi naas aawaa matan diza bonchcho misatiza iza bonchcho nu be7idos.
15 Yohannisikka, «Taappe guyera yizayssi taappe aadhdhees. Gaasoykka izi taappe kasekka dees gaada ta inttes yootidayssi hekko hayssi izakko!» gi markkattides.
16 Iza kumeththa kiyateththan nu wuri kiyateththa bolla kiyateth ekkidos.
17 Wogay Muse baggara imettides; kiyateththinne tumay gidikko Yesus Kirstoosa baggara nuus yides.
18 Xoos be7iday oonikka baa. Gido attiin Xoossa Aawa matan diza Xoossa Naa issoy xalala iza qonccisides.
Xammaqiza Yohannisa Markkateth
(Mato 3:1-12; Mar 1:1-8; Luqa 3:15-17)
19 Ayhudata daannati Yerusalaameppe qeesetanne Lewe nayta Yohannisakko kiittidi, «Ne oonee?» gi oychchishin,
20 Yohannisi, «Tani Kirstoosa gidikke» giidi geeshshi markkattides attiin markkattanaas ixxibeenna.
21 Isttika, «Histtiin ne oonee? Ne Eelaasaa?» gi oychchida; izikka, «Gidikke» giidi isttas zaarides. Isttika, «Izi yaana geetettida nabey nenee?» gida. Izikka, «Akkay tana gidikke» gides.
22 Istti qasse, «Histtiin ne oonee? Nuna kiittida asaas nu yootana mala ne nena oona gay?» gida.
23 Izikka, «Nabe Isayaasi yootida mala tani, ‹Xoossa oge suurisite› gishe bazzo biittan waassizaade qaala giirissa» gides.
24 Farsaawetappe kiitettida issi issi asati,
25 hessa gishshas, «Ne Xoossi kiittidaade woykko buro yaana geetettida nabey nena gidonttaa gidikko histtiin aazas nuna xammaqay?» giidi iza oychchida.
26 Yohannisikka isttas, «Ta haaththan xammaqays; gido attiin intte eronttaadey intte giddon eqqides.
27 Taappe guyera yaanayssi iza; ta iza caamma qasho birshanaas bessizaade gidikke» gides.
28 Hayssi wuri haniday Yohannisi xammaqiza Yordaanoose shaafappe he pinththan diza Bitaaniya geetettiza katamanna.
Xoossa Dors
29 Wonteththa gallas Yohannisi Yesusi baakko yishin be7idi, «Dere nagara biittafe diggana Xoossa dorsi hekko hayssich!
30 ‹Taappe guyera yaanayssi izi taappe kasekka diza gishshas taappe aadhdhees› gaada ta inttes yootizay hayssich!
31 Tanikka ta baggara iza erabeekke; gidikkoka izi Isra7eele deres qonccana mala ta haaththan xammaqashe yadis» gides.
32 Kaaleththidikka Yohannisi hizgi markkattides; «Xillo Ayanay haraphphe kafo misatidi saloppe wodhdhishininne iza bolla uttishin beyadis.
33 Ta ta baggara iza erikke shin ta haaththan xammaqana mala tana kiittidaadey, ‹Xillo Ayanay iza bolla wodhdhi shempishin ne beyanaadey Xillo Ayanan meeccanay iza› giidi taas yootides.
34 Tanikka hessa beyadis. Hessa gishshas izi Xoossa naa gididayssa ta markkattays» gides.
Yesusa Koyro Kaallidayta
35 Wonteththa gallas Yohannisi bana kaalliza nam7atara heen eqqides.
36 Yesusi iza achchara aadhdhishin Yohannisi be7idi, «Xoossa dorsi hekko hayssich!» gides.
37 Yohannisa kaalliza nam7ati hessa siyidi Yesusa kaallida.
38 Istti iza kaallishin Yesusi guye yuuyi xeellidi, «Ay koyeetii?» gides. Isttika, «Astamaaree! Ne duussasoy awaa?» gida.
39 Izikka istta, «Haa yiidi be7ite» gides; hessa gishshas biidi izi awan dizaakko be7idanne he gallas izara issife pe7ida; wodeykka gede tammu saateso bides.
40 Yohannisi yootida qaalaa siyidi Yesusa kaallida nam7atappe issoy Simoona Phexroosa isha Indiraasa.
41 Indiraasi koyro ba isha Simoonaakko biidi, «Xoossi kiittida Kirstoosa nu demmidos!» gides.
42 Hessafe guye Indiraasi Simoona Yesusaakko ekki bides.
Yesusikka iza tishshi histti xeellidi, «Haysso! Ne Yoona naa Simoona; hayssafe guye ne Keefa geetettana» gides. Keefa guussi Phexroosa guussa woykko zaalla shuch guussa.
Yesusi Piliphoosanne Natina7eele Xeygides
43 Wonteththa gallas Yesusi Galila baanaas koyides. Piliphoosakka demmidi, «Tana kaalla» gides.
44 Piliphoosikka Indiraasa malanne Phexroosa mala Betesayda katama asa.
45 Piliphoosi Natina7eele demmidi, «Musey woga maxaafan qasse nabetikka buroppe hananayssa yootiza ba maxaafatan iza gishshas xaafida addeza nu demmidos. Izikka Yooseefe naa Naazirete Yesusaakko!» gides.
46 Natina7eeley qasse, «Naazireteppe lo7o miishshi beetti erizee?» gi oychchiin Piliphoosi iza, «Haa yaada beya» gides.
47 Natina7eeley Yesusa beyana yishin Yesusi be7idi iza, «Hekko! Geney baynda tumu Isra7eele asa!» giidi iza gishshas yootides.
48 Natina7eeleykka zaaridi, «Tana wostta eradii?» gi oychchiin Yesusikka, «Piliphoosi nena xeyganaappe kase balase miththa garsan ne dishin ta nena beyadis» gi zaarides.
49 Natina7eeley, «Astamaaree! Ne Xoossa naa; Ne Isra7eele kawo» gides.
50 Yesusikka izas, «Ne ammaniday, ‹Ta nena balase miththa garsan beyadis› gida gishshee? Ne buro hessafe aadhdhiza daro miish beyana.
51 Gujjidikka ta inttes tumu gays; buro saloy doyettiin Xoossa kiitanchchati Asa Naa bolla wodhdhishininne kezishin intte beyana» gides.